Piviusulersaarusiaq
taanna filmiinnaanngilaq – Issittormiunit qamanngarpiavik aamma
oqariartuutaavoq. Piviusulersaarusiami sammineqartut kinaassutsimut,
ataatsimoornermut akuerineqarnissamullu attuumassuteqartupilussuupput.
Nunami allami unammineranni tappiffigisani ersersikkai
Piviusulersaarusiaq
taanna filmiinnaanngilaq – Issittormiunit qamanngarpiavik aamma
oqariartuutaavoq. Piviusulersaarusiami sammineqartut kinaassutsimut,
ataatsimoornermut akuerineqarnissamullu attuumassuteqartupilussuupput.
Kalaallit nunanut allanut unammisartut ajugaaniaannaratik aammali imminnut pillutik unammisarput.
Assi: Frederik Gram
Nunami allami unammineranni tappiffigisani ersersikkai
Kalaallit
angutit isikkamik arsaattartut nunani allani unammisartuisa ukiuni pingasuni –
ilaatigut masannartuliornerani apineranilu sungiusartut, FIFA-mi
arsaattartunngornissamut anguniagaqartut qanorlu piginnaasaqartiginerminnik takutitsiartorlutik
Island Gamesimi arsaateqataasut – piviusulersaarusiami malinnaaffigineqarput. Arsaattartuunerup
avataatigut inuunertik arsaannerlu anguniagaqarfigiinnarnagu inuttut timikkut
tarnikkullu qanoq ittuunerminnik inuttullu pingaartitamik suunerinik
paasisaqarfigisarlugu aamma oqaluttuaraat.
Søren Høyip
qanilaassusermut tappiffeqartuunini qujanartumik aamma ersersippaa. Soorlu arsaattartup
Patrick O. Frederiksenip kulturikkut kingornussami namminerlu anguniakkami
ulluinnarni inuunermini oqimaaqatigiissaarnerisigut aavarnilikkersaarnerani
siukkallu Nemo Thomsenip arsaattartutut anguniakkaminik Danmarkimut kisimi
angalanikkut piviusunngortitsiartornerani malinnaaffigimmagit killitsinnaaloqaaq.
Taakkua oqaluttuarneri piviusulersaarusiami qitiulluinnarput. Tassa Kalaallit
Nunaat piviusulersaarusiami qulequtaaginnarnani pingaarnertut inuttaavoq.
Søren Høyip Kalaallit nunanut allanut unammisartui pillugit oqaluttuaani nuannaarneq qullilinerlu takutinneqarput.
Assi: Frederik Gram
Isikkamik
arsaanneq kiffaanngissuseqarfiusoq – qimaaffiusorluunniit?
Filmip qulequtaa
imatut oqariartuuteqarpoq: Arsaattarneq kiffaanngissuseqarneruvoq. Tamanna
ilumoorpoq – ilaatigut. Filmiliortulli silatusaarlutik kiffaanngissuseq
qajannartuusoq, FIFA-mullu ilaasortanngornissamik takorluugaq
neriuuteqartitsillunilu piviusunik sakkortuunik imaqartoq aamma
takutinniarpaat. Sungiusaasoq Morten "Rudi" Ruthkjær kinaassutsini
assigiinngitsuni attaveqatigiilersitsisutut saqqummerpoq, kalaallillu
soqutigisaat illersorpai – naak avataaneersuugaluarluni namminerlu kalaaliunngikkaluarluni.
Suliamut inuttullu tunniusimanera ersarillunilu killitsinnarpoq. Tamanna Rudip
unammisartut Danmarkimi aasarsiortarfimminut silami kinisimaarfittalimmut
grillpølsituunnissamullu qaaqqummagit erserpoq, tassani kinaassutsit
assigiinngitsut naapeqatigiillutik ataatsimoorfissarsiorput. Aamma Patrick O.
Frederiksenip ilaqutaasalu kaffisortitsineranni sungiusaasoqatigiit
peqataanerat pillugu qanimut paasisaqarpugut — nuannersumik piviusumillu
naapinneq kulturimik, ataatsimoornermik kinaassutsimillu ersersitsisoq.
Filmili Island
Gamesimi timersornermik piviusulersaarusiorpalaarnertut ingerlalermat filmip
tiguartinnarnera annikillivoq. Piffissaq ingerlaarfiusoq allanngorpoq,
unamminernilu oqaluttut pingaarnerulerput, tamannalu filmip
pingaarnerusortaanit allamut saasaatigineqarpoq: oqaluttuat inunnut tunngasut.
Arsaattut oqaluttuanit – politikkimut inunnullu tunngasunit –
pingaarnerutinneqaleraangata kiffaanngissuseq pillugu oqariartuut
ilungersuussaalersarpoq.
Patrick O. Frederiksen Island
Gamesimi ammaanersiornermi
neriuuteqarpalaartoq.
Assi: Frederik Gram
Filmi
siunissamut — uagullu nammineq iluaqutissatsinnut tunngasoq
“We Are
Greenland: Football Is Freedom”-imi ajornakusoortoq naammassineqarpoq:
Kalaallit oqaluttuarisaanerat ataqqinnittumik, nuannersumik itisumillu
oqaluttuarineqarpoq – issuagaannaallu sammineqanngillat. Filmi
pingaaruteqarpoq. Tamatta ilisimasarput sammineqarpoq: ilaarusunneq,
akuerineqarusunneq, ataatsimoorusunneq.
Filmi
isiginnaagassiatut kusanarluinnarpoq. Kalaallit Nunaat mianerinnittumik
qanilaartumillu filmiliarineqarpoq. Qaqqat apummik qallersimasut, sinerissami
illoqarfiit qalipaatigissaartut arsaattarfiillu ivigaaraasallit oqaluttuami
kusanarluinnartumik misigissutsikkullu killitsinnartumik tunuliaqutaapput –
sumiinnitsinnik suullu pineqarnerannik eqqaasitsissutaajuartut.
Piffissami
Kalaallit Nunaat eqqartorneqaraangat nunarsuarmi politikki aatsitassarsiornerlu
kisiisa pillugit eqqartuiffiusartumi, “We Are Greenland: Football Is Freedom”
allaanerulluinnartumik inuit pineqarnerinik eqqaasitsissutaavoq. Angutit
inuusuttut arsaannermik nuannarisaqartut arsaattartullu kamippaannik
atisaqartut pillugit. Neriunneq, tulluusimaarneq aamma inissisimaffimmik
nassaarniarnermi akiuunneq pillugu – nunarsuarmi imminermilu. Filmi Nuuk
International Film Festivalimi arfininngornermi septembarip 20-anni Kalaallit
Nunaanni takuteqqaarneqassaaq. Isiginnaariariuk. Taakku pillugit. Imminullu
pillutit.
Nannut: 5/6
