Andersip Knud Rasmussen whiskymik nersoraa

Ilisimasassarsiorluni angalatuup, aalartitsinikkut imermik akuiaasartup whisky-liortartullu Anders Bilgram-ip, Danmarkimi Jyllandip avannaani Hjortdalimeersup, Knud Rasmussen alutorilluinnarpaa. 

Taannalu Knud Rasmussenimut nersorinnissumminik maanna whiskyliaqarpoq akimasuumik.

- Whiskylianni nutaami “Fortrylleren”-imi Knud Rasmussenip Issittumi suliarpassui aamma tallimassaannik Thulemi ilisimasarsiornerup naammassineranit ukiut 100-nngornerat malunnartippara. Whiskyliara paaralugu Kalaallit Nunaata Danmarkillu Issittumi sapiitsuliortuisa pingaarnerit ilaat kasuussutigineqarsinnaavoq, Anders Bilgram Sermitsiamut oqarpoq.

Ilisimasassarsiorneq piumasaqaatilik

Maannakkut 62-inik ukiullip, Bilgramip, meeraanerminit inuusuttuunerminillu Issittumi ilisimasassarsiornerit pillugit oqaluttuat atuakkallu soqutigai. Kisianni ilisimasassarsiorneq immikkuullarissoq tassunga angummut soqutiginarnerpaajuarpoq, taannalu tassaavoq Knud Rasmussenip tallimassaannik Thulemi ilisimasassarsiornera.

Ilisimasassarsiorneq 1921-imit 1924-mut pivoq, tassa ukiut 100-qqissaat matuma siornatigut. Knud Rasmussenip angalaqataasalu Arnarulunnguup Qaavigarsuullu Siberiap kangisissortaata isua ukiuni pingasuni angalareerlutik tikippaat. Umiarsuarmik qimussimillu Ilulissaniit Canadap Issittortaa ituillugu Alaskamiillu Siberiap kangianut.

Knud Rasmussenip ilisimasassarsiornermi Inuit Kalaallit Nunaanni, Canadami, Alaskami Siberiamilu kingoqqiffii assigiittut uppernarsivaa. Tallimassaannik Thulemi ilisimasassarsiornermi Knud Rasmussenip Arnarulunnguaq peqatigaa, taanna ukiumi matumani siusinnerusukkut Nuummi Nuutoqqami nersorniarlugu eqqaassutissalerneqarpoq.

Knud Rasmussenip atuakkiai, ingeniøritut ilinniagallip, Anders Bilgramip issittumi arlaleriarluni ilisimasassarsiortarnerinut isumassarsititsisuupput. 1993-imiit 1995-imut taanna Dansk Nordvestpassage Ekspeditionsimi aqutsisuuvoq, ilisimasassarsiornermi tassani Sullualuup qiterpasissortaa imaatigut angalaffigineqarpoq.

Qalasersuaq Pocamik kaajallallugu

Ilisimasassarsiorneq, Polarpassage 2000 Ekspeditionen, Bilgravip ikinngutini Frederik Heilmann Lynge (1956-2016) ilaatigut peqatigalugu kingornatigut aallartippaa. Qalasersuaq Pocamik umiatsiaaqqamik ammaannartumik kaajallallugu 1998-imiit 2008-mut 26.000 kilometerisut isorartutigisumik angallavigaat. Sikuusarnera peqqutaalluni angalaneq naafferartumik ukiuni qulini ingerlappaat.

Issittumi ilisimasassarsiornerni Anders Bilgramip angorusutaa ineriartorpoq. Imigassaliorfiliorusuppoq.

Angorusutaq taanna piviusunngorpoq. Anders Bilgramip Nordisk Brænderi 2009-imi pilersimmagu. Ginit, snapsit romillu aallaqqaammut pisiassaatigai. Nammineq immialiaasarput najukkameersunik akoorniarneqartarlutik. Whiskyliorneq 2013-imi aallartippaa. Bilgramip Jyllandip avannaani immiassaliorfituamut whiskymik najukkami akuutissanik akulinnik suliaqarnermut matut ammarpai.

Nersorinninneq

Tassanilu Knud Rasmussenimut nersorinnissut suliarineqarpoq. Nordisk Brænderisip pisisartui imigassanik Nordisk brænderimeersunik soorlu whiskynik pisartagaqalernissamut periarfissaqarput. Pisartagallit qaammatit pingasukkaarlugit puiaasamik pissarsisarput. Anders Bilgramillu nuannaartorisaminut Knud Rasmussenimut nersorinnissutaa decembarimi pissarsiassaavoq.

Whiskey taaguuteqarpoq, Fortrylleren, tassa alutornartoq imaluunniit angakkuagaq. Sakkortuujuvoq. 56,8 procentimik aalakoornartortaqarpoq taamaakkami issittumi qerisinnaanngilaq. Whiskey puiaasanut 50 cl-iterikkaartunut poortugaavoq.

Taanna niuertarfinni pisiariinnarneqarsinnaanngilaq, Nordisk Brænderisip ilaasortaanut pissarsiassaavoq. Nordisk Klanimut ilaasortaaneq nassiussinermi aqqutaata akeqannginnera ilanngullugu 378 koruuneqarpoq – pisinissarlu pinngitsaaliissutaanngitsoq, Anders Bilgram paasissutissiivoq.