KL

DK

Ileqqut ukiumilu nutaami siunertat

Juullisunnilerpoq. Gløggitornissamut, poortugarsiniarnissamut juullimilu puullaaqinissamut piffissanngorpoq. Piffissaq ileqqunut immaqalu eqqissisimaarnissamut nerersuarnermullu atorneqartartoq. Juulli ileqqorpassuarnik aallussiffiusarpoq, tamannalu annermik nerisassani takuneqarsinnaavoq. Illuatungaanik ukiortaaq nutaaliornermik nalunaarfiussaaq – imaluunniit??

palle christiansenip isumaliutersuutai
Saqqummersinneqarpoq

Juulli inuit amerlanerit assigalugit qilanaaraara. Ileqqut tamaasa, katerisimaarneq ukiullu ulapissimaffiusup kingorna qasuersaarneq pillugit. Juullip kingorna ukiutoqassaaq. Nuannanneq tamanit pingaarnerpaaq. Nuannanneq ukiumut qaangiuttumut kingumut ukiumullu tulliuttumut qiviarfiusoq.

Ilaqutariittut juullertarnerput ileqqunik malinneqqissaarluta ingerlattarparput. Piffissaq kingulleq tikillugu sulisarpugut, taavalu tuaviinnaq pisiniarfilereriataartarpugut. Aappaagu sioqqutsilluta ulapikkumaarluta ukiut tamaasa oqartarpugut. Tamannali suli iluatsinngilaq. Immaqa ileqquuvoq. 

Danmarkimi nunatsinniluunniit juullisiussanersut apeqqutaatillugu nerisassat aalajangerneqartarput. Danmarkimi nerisassat tassaapput tamanut puulukimineq siataq angajoqqaanullu qeerlutooq. Nunatsinni juullisioraangatta tuttu siataq ilanngullugu nerisassiarineqartarpoq. 

Juullimi tuttumik siatsinerup naamanissaa kalaallit juullimut eqqaamasaannut ilaanerpaagunarpoq. Taava juulli nalliuttoq naluneq ajorparput. juullimut kaagiliat angerlarsimaffitsinni decembarip annersaani naamaneqarsinnaasarput, taamaammat iffiorumatuumik nuliaqarama iluatsitsivunga.

Juullisiornitsinni peqqinnartunik nerisassaqarpa? Naamik. Tassa taamaappoq. Juullimi nerisartakkagut puallarnarput, naammattorsuarmillu nerineqartarlutik. Tamanna ingammik decembarip naalernerani malugineqarsinnaavoq, peqilluni kamippaat singiinik qilersiniaraanni sapernakujuleraangat. Januaarimili nerisassat peqqinnarnerulerlutillu nerisassat annikinneruleraangata tamanna imminut aaqqittarpoq. Tassami pilersaarutaavoq.

Qangatut tunissutisiarpassuarnik pisiniarlunilu aningaasanik amigaateqalerluni juullertarneq atorunnaarsipparput. Kissaatit allassimaffiannit pileritsaassiinnarluni pisineq nuannerunnaarsimasoq isumaqarpugut. Kikkut tamarmik suna pissanerlugu nalunngilaat. Taamaammat maanna kissaatit allassimaffii peerneqarput, tunissutisiallu ikinnerungaartut tupaallaataaqqilerput. Nuannernerungaarlunilu eqqissinarneruvoq.

Amerlasuut aamma ukiortaami ataatsimik arlalinnilluunniit anguniagaqarneq ileqqoraat. Amerlasuut sanigornissartik, pujortartarunnaarnissartik allalluunniit januaarip aallaqqaataanut kinguartinnagit ingerlaannaq iliuuseqarfigisariaqaraluakkatik anguniarlugit ukkatarisarpaat. Uanga nammineq ukiortaami anguniagaqarneq pingaartinngisaannarpara. Allannguuteqartariaqartoqaraangat ingerlaannaq iliuuseqarfigisarpakka. 

Periarfissaq tamanna ukioq manna apriilip naanerani qaratsakkut aanaartoorama iluaqutigaara, tamatumalu kingorna akiortariaqarsimavara. Angerlarsimaffitsinni annertuumik allannguisariaqarpugut, uangalu nammineq siornatigut suliuarsimanera unitsittariaqarakku maanna suliffimmi ”taamaallaat” ullormik ataatsimik nalilimmik sulilerpunga. 

Ukiortaami anguniagassatut ilissinnut siunnersuuteqassagaluaruma tassaassagaluarpoq timip maluginiartariaqarneranik aallu naqitsinerata appasinnissaanik qulakkeerinninneq. Taamaanngippat ajortoqalersinnaavoq. 

Danmarkimi, Hillerød Hospitalip ungasinngisaani, najugaqarama iluatsitsivunga, tamannalu annassutigaara. Sisimiuni najugaqarsimagaluaruma qularnanngitsumik allaaserisaq una allassinnaassanngikkaluarlugulu kigutileriffiga isumagisinnaanavianngikkaluarpara. 

Suut tamarmik ukiutoqqamut kingusinnerusumulluunniit kinguartinneqartariaqanngitsut oqariartuutigaara. Peqqissutsit maannakkorpiaq pingaaruteqarpoq. Aap naqitsinera qaffasippat, oqimaappallaaruit pujortartaruilluunniit. Maannakkut iliuuseqarit. Tamanna iluaqutigissavat.

Inuppassuit amigaateqartmata aamma eqqaamajuk. Inuttut aningaasatigullu. Eqqaamajuk juulli tassaasoq piffissaq taakkununnga aamma ammaassiffissaq. Tamanna TV-mi isiginnaakkatut, tassa nunarsuarmi tamarmi ajunngitsuliornerit pissutigalugit suut tamangajaasa pillugit ilerasuuteqartitsiniaanertut, paasineqassanngilaq. 

Nunarsuaq tamaat annaanneqarsinnaanngilaq, ingammik kisimiilluni. Kisianni annikitsutigut iliuuseqartoqarsinnaavoq. Assersuutigalugu Ukrainemi qimaasunut aningaasanik tunissuteqarpunga, Ukrainemiullu qimaasut arlallit kigutileriffinni isumagisarpakka. Tassa iliuuserisinnaasakka.

Sumiikkaluartutit juullimi nuannaarnermik ukiortaamilu pilluarnermik kissaappakkit – ileqqut ukiortaamilu anguniagaqarnerit apeqqutaatinnagit.

jul samfund palle christiansen nytår kulturi kultur klumme

ATORFIIT Se alle jobs

Powered by Labrador CMS