Cirkus Arena Kalaallit Nunaanni ukiunik 40-nngortorsiorpoq
Ullumimit ataasinngornermi septembarip 30-anit meeqqat nuannarinnittullu Cirkus Arenamik, Kalaallit Nunaanneeqqittumik, isiginnaarsinnaalissapput.
Meeqqat angajoqqaallu arlallit Cirkus Arenamut, sapaatip-akunnerani matumani Kalaallit Nunaanni illoqarfinnut tallimanut tikeraartussamut, qilanaannguatsiarput. Cirkus Arena Kalaallit Nunaanni ukiunik 40-nngortorsiorpoq.
Leiff Josefsen
Ukiut 40-ssaanni Cirkus Arena Kalaallit Nunaannut tikeraarpoq, cirkusimilu isiginnaartitsisartunik tupinnarluinnartunik inuttalinnik isiginnaartitsinikkut nalliuttorsiorneq nalliussineqassaaq.
Ukiut 40-t nalliuttorsiutiginninneq Ilulissani ataasinngornermi septembarip 30-ani aallartissaaq, tassanilu eqaalluinnartunik, klovninik minnerunngitsumillu ingerlatsisunik Bubberimik Julie Berthelsenimillu meeqqat nuannarinnittullu nuannaarutiginnissinnaapput.
- Isiginnaartitsisartut nunarsuarmi tusaamasat arlallit isiginnaartitsissapput, taakkulu meeqqanut inersimasunullu alutornassapput. Skating New Vision alutornartoq kajungernartorlu misigineqarsinnaavoq, taakkua sapiilluinnarlutik takutitassaqarput. Jessica Jester piginnaasalik quiasaarnermik kusanartumillu nassataqarluni eqaalluinnarnerminik takutitsissaaq, Kelly Folcolu malittuinnarnik akorseqattaarluni isiginnaartunut alutornartumik aliikkusersuissaaq, Cirkus Arena tusagassiuutinut nalunaarummi allappoq.
Tusaamasat nutaat
Isiginnaartitsisartut tusaamasat saniatigut aamma inuusuttut piginnaasaqarluartut Julia aamma Joachim isiginnaartitsissapput. Taakkua isiginnaartitsinerat nutaaliaasoq cirkusip suli piuneranik ersersitsivoq, qularnanngitsumillu isiginnaartut eqqaamajuassavaat.
- Ukiut 40-nngortorsiorluta Kalaallit Nunaanni angalanitta saqqummiunneqarnera tulluusimaarutigeqaarput. 1984-imi Nuummut Sisimiunullu tikeraaqqaarpugut, tamannalu kalaallit isiginnaartut peqatigalugit nalliuttorsiutigisinnaallugu immikkut ataqqinaataavoq, isiginnaartitsinerlu isiginnaartunut tamanut puiunaatsumik sunniuteqartussaq pilersissimavarput, Benny Berdino, Cirkus Arenami pisortaq oqarpoq.
Cirkus Arena ukununngassaaq
- Ilulissat timersortarfiani septembarip 30-ani nal. 18.30
- Aasiaat timersortarfiani oktobarip aallaqqaataani nal. 18.30
- Sisimiut timersortarfiani oktobarip aappaani nal. 18.30
- Maniitsup timersortarfiani oktobarip pingajuani nal. 18.30
- Nuummi Inussivimmi oktobarip arferngani nal. 14 aamma nal. 17
Pisiffinni imaluunniit isiginnaartitsinissaq nalunaaquttap-akunnera ataaseq sioqqullugu isernermi isissutissat pisiarineqarsinnaapput.
