Naalakkersuisut Tasiilami Tunumiluunniit
sumiiffimmi allami piorsarsimassutsikkut ilinniarfimmik ilinniarfimmilluunniit
allamik pilersitsinissamik pilersaaruteqarnersut pillugu Inatsisartunut
ilaasortaq Gerth Mikaelsen, Naleraq, paragraf 37 naapertorlugu
Naalakkersuisunut apeqquteqarpoq. Ilinniarfimmik pilersitsineq ilaatigut
pinaveersaartitsinermut atorneqarsinnaasoq, taanna isumaqarpoq.
Tasiilami ilinniarfimmik
pilersitsisinnaanermik periarfissat assigiinngitsut misissorneqartut
Ilinniartitaanermut, Kultureqarnermut, Timersornermut Ilageeqarnermullu
Naalakkersuisoq Nivi Olsen, Demokraatit, akissuteqarluni allappoq.
Naalakkersuisut Tasiilami Tunumiluunniit
sumiiffimmi allami piorsarsimassutsikkut ilinniarfimmik ilinniarfimmilluunniit
allamik pilersitsinissamik pilersaaruteqarnersut pillugu Inatsisartunut
ilaasortaq Gerth Mikaelsen, Naleraq, paragraf 37 naapertorlugu
Naalakkersuisunut apeqquteqarpoq. Ilinniarfimmik pilersitsineq ilaatigut
pinaveersaartitsinermut atorneqarsinnaasoq, taanna isumaqarpoq.
Tasiilami ilinniarfimmik
pilersitsisinnaanermik periarfissat assigiinngitsut misissorneqartut
Ilinniartitaanermut, Kultureqarnermut, Timersornermut Ilageeqarnermullu
Naalakkersuisoq Nivi Olsen, Demokraatit, akissuteqarluni allappoq.
Piorsarsimassuseq tammatsaalineqassasoq
Tunumi piorsarsimassutsikkut pissutsit
immikkuullarissut kinguaariippassuarnut ingerlateqqinneqartarput, tamakkulu
tammatsaalineqarnissaat siunertaralugu Tasiilami Tunumiluunniit sumiiffinni
allani piorsarsimassutsikkut ilinniarfimmik pilersitsisoqarnissaa
pisariaqartoq, Gerth Mikaelsen isumaqarpoq.
- Tunumi piorsarsimassuseq qangarsuaaniilli
pigineqartoq tammatsaalineqassappat piorsarsimassutsikkut ilinniarfimmik
assersuutigalugu tivanermik aammalu Tunumiut periusaat aallaavigalugu
nerisassiornermik ilinniarfiusinnaasumik pilersitsisoqartariaqarpoq.
- Ilinniarfimmik nutaamik
pilersitsisoqaraangat illoqarfik eqiiallatsinneqartarpoq inuusuttullu
amerlanerusut ilinniakkamik aallartitsinissaannut periarfissanik
ammaassisarpoq. Nunatta kitaani sumiiffinni assigiinngitsuni
assigiinngitsorpassuarnik ilinniarfeqarpoq, akerlianilli Tunumi peqarani,
tamannalu allanngortinneqartariaqarpoq, taanna ismaqarpoq.
- Piorsarsimassutsikkut ilinniarfimmik
pilersitsineq Tunumi inuuniarnikkut atugarissaarnerulernissamut
aqqutissiuusseqataasinnaassaaq, Gerth Mikaelsen, Tasiilaminngaanneersoq
maannakkulli Nuummi najugaqartoq, oqarpoq.
Inuuniarnikkut atukkat pitsaanerusut
Kalaallit Nunaani sumiiffiit allat assigalugit
Tunumi inuuniarnikkut ajornartorsiutit annertupput, piorsarsimassutsikkullu
ilinniarfik pisaaliunermut atorluarneqarsinnaasoq Gerth Mikaelsen aamma
isumaqarpoq.
- Suliffissaaleqineq, inuuniarnikkut
aamma imigassamik ajornartorsiuteqarneq Tasiilami inuusuttut akornanni ukiuni
kingullerni takussaavoq. Inuusuttullu ineriartornissamut maannakkornit
pitsaanerusumik periarfissaqassappata najukkami ilinniarfimmik pilersitsisoqartariaqarpoq,
taanna oqarpoq.
Sammisap Inatsisartuni oqaluuserineqarnissaa
Gerth Mikaelsenip siunertaraa.
Periarfissat misissorneqartut
Ilinniartitaanermut, Kultureqarnermut,
Timersornermut Ilageeqarnermullu Naalakkersuisup Nivi Olsenip oqarnera
naapertorlugu Tasiilami innuttaasunit pisariaqartitatut kissaatigisatullu
oqaatigineqartartut Naalakkersuisuni eqqumaffigineqartorujussuupput.
- Taamaattumillu ujartuineq
naaperiarniarlugu Kalaallit Nunaanni ilinniakkat ineriartortinneqarnerat
pillugu Tasiilami assigiinngitsunik Naalakkersuisut periarfissarsiorput,
maannakkullu Tasiilami ilinniarfimmik pilersitsisinnaanermik periarfissat
assigiinngitsut misissorneqarput, taanna akissuteqarluni allappoq.
Qulaani pineqartut Naalakkersuisut
iliuusissatut pilersaarutaanni ilanngunneqassasut aammalu illoqarfimmi
pineqartumi ilinniarfimmik inuussutissarsiutinut tulluarsakkamik aamma
pikkorissarfiusinnaasumik ujartuineq naaperiarlugu, assersuutigalugu takornariaqarnermi
aamma umiatsiaararsornermi ilinniarfiusinnaasumik pilersitsisoqarnissaa
pingaartinneqartoq akissummi aamma erserpoq.
Suli qulakkeerneqanngitsoq
Tasiilami ingerlariaqqiffiusumik
ilinniarfimmik pilersitsisoqassappat tamanna qaqugu aallartinneqassanersoq
qanorlu akeqassanersoq Gerth Mikaelsenip ilanngullugu paaserusuppaa.
- Tasiilami ilinniarfiusinnaasutut
periarfissarsiorneq suli naammassineqanngimmat suli maannamut
aaqqiissutaasinnaasut qanoq imaqassanersut, qaqugulu aallartissanersut
naatsorsuinissamut suli periarfissaqanngilaq.
- Naalakkersuisut suli qulakkiinngilaat,
Tasiilami ilinniakkamik ilinniarnermik piginnaanngorsarnermillu innuttaasut
pisariaqartitaannik kissaataannillu piujuartitsinermik pilersitsisinnaassasoq.
- Tamanna peqataanikkut aammalu digitalikkut
ilinniartitsinermik, paarlakaattunik ilinniartitsinikkut, najugaq qimannagu
aamma alimasissumik ilinniartitsinikkut, pikkorissarnerit ilinniarnerillu
sivikitsunik pilersitsinikkut tunniunneqassaaq, Nivi Olsen allappoq.
Piorsarsimassutsikkut ilinniarfik
pilersinneqassappat taassuma qanoq ilusilimmik ingerlanneqarnissaa suli
ilisimaneqanngikkaluartoq, taamaattoq Tunumiut piorsarsimassusaat
aallaavigalugu ilinniarfimmik pilersitsisoqarnissaa Naalakkersuisut
tapersersoraat Nivi Olsen akissuteqarluni allappoq.
