Arnat amigaatigineqartut

Koda Awardsimi ukiut 34-t kingulliit ingerlaneranni kalaallit erinniortut 97-eriarlutik nersornaaserneqarsimapput.

Taakkunani arfineq-marluinnaat nipilersortartunut arnanut tunniunneqarsimapput.

Tassa 7,22 procentit.

1991-imi nersornaat siulleq, 'Kodap kalaallinut inuusuttunut nipiersortartunut nersornaataa' tunniunneqarpoq. Nipilersortartoq erinarsortorlu Ole Kristiansen nersornaammik tunineqarpoq.

Nipilersortartoq arnaq Koda-p nersornaasiuttagaanik nersornaaserneqartoq siulleq tassaavoq erinarsortartoq Julie Berthelsen, 2003-mi „neriunaatilittut" nersornaaserneqarpoq.

Koda-p nersornaasiuttagaata siullermeertumik tunniunneqarneraniit ukiut aqqaneq-marluk nersornaasiinerillu 18-it qaangiummata.

Arnat arlaannaalluunniit "ataqqinaammik nersornaammik", ukiut allortarlugit tunniunneqartartumik, tunineqarnikuunngilaq.

Koda Danmarkip tusagassiutitigut nalunaarutai naapertorlugit Danmarkimi peqatigiiffiup ukiuni kingullerni arnanik angutinillu naligiissitsinissaq ukkatarisimavaa.

Koda Danmarkimi peqatigiiffiuvoq aallaqqaammulli pingaarnernik marlunnik, suli ullumikkumut atuuttunik, suliassalik: Nipilersuusiat tamanut tusarliunneqarnerini akiliutissanik katersineq aningaasanillu pisinnaatitaaffilinnut agguaaneq.

- Qallunaat nipilersortartut akornanni naligiinnginneq annertusiartuinnartoq Kodap angutit arnallu pillugit kisitsisaataasa ukiut tallimassaat takutippaat, siornalu Kodap aningaasat tunniussaasa 10 procentiinnaat nipilersortartunut arnanut tunniunneqarput, siorna oqaatigineqarpoq.

Kodami siulersuisup tamanna nikallornartutut taavaa, suliaqarfillu tamaat akisussaaffimmik tiguseqqullugu kaammattorpaa.

Naligiissitaaneq sammillugu

Birte Olsen, ukioq manna Koda Awards-imik toqqaasartunut ilaasortaasimasoq, kalaallit toqqaasartuini, tassaasuni Birte nammineq kulturikkut illorsuarmi Katuamiit, Jorsi Sørensen (Koda), Pauli Wille (KNR) aamma Peter Kleemann (Nipiaa Rockfestival), naligiissitaanissaq naammattumik sammineqarsimanngitsoq isumaqarpoq.

- Inikuttuaraavoq uanga misigisanni. Nalileeqataasarninni inikippoq. Imaanngilaq suiaassuseq apeqqutaassasoq kisianni inissaqartitsineq piussaaq, Birte Olsen, ukiuni marlunni kingullerni nersornaasiinermut ataatsimiititaliamiissimasoq, oqaluttuarpoq.

AG-p Koda-mi Kalaallit Nunaanni ilaasortanut siunnersorti Edvard Lyberth-Mørch attavigisimavaa, aperaalu nersornaasiinermut ataatsimiititaliami naligiissitaanissaq imaluunniit angutinut arnanullu oqimaaqatigiissaarinissaq eqqarsaatigineqarsimanersoq.

Akissutimini itigartitsivoq, ukiunilu pingasuinnarni ilaasortanut siunnersuisartuusimalluni nangilluni oqarpoq. Nersornaasiinermut ataatsimiititaliaq malittarisassaqartoq kisianni naqissusiivoq.

- Nersornaasiinermut aalajangersimasunik piumasaqaateqanngilagut, naliliinermulli ataatsimiititaliami malittarisassiornikuuvugut, mailikkut naatsumik akivoq.

Malittarisassani, AG-p aamma pissarsiarisimasaani, naligiissitaaneq suiaassutsillu oqimaaqatigiissinnissaat pillugit allassimasoqanngilaq.

Angutit nipilersortartut amerlanerusut

Angutit nipilersortartut amerlanerusut Eqqumiitsuliortut kattuffiat EPI (Eqqumiitsuliornikkut
Pinngorartitsisut Ingerlatsisullu) oqaatigaa.

- Tamanna nassuerutigisariaqarpoq. Angutit erinarsortartut taalliortartullu amerlanerupput. Nipilersornerup silarsuaani angutaannaanerupput, siulittaasoq Hans Jukku Noahsen oqarpoq.

Sooq angutit amerlanerunersut siulittaasup ersarissumik akisinnaanngilaa.

- Arnaqartarpoq pikkorissorsuit taalliortunik erinniortunik saqqummersimasut taavalu ilisarisimasatta akornanni ersarippoq suli ikippallaartut. Akeriaannaanngilara. Soorunami eqqartorneqarsinnaavoq. Imaluunniit nunatsinni angutit tamakkuninnga suliaqartut amerlanerunerat peqqutaasinnaavoq, oqarpoq.

Nunatsinni angutit nipilersortartut amerlanerusut Birte Olsen aamma oqarpoq. Angutaannapajaat scenemut qaqisartut angutillu nipilersuut tigullugu nipilersortartut ileqquuvoq.

- Kaammattoqatigiinnissaq pisariaqarpoq. Soorlu tessap tarrarsorfigaa Nicki Minaj, taava Nicki aamma allamik. Tarrarsorfissaq pingaarnermut, oqarpoq.

Birte Olsen Naligiissitaanermut Siunnersuisoqatigiinni aamma ilaasortaavoq.

Arnat nipilersoqatigiinnut angutinut taalliortartut aamma oqaatigaa.

- Allaammi arnat taallaataat angutit bandianit atorneqartarput, taavalu puigorneqarluni taalliortua. Isiginiarneqanngitsoorluni arnamik taalliortulik, Birte Olsen oqarpoq.

Allannguigit

Angutit nipilersortartut amerlanerussuteqartut atuukkunnaarsinneqarpata nipilersortartut akisussaaffeqarnerulertariaqartut ataatsimiititaliami siulersuisunilu ilaasortaq isumaqarpoq.

- Kaammattuutaavoq appisimaartarfinni soorlu uanga katuami akisussaaffimmik tiguseqataanissara. Soorlu arnat appisimaartinnissai. Aamma festivalit kaammattornaqaat, Birte Olsen oqarpoq.

Aamma Koda Awardsimi nersornaasiinermut ataatsimiititaliami ilaasortat apeqquserneqarsinnaanerat oqaatigaa.

- Koda Kalaallit Nunaat kikkut nersornaasiinermut ataatsimiititaliami peqataarusunnersut suliffeqarfinnut aperisarpoq. Ataatsimiititaliamiittussanik toqqaaniarnermi allatut iliortoqarsinnaanersoq Birte Olsen aperivoq.

Nipilersortartut nersornaaserneqartarnerat annertusarneqassasoq eqqumiitsuliortut peqatigiiffiata EPI-p Aamma kajumissaarutigaa.

- Assersuutigalugu soorlu ”Ukiumi guitarertartumik”, ”Ukiumi erinarsortartumik” imaluunniit ”Ukiumi mikserimik” nersornaasiisarneq pilersinneqarsinnaavoq, taamaalilluni taalliortut erinniortullu kisimik ukkatarineqassanngillat. Assersuutigalugu ukiumoortumik ataatsimut nersornaasiisoqarsinnaassaaq suliffeqarfiit amerlanerusut peqataaffigisinnaasaannik, taamaalilluni nipilersortartunik nersornaasiinerit nukittorsarneqarsinnaallutillu siammarterneqarsinnaassapput, Hans Jukku Noahsen oqarpoq.