Arfininngornerup unnukkuani Illorpumukaarusaarpunga. Ukioq isseqisoq nalliukkiartormat sila taarsiaartaleriartorpoq.
Illorpumi oktobarip qaammataa tamakkerlugu arfininngornikkut aliortualersaatitsisoqartarpoq.
Arfininngornerup unnukkuani Illorpumukaarusaarpunga. Ukioq isseqisoq nalliukkiartormat sila taarsiaartaleriartorpoq.
Illorpumi oktobarip qaammataa tamakkerlugu arfininngornikkut aliortualersaatitsisoqartarpoq.
Aqqutaani ingerlarusaarninni suut oqaluttuat tusarumaarnerlugit eqqarsaatigerusaarpara, oqaluttuarlu tusareersimasara eqqarsaatiginngitsoorsinnaanagu.
Tusarusuppiuk?
Angut suliffimini qaangiuttoorsimalluni unnukkut kingusissukkut angerlarpoq. Qaangiuttooqqilluniaasit. Ukiuuvoq silalu taarluni. Apulli qaammaqqutaavoq. Angutip iserami isiginnaarut siorsuttoq tusaasinnaavaa. Inimukarpoq aappanilu isiginnaarut tunullugu nalaasaarfimmi sinittoq takullugu. Angut ingerlaannaq innarusuppoq aappanilu tutikkusullugu. Nalaasaarfimmiit kiveriarlugu siniffimminnut nuunnialerpaa. Timaa sinikkami oqimaannerusuusisoq malugisinnaavaa. Natersuartaaminni pisuppalua isiginnaarullu kisimik tusarsaapput. Inaannullu iserniarsarisoqarpaluttoq angutip tusaaleriataarpaa. Toqqissisimanngilaarluni anersaartorpoq, kinami alla iserniarsarissagami? Taanna aappanilu kisimiillutik tassani najugaqarput. Matuersaatit matumik ammarsiniarsarisut tusaasinnaavai.
- Immaqa arlaat kukkulluni iserniarsarisoq. Angutip paatsuunganini isumassaqartinniarsaraa. Aappani suli kiveqqagaa matu ammarpoq. Majuartarfiit qullia siulliulluni erserpoq aappaalu nuilluni. Aapparmi kavaajaa tungujortoq aaqqataalu puisip amii qernertut ilassisariaasialu ingerlaannaq ilisarai.
Nalunaaquttap nikeriarnerani susoqarnersoq paatsiveeruppaa. Piviusoq paasileramiuk eqqarsarpoq.
Kinaana paarigiga?
Quilertaammeqaluni arnaq kissumiakkani qiviariartuaarpaa. Kiinaa qarsungavoq isaalu takujuminaallutik. Paarisaata toqqarlugu isigiutigalugu oqarpoq: Alaa.
Qungujuppunga eqqarsaatigalugulu oqaluttuat taamaattut uagutsinnut inuiannut qanoq isumaqarnersut. Uannut ataatsimuualaarnertut nuannersutut sunniuteqartarput, naak oqaluttuarineqartut qiiaamminartuugaluartut. Pissusitoqaq inunnik ataatsimoortitsisartoq.
Aaqqissuussap aallartinnissaa minutsinik qulinik sioqqullugu Illorpumut apuuppunga. Ulikkaangajareersimavoq. Qulliit qaminngapput inersuarlu naneruutinik iikkamullu seqersittakkami kissarsuut ammaannartoq ikumatitaq ingerlarusaartoq qaammaqqutaapput.
Eeq, eqqarsarpunga seqersittakkallu tungaanut saallunga ingillunga. Inuit kaffisorput, tiitorlutik kaagisuutigalutik.
Utoqqaat angerlarsimaffiat
Illorpumi sulisup mikrofuuni tiguaa tikilluaqqusillunilu. 'Kikkulluunniit oqaluttuarsinnaasut' nassuiaavoq.
- Kinaluunniit oqaluttuarsinnaavoq, uangalu qeratavallaarunnaarumalluta aallarniisinnaavunga, oqarpoq.
Illorpumi kaluittarnera eqqumaffigeqqullugu siulliullugu oqaatigaa.
Illorput pisoqaammat aliortukkat katersuuffigisimassagaat quilertaammerlunga eqqarsaatigaara. Ersiummerlunga ini qimerloorpara. Inuit qungujulapput alianaarsaarujoorpasillutillu.
Arnaq oqaluttuarluni aallartippoq, oqaluttuaa utoqqaat angerlarsimaffiannut tunngassuteqarpoq. Sulisup sullitami nammineerluni nikippiarsinnaanngitsumut misigisaa oqaluttuaraa.
- Sulisup arnaq taanna utoqqaq paaqqutarikulavaa. Ullut ilaanni inaanut iserpoq siniffialu sakkortuumik sajuttoq malugalugu. Suleqatini aapallappaa ikioqqullunilu. Arnap utoqqaap siniffik sajutsinngikkaa ingerlaanneq malugaat. Siniffik nammineq sajuppoq.
Tusarnaariat ilaat arnaq issiavimmini nikeriarpoq qungujullunilu.
Oqaluttuartoq nangippoq:
- Arnaq taanna utoqqaq eqqumiitsumik misillerfigineqartareerpoq. Ullut ilaanni arnaq taanna naalungiarsuttut peqilluni innangasoq sulisup takuaa. Nuannaraa, taanna isumaqarami arnaq utoqqaq inuunerup aallartinneranut utertutullusooq ittoq, tassa inoorlaatut inissisimammat. Sulisup sivisuumik isiginnaarujooriarlugu inaanit anivoq. Inaanit anereerluni malinneqarluni tusaasinnaavaa. Sulisoq tunumut qiviarpoq, takusinnaallugu arnap utoqqaap sukkasuumik paarngorluni malikkaani.
- Iiih, eeeq, tusarnaartut nillerrapput.
Inuusaq
Arnap allap talini siaarpaa mikrofuunilu tigujumallugu.
Issiavinnut ingilluataartiterpunga, ilorrisimaarsuaarlunga oqaluttuallu tullianut piareerlunga. Arnaq inuusaq pillugu oqaluttuarniarpoq.
- Anaanaga pillugu oqaluttuarniarnanga maannartinnanga aalajangerpunga. Arfininngormat kingullermi oqaluttuareerlungalu ullut tullii marluk napparsimavunga. Sakkortuvoq, aalajangerneralu attappara isumaqarama anersaapiluit pisooqataasut. Inuusaarannguaq pillugu oqaluttuaannassaanga. Saarlormiuuvunga. Nunaqarfimmi Pilersuisoq pisiniarfeqarpoq. Aataga niuertuuvoq. Eqqaamavara decembariusoq sapaassuillu aallartereersut. Pisiniarfimmut iseraangami inuusamik takujuaannarpunga. Inuusat kalaallisuunik atikkersukkat imusunik nujallit nuannarineqarluarput. Inuusaq takugakku pilerigilluinnalerlugu eqqaamavara. Taamani mikivunga. Inuusaq taanna perusulluinnarlugu eqqaamavara. Juulli nalliuppoq poortukkanillu puuiaavugut. Pissara takusinnaavara, inuusaasorlu kusanartoq eqqoriarsinnaallugu. Kisimiillunga ininnukarpunga, kisimiillunga puuiarusukkakku. Inuusaq paarilluagassatut misinnartoq. Ammarakku nuannaajummerujussuarlunga inuusaq eqippara. Eqikkakku assaaqqaminik tiguaanga. Tupangaarama natermut igeriuppara.
- Inuusaq ininniit qimaasoq takusorivara. Aanama tiguaa qiortarlugu aserorlugu. Inuusaq najungasoqalersimasoq aserorternerani takusimallugu oqarpoq.
- Eeeed, uuha, inuit quilertallutik illarput.
Qilaap nunarsuullu akornanni allamik peqartoq misigalunga Illorpumiit ingerlavunga. Kinaluunniit ilimaginngisamik ersinartumik misigisaqarsinnaasoq.
