Eqqumiitsuliortut nalliuttorsiorneq saqqummersitsinikkut nalliussigaat
KIMIK-ip aasaanerani saqqummersitsinera Nuummi sisamanngornermi maajip 22-ani ammaanersiorneqassaaq. Eqqumiitsuliortut eqqumiitsulianillu saqqummersitsivik aamma nalliuttorsiutigineqassapput.
KIMIK 1995-imi pilersinneqarpoq maannalu ukiunik 30-nngortorsiorluni. Eqqumiitsuliortut 24-t tassunga ilaasortaapput.
Assi: Cebastian Rosing
Eqqumiitsuliortut peqatigiiffiat KIMIK ukiunik 30-nngortorsiornera Nuummi
Eqqumiitsulianik Saqqummersitsivimmi aasaanerani saqqummersitsinermik malunnartinneqassaaq. Saqqummersitsineq maajip 22-ani nal. 18.00 ammarneqassaaq akeqanngitsumillu peqataasoqarsinnaalluni.
Nuummi Eqqumiitsulianik saqqummersitsivik maajip 22-ani aamma ukiunik 20-nngortorsiornera aamma malunnartinneqassaaq.
KIMIK tusagassiutinut nalunaarumi ima allappoq:
- Saqqummersitsineq Avatangiisinik taaguuserneqarsimavoq. Eqqumiitsuliortut tigussaasunik, kulturikkut inuuniarnikkullu avatangiisaannut eqqumiitsuliornikkut sammisartagaannuttaaq tunngavoq. Eqqumiitsuliortutut imminnut avatangiiseriittarnerannut aamma tunngavoq.
- Saqqummersitsinerit siammasissumik
takutitsiviusartutut ileqqoraat, soorlu qiperukkanik, qalipakkanik, marrianik,
mixed medianik, installationinik (ininut ikkussanik), videolianik
naqitikkanillu takutitsiviusarlutik.
Saqqummersitsinermut atatillugu allanik
pisoqartarumaarpoq, ilaatigut immikkut misigisassaq TAMASSA aqqutigalugu
eqqumiitsuliortunik KIMIK-imi ilaasortanik sisamanik saqqummiisitsisoqassaaq,
qanilaartumik suleriaatsiminnik oqaluttuassallutik. Arfininngornermi maajip
24-ani unnukkut nal. 19 pissaaq, isissutissallu Nuummi Eqqumiitsulianik
Saqqummersitsivimmi pisiarineqarsinnaassallutik.
“Avatangiisit” aggustip naanerata tungaanut takuniarneqarsinnaavoq.
