Hans Lynge pillugu Lemvigimi saqqummersitsineq

Lemvigimi upperisarsiornikkut eqqumiitsulianik katersugaasivik arfininngormat ualikkut Hans Lynge pillugu saqqummersitsinermik ammaammat inuiattut nalliuttorsiorneq annikitsoq pivoq.

Tusarnaariat qaaqqusaasut Nuna Asiilasooq aallarniutitut - danskisut - erinarsoqqaariarlugu Hans Lyngep erinarsuusiaa Nuilersup qilaap seqinersuata erinarsorpaat.

Katersugaasivimmi Lemvigimiittumi saqqummersitsinermi eqqumiitsuliat 200-ngajaat saqqummersinneqarput. Taakku amerlanerit uillarnerup Inge Lyngep katersugaasa ilaanneersuupput, taakkulu aningaasaateqarfimmut Kalaallit Nunaanni Eqqumiitsulianik Saqqummersitsivimmik pilersitsisumut tunissutigisimavai. Taamaammat saqqummersitsineq eqqumiitsulianik nuannarisalinnut Hans Lyngep qalipagaanik, titartagaanik, assilialianik qiperukkaanillu tupinnartunik – Danmarkimi, katersugaatit Kalaallit Nunaannut nuunneqarnissaata tungaanut- takuniaanissamut periarfissatsialaavoq – inuusunnerminit suliaanit suliaanut kingullermut ullormi toquffiani atsiorneqartumut.

Ernutaqqiutaa inuulluaqqusisoq

Inge Lynge, ullumikkut 96-inik ukioqartoq, ammaanersiornermut najuussinnaasimanngilaq, ernutaqqiutimili Martine Lynge Lyngesenip ammaanersiornermut peqataasunut inuulluaqqusinissaa isumagaa.

Saqqummersitsineq annertooq Inge Lynge ilaqutaalu – ilaatigut Hans Lyngep ernutaa atuakkiortoq oqalugiartorlu Nauja Lynge – suleqatigalugit aatsaat pisinnaasimasoq katersugaasivimmi pisortap Christine Løvenskjoldip oqalugiarnermini aamma isertuutinngilaa.

Saqqummersitsineq ukiut pingasut missiliorlugit pilersaarusiorneqarpoq.

- Christine Løvenskjold 2023-mi Naalakkersuisup illuani ukiortaarsiornermi naapikkakku aallartippoq – saqqummersitsinissarlu isumassarsiarivarput, Nauja Lynge oqaluttuarpoq, meeraanerminilu Hans Lynge peqatigalugu misigisani oqalugiarnermini eqqaavai.

- Hans Lynge peqatigigaangatsigu takuneqartutut asaneqartutullu misigisarpunga, tamannalu inuttut kinaassuseqalerninnut iluaqutaaqaaq, Nauja Lynge oqarpoq.

Suut tamarmik nalaatsornerinnaanngitsut

Saqqummersitsineq Lemvigimi Kunstmuseumimi takutinneqarsinnaammat nalaatsornerinnaanngilaq. Katersugaasivik eqqumiitsuliortumit eqqumiitsuliornermillu oqaluttuarisaanermik ilisimatuumik Bodil Kaalundimit, Hans Lyngemut qanimut ikinngutaasumit, pilersinneqarpoq. Taakkua marluk ilaatigut Grafisk Værksted, kingusinnerusukkut Nuummi eqqumiitsuliornermik ilinniarfinngortoq, aallarnerpaat, soorluttaaq Nuummi kommunip illuani Hans Lyngep qalipagaanit ikaartitikkanik siullernik tusaamasaasunik sanaartornermi qanimut suleqatigiissimasut.

Hans Lynge kalaallit isiginnaartitsisarfianni Tuukkami, Lemvig Kommunemi Fjaltringimiittumi, aallaaveqartumi, aamma suleqataasarsimallunilu Fjaltringip kujataani Vester Husbymi aasarsiortarfeqarsimavoq.

Saqqummersitsineq Lemvigimi Museet for Religiøs Kunstimi decembarip 14-iata tungaanut takuneqarsinnaavoq. Saqqummersitsineq Christine Løvenskjoldimit aamma eqqumiitsulianik oqaluttuarisaanermik ilisimasalimmit Laila Lund Altinbasimit aaqqissuunneqarpoq. Taakkua marluk Birgit Kleist Pedersen peqatigalugu saqqummersitsineq pillugu quppersakkami Hans Lyngep 1906-imi inunngorneranit 1988-imi toquneranut tunngasunik allattuupput.

Quppersakkami aammattaaq allaaserisaq 24-nik quppernilik atuarneqarsinnaavoq, tassani Inge Lyngep Kalaallit Nunaanni eqqumiitsuliortut annerpaartaannik inooqateqarnini oqaluttuaraa.