Arnat aappaluttunik siggullit qimussimik sukkaniuttut

Arnat aappaluttunik siggullit 17-it Sisimiuni pingasunngormat qimussimik sukkaniullutik unammimmata pissanganeq misiginngitsoorneqanngilaq. Unammineq peqataasuniit isiginnaartuniillu puigunaatsorsiffigineqarpoq.

- Aallartinneq pissanganaqaaq, ilaqaratta nutaanik misiliinikuunngitsunik. Nuanneqaaq, Qimusseq Sisimiuni siulittaasoq Susanne Berthelsen unamminermi aaqqissuusseqataasoq Sermitsiamut oqaluttuarpoq.

Qimussinik sukkaniunneq sakkortusinnaavoq pisariusinnaallunilu, peqataasullu 13-it unammineq naammassisinnaasimavaat, sisamallu naammassinngitsoorlutik.

Qimussinik sukkaniunneq arnanut tunngasuusoq takutinniarlugu arnaq siggutik aappaluttumik qalipappaat.

Ajugaasoq

Karla Nielsen qimmit arfineq-pingasut qimuttoralugit ajugaavoq. Tikiffissamut apuukkami normu 2-tut inissisimagaluarpoq, isiginnaartuniit nuannaarutigineqaqaluni. Paasinarsivorli ajugaasuusoq.

- Nuannersumik tupaallappunga, siulersuisuniit paasitinneqarpunga ajugaasunga. Akunnerit pingasut qaangiummata paasivara. Normu 2-jugaluarpunga, kisianni siulinniittoq sanngussaasimagami. Taamaammat ajugaasutut toqqarneqarpunga, Karla Nielsen Qeqertameersoq, maanna Sisimiuni najugalik Sermitsiamut nuannaaqaluni oqaluttuarpoq.

Aima Jessen ajugaasup aappaattut inissippoq, kingornalu Susanne Berthelsen pingajuattut inissilluni. Peqataasuni utoqqaanersaat 74-inik ukioqarpoq.

Qimusseq Sisimiut meeqqanut qimussimik sukkaniunnissamut arfininngornermi pisussatut pilersaaruteqarput, arfininngornermili silarluttussaammat ullumut allamut inissinnissaa sulissutigaat.