Aningaasaqarneq eqqarsartaatsikkullu peqqissuuneq
Oqaatsit aningaasarneq eqqarsartaatsikkullu peqqissuuneq nalinginnaasumik imminnut atassuteqartinneqarneq ajorput, Bibi Mikaelsenilli atassuteqartippai.
Bibi Mikaelsen eqqarsaatiginneqqissaartoq.
Knud Fl. Larsen
Bibi Mikaelsen 31-nik ukiulik Syddansk Universitetimi Odensemiittumi semesterip aappaani aningaasaqarnermut tunngasunik ilinniagaqarpoq. Bibi Qaqortumeersuuvoq. Qaammatialunni Københavnimi fagit assigiinngitsut atuarnerisa saniatigut, Bibi Qaqortumi najugaqartuaannarsimavoq. Taamaattumik Danmarkimi universitetimi aningaasaqarnermut tunngasunik Bibip ilinnialerniarluni aalajangernera alloriarneq annertoqaaq. Aallaqqaammut bacheloritut ilaatigut aningaasarnermut, kisitsisit atorlugit nassuiaasiornermut, periusissiornermut matematikkimullu tunngasunik ilinniarpoq.
Ukiut aqqanillit Pisiffimmiissimasoq
Bibi ukiuni aqqanilinni Qaqortumi Pisiffimmi sulisimavoq. Piffissami kingullermi pisiniarfiup pisortaata ikiortaatut sulisimavoq. Ukiut sisamat matuma siorna marlulissat inunngormata, Bibi Pisiffimmi suliunnaarluni meeraaqqerivimmi sulilerpoq, Bibip oqarneratuut imminut illersorniarlunga, upernaakkut Odensemi ilaqutariit najugaqarfigisaanni pinnguartarfimmi oqaloqatigiinnermi taama oqarpoq.
- Matematikkillaqqillunga aaqqiissutissanillu nassaallaqqissuullunga paasinikuuara. Ilinniarnera nuannarisorujussuuara, naak unammillernaraluaqisoq ilaannikkullu ajornakusoortaraluaqisoq. Qujanartumik aamma periaaserissaallaqqissuuvunga, taamaattumik ingerlalluarpunga, marlulissat Tina Nivikkalu orpimmut majuarnerini Bibi oqaluttuarpoq.
- Suut tamarmik pilersaarusiorluarneqareersut aamma nuukkatta. Universitetimut, paaqqinnittarfimmut, ineqarnermut qujanartumillu aningaasaqarnermut tunngasut isumagereerlugit nuuppugut, Bibi tulluusimaarpalulluni oqarpoq.
Odensemi angalaassatillutik Christiania-sikkili pinnngitsoorsinnaanngilaat. Bibi Mikaelsen ima iluatsitsisimatigaaq, marlulissat meeqqeriviat Syddansk Universitetimut aqqummut inissisimalluni. Universiteti inissiaannit 3,5 kilometeriinnarnik ungasitsigaaq.
- Paasilluanngisannik pisoqaraangat qujanartumik ikiortissaqartuaannarpunga. Odensemi Kalaallit Illuutaanni aamma Odensep Kommuniani sulisut inussiarnertaqaat.
Bibi timersortuartartoq
Bibi Qaqortumi timersortartuarsimavoq. Taekwondo aamma Arctic Sport nuannarinerpaavai. Sisamariarluni Arctic Winter Gamesimut peqataasimavoq. Nunatsinni pissartanngorniunnerni arlaleriarluni ujaminnattarsimavoq. Maannamut allanik sammisaqartarsimaqaaq, taamaammallu Danmarkimi timersortarnissaq ajornakusoornerulersimavoq.
Unammillernartut annertuut
Taama ungasitsigisumut kulturimullu allamut nuunnissaq ajornakusoortuusoq, Bibip aallaqqaammulli nalunngilaa.
- Ukioq ataaseq sungiussiniaqqaarnissaq naatsorsuutigisimavara, tamannalu eqquutilerpasippoq. Qujanartumik ilinniaqatikka inussiarnersuullutillu pitsaaqaat, isumaqarpungalu ingerlalluarsimalluta.
Bibilu qulanngilluinnarluni oqarpoq Danmarkimi inuunissamut piareersimasoqartariaqartoq.
- Pisariaqartitsigaangatta ikiortissarsiortarnissarput aamma eqqaamasariaqarparput, taamaalioruttami Danmarkimi inuuneq taama ajornartigisariaqanngilaq.
Eqqarsartaatsikkut peqqissuuneq
Inuit allat amerlanerit assigalugit Bibi inuit attaveqaqatigiittarfianiippoq. Facebookimi inunnit 1300-nit malinnaavigineqarpoq.
Bibi Mikaelsen marluliaatini Tina Nivikkalu ilagalugit Christiania-millu sikkili pinngitsoorsinnaanngisaat
Knud Fl. Larsen
- Nammineq eqqarsartaatsikkut unammilligassaqarneq misigisimavara, nalunngilaralu nunatsinni inuppassuit aamma taama misigisaqartut, taamaattumik tamanna allaaserigajuppara.
- Kalaallit Nunaanni oqaluuserineqanngippallaanngitsunik ajornartorsiuteqartoq qularnanngilaq, Bibi oqarpoq.
Tassa aningaasat eqqarsartaatsikkullu peqqissuuneq imminnut ataqatigiilluinnarsinnaapput.
Siunissaq
- Ilinniarnera naammassigukku misilittagaqalerusuppunga. Immaqa Kalaallit Nunaannut utertinnanga nunami allami sulillunga. Kommunimik pisortalluunniit suliffeqarfiutaannik uattut ittumik aningaasaqarnermut eqqarsartaatsikkullu peqqissutsimut tunngasunik suliaqarusuttumik atorfissaqartitsisumik nassaassarsiorlunga, Bibi Mikaelsen ilaqutariit sikkilerlutik angerlannginneranni oqaloqatigiinnermik naggasiivoq.
Massuma apersuinerup ingerlanerani Tina Nivikkalu Odensep pinnguartarfiani pinnguarluarput. Orpik angisooq kusanartunik naasulik qallorfigissallugu pissanganaqaaq. Atuagassiortup kaageeraatai chokoladetallit mamarineqarpat? Aap. Mamarineqarluarput. Chokoladetaqarsimassanngikkaluarpulli. Upernaakkut kiatseruttorfiani sisamanik ukiullit inuaaraasa aqussinnaanngilaat. Naggataatigut kaageeqqani chokoladeqarneruneranit inussani chokoladeqarnerulerpoq.