Iluatsitsivunga

- Takornariartukka pulaartoraakka. Uangalu qaaqqusisuuvunga.

M/S Sternami, Targa 37+-imi 38 fodsitut takissusilimmi aqqaneq-marlunnillu ilaasoqarsinnaasumi 62-inik ukiulik Erik Palo Jacobsen aquttuuvoq. Tassaniikkumaneruvoq. Immamut, qaqqanut qilammullu isikkiveqarluni.

- Allaffinnik isikkiveqarnermiit isikkiviit taakku isikkivigiumaneruakka, Erik Palo Jacobsen, umiatsiani imminut tatigilluinnarluni illoqarfissuarmiit qimagulluni Qinngorput tulattarfianiit aquutigalugu, oqarpoq.

Taanna ukiut kingulliit 16-it Arctic Boat Charter A/S-imi pisortaavoq, piffissarlu suliffissani nammineq aalajangersinnaavaa. Takornarissanik angallassinermi naalakkatut misilittagalittut ukiut ingerlanerini tusaamaneqarlualersimavoq, nunatsinnilu takornariaqarnerup inerisarneqarnera pillugu isummani eqqarsaatersuutinilu ammasumik oqaatigisarpai. Visit Greenlandip siulersuisuini ilaasortassatut Naalakkersuisuniit upernaaq manna toqqarneqarpoq.

Erik Palop maannamut inissisimaffianut aqqut misilittagaqarusunnermik angalarusunnermillu pilersinneqarpoq. Aammali pikkorissarnissamik angerlarsernermillu.

Københavnimi inunngorpoq, tassani ataataa ilinniartitsisunngornialeruttortoq. Ataataa danskiuvoq, 1950-ikkunnilu Kalaallit Nunaannut, balloninik silasiutinik aallartitsisartuusussaalluni Aasiannut tikippoq. Nammineq qimmeqalerpoq, Aasiaallu eqqaani qimussertarlunilu assiliinermik soqutigisaqarami nunaqarfeeqqarni ilaqutariippassuit illuisa issunit qarmagaasut saavini assilisaqattaartarpai. Erik Palop arnaa Innalimmeersuuvoq, siullermillu angutaata qimmiaraataanut, kingornalu piginnittuanut asannilerpoq.

Angajoqqaavi ilinniartitsisunngorniareernerup kingorna Erik Palo inoorlaajusoq aleqaalu Lili ilagalugit Kalaallit Nunaannut uterput, tassa Kapisilinnut, tassani ataataa atuarfimmi aqutsisutut atorfinissimavoq. Kingorna, Erik Palo arfinilinnik qaammateqartoq, ilaqutariit, maanna nukaanik Mikimik ilasimasut, Sisimiunut nuupput, Erik Palolu tassani atuarpoq. Tassaniinnermini kalaallinik danskinillu siuaaqarnini malugaa.

- Aappariinnimi assigiinngitsunik inunngorfilinni peroriartorpunga. Immikkuullareqaaq; Kulturit tamaasa paasivakka, tamaasaku peqataaffigaakka, oqaluttuarpoq.

Taamatuttaaq 1970-ikkunni sumiuunerminik toqqaanissaanut arlallit isumaqarput.

- Taamaaliorumanngilanga. Namminiorusullungalu siusissumi aalajangerpara, Erik Palo Jacobsen oqarpoq.

Qimminik qimuttunik piginnittoq

Meeraalluni siusissukkut qimminik qimuttunik paarsinissaminut akisussaaffilerneqarpoq.

- Suliarujussuuvoq. Qimmikka nuannareqigakkit ullorpassuit qimussersinnaasarpunga. amerlanertigut kisimiittarpunga. Tunuarsimaartuuvungali pinngortitamiikkaangamalu eqqissisarlungalu pilluartarpunga, eqqaamasalersaarpoq.

Erik Palo ataatsimik ugguaateqarpoq, tassami kalaallisut oqaatsini annaasimallugillu ilikkaqqinnissai ajornakusoortippai. Meeqqat atuarfianni qallunaajaqqani atuarpoq angerlarsimaffimmilu ilaqutariit danskisut aamma oqaluuttarput, tassami meeqqat qaffasissumik ilinniagaqassagunik danskisut oqalussinnaanissaat angajoqqaavisa pingaartippaat. Aammalu oqaatsit arlallit piginnaasaqarfigineqarsinnaanngitsut.

- Taamaattoqarsinnaasoq ullumikkut nalunngilarput. Oqaatsit amerlanerusut ilisimagaannimi oqaatsinut pikkorinnerusoqalersarpoq. Uanga meeqqakka pingasuinnik oqaaseqarput, Erik Palo Jacobsen, inuusuttuaraalluni danskisut oqaluttarnini pissutigalugu qinngasaagaasarsimasoq, oqarpoq.

Sisimiuni Minngortuunnguup atuarfiani ilinniartitsisuni pikkorinnerarlugit malitassaanerarlugillu nersualaarpai.

- Pikkorinnerulernissannut kajumilersippaannga, Erik Palo oqarpoq.

Taanna 8. klassinngortussaasoq angajoqqaavi ilinniaqqissammata ilaqutariit Danmarkimut aallarput. Tassanilu Erik Palo Vestebromi Matthæusgades skolemi ukiumik ataatsimik angajulliunerusunut nuussasoq ilinniartitsisut isumaqartut paasinarsivoq. Taamaammat taamanikkut anden realklassetut taaneqartartumut nuuppoq.

- Tamatumunnga Sisimiuni ilinniartitsisukka qutsavissaapput, Erik Palo, meeqqat atuarfiata naammassinerata kingorna ilinniarnertuunngorniarnani paarlaaqateqarluni ilinniartutut USA-mut aallarusulersimasoq, oqaluttuarpoq.

Angajoqqaavi USA-miinnissaminut aningaasartuutit affai nammineq katersorsinnaappagit isumassarsiamut akuersipput. Taamaammat Vesterbromi aviisinik ullaakkut agguaasarpoq.

USA-mi ilaqutariit aminnanniarlutik piniartartut naalagaaffimmi Michicanimiittut najugaqarfigisussanngorpai. Taakku qimuttunik qimmeqarput, Erik Palollu akisussaaffigilerlugillu USA-mi qimusserluni sukkaniunnermut peqataavoq.

USA-meereernermini ilinniarnertuunngornialertussaagaluarpoq. Angalarusupporli, paasivaalu sumiissusersiornermut ilinniarfimmi ilinnialissagaanni meeqqat atuarfiat kisimi naammassineqarsimasutut piumasaqaataasoq.

- Nunarsuaq takorusuppara, tassami nunani allani ivikkat qorsooqqinnerujuaannarput, umiarsuaatileqatigiiffimmi J. Lauritzenimi ilinniarnermut isumaqatigiissummik atsioqateqarluni ukiuni marlunni ilinniartutut umiartorsimasoq, oqarpoq. Kogtved Søfartsskolemi, atuarfimmi soorlu tuluit atuarfiinitut aalajangersimasunik malittarisaqarlunilu ileqqoqartumi, tunngaviusumik ilinniagaqarpoq. Aquttunngorniatut angalareerluni sumiissusersiortutut ilinniarnini Københavns Navigationsskolemi ingerlappaa.

Naalagaq inuusuttoq

Erik Palo Jacobsen ilinniakkaminik naammassigami umiarsuarmi tingerlaatilimmi 45 fodsinik takissusilimmi Imarmut Akullersuarmut takornarissanik angallassisartumi sulilernissaminik neqeroorfigitippoq.

- Tassani nikorfavunga, 22-nik ukioqarlunga naalagaallungalu. Inuusuttoq misigisassarsiorusuttorlu. Misigisaqaqaangalu, oqaluttuarpoq, nangipporlu:

- Tamakkiisumik akisussaaffeqarneq nuannaraara. Umiarsuarmiut ataatama peqatai susinnaanerlutik aperisartut aallaqqaammut eqqumiikkaluartoq.

Misigisassarsiorneq, aamma Suezip sulluani imarmilu aappaluttumi Afrikap Saudi Arabiallu akornaniittumik angalanermik ilaatigut kinguneqartoq misigisaqarfioqisorlu ukiumik ataasingajammik sivisussuseqarpoq.

Taava angerlarsilerpunga.

- Piffissami tassani nuannisarpunga, Kalaallit Nunaalli maqaasivara. Angerlarsimaffik nuannernerpaajusoq paasivara, Erik Palo Jacobsen nassuiaavoq.

Sisimiuni politiit angallataanni inuttanngorpoq ingerlaasaannarlu naalagaq Gustav Olsen, kiisami sulinngiffeqarsinnaalersoq, paarlappaa. Suliffik ajunngikkaluartoq, inuttallu Erik Palop kissaataatulli qaffasissumik suleriuseqaraluartut, ajortoq annertooq ataasiuvoq: Aningaasarsiat. Sapaatini sulisarnerit tapeqarnerat iluaqutaanngilaq – tassami tapi akunnermut 78 øriusoq paasinarsivoq. Taamaammat aningaasaqarneq ataqatigiisikkuminaappoq, ingammik Erik Palotut Sisimiuni illumik anginngitsumik pisisimagaanni.

- Qaammat naagaangat aningaasaateqanngisaannarpugut. Qujanartumilli aalisartaratta nerisassaqartarpugut, oqaluttuarpoq.

Erik Palo Jacobsen politiini suliunnaarpoq. Umiarsuarmi ingeniøritut ilinniaqqikkusuppoq. Sisimiuniinnermini Rosa, timimik sungiusaasutut Aarhusimi ilinniartoq, naapissimavaa. Taamaammat Danmarkiliarpoq, Helsingør Teknikumimut, aappariillu ineqatigiilerlutillu siullermeerlutik meerartaarput, ernerat Mala.

Allaffeqarfik

Rosa ilinniarnermini naammassigami ilaqutariiaqqat Kalaallit Nunaannut uteqqinnginneranni misilittagaqaqqaarusuppoq.

Taamaammat Erik Palop umiarsuaatileqatigiiffik suliffiginikuusani J. Lauritzen, ukiuni taakkunani 1990-ikkunni, Kalaallit Nunaannut angallassisarnermi containerit umiarsuillu containerinik assartuisartut nutaaliat tunngavigalugit assartuisarnermut periusissamik nutaamik pilersaarusiortoq, saaffigeqqippaa.

- Ingeniørimik amigaateqarnersut aperaakka, ingerlaannapajaarlu sulilersinneqarpunga, Erik Palo Jacobsen oqaluttuarpoq.

Royal Arctic Line A/S (RAL) J. Lauritzen pingaarnertut piginnittoralugu Namminersornerullutillu Oqartussat ikinnerussuteqarlutik piginnittoralugit 1993-imi januaarimi pilersinneqarpoq. Erik Palo 1993-imi marsimi ilinniarnermini naammassivoq, RAL-illu allaffini Nuummi ammarmagu Rosa Malalu ilagalugit nuuppoq.

- Rosa Sanami sulilerpoq, ukiumilu ataatsimi marlunniluunniit maaniikkusuppugut (Nuummi, aaqq.). Sisimiormiutummi misigisimavugut. Maanna ukiut 30-it sinnerlugit qaangiussimalerput, Erik Palo illarpoq aappariillu maanna nuummiuunerugunartut ilanngullugu oqaatigaa.

!993 naalersoq paniat Inaluk inunngorpoq.

Erik Palo Royal Arctic Linep nunaqarfinnut assartuisartut umiarsuaat inuttaallu akisussaaffigalugillu containerit atorlugit nioqqutissanik assartuisarnerup issittumi atukkanut naleqqussagaanngitsup naleqqussarnerani pingaarutilittut inissisimavoq. Ukiulli arfinillit qaangiummata avalalluni angalarusuleqqippoq.

- Immameeqqinnissara maqaasiuaannarpara. Allaffeqarfinni ilorrisimaarnerpaaneq ajorpunga. Namminersulerusuppunga aamma, oqaluttuarpoq.

Ingeniøritulli namminersortutut siunnersuisutullu iluatsivinngilaq, saniatigullu suliffeqartariaqarpoq.

Inuuneq eqqarsaatigeqqillugu

Erik Palop fooroqalereerluni inuunini sumut atorniarnerlugu eqqarsaatigilerpaa.

Inuiaqatigiit ilinniagaqarnissamut akissarsiakkaanissamullu naatsorsuutaat eqquutsereerpai.

Kisianni:

- Pilluarnanga nassuerutigaara. Suliartornissara nuannarinnginnakku ullaakkut isumaluttarpunga, oqarpoq.

Erik Palo Pinngortitaleriffimmi ukioq ataaseq sulereerluni suliffissaq pillugu sillimmasiisarfimmiit saaffigineqarpoq. Aningaasarsiassattut piumasaqaatit qaffasingaarmata naameertussanngorlugit oqaloqatiginnikkiartorpoq. Akuerivaalli. Taava angallatinut sillimmasiisarfimmi ukiualuit sulivoq. Aningaasarsiagissaaraluarluni namminerlu suliffeqarfimmini Palo Marinemi siunnersuinermik suliaqarnissaminut piffissaqarluartinneqaraluarluni sulinini nuannersutut eqqaamasaqarfiginngilaa.

- Atugarissaarpunga, qujamasuttussaagaluarpungalu. Taamaanngilarli. Suliffinni pilluanngilanga. Taava soraarpunga, oqaluttuarpoq.

Kingorna pillualeqqippoq.

Aasianniut siunnersuiartornermini angallatinik tuniniaavimmi Yama-Tekimi Nuummiittumi Claus Kuka Christoffersenimiit sianerfigitippoq.

- Akiliisitsilluni angallassinermut suliffeqarfimmik aallartitsissannginnersugut aperaanga. Targa 37+-imik angallatilerluta. Angernersunga naameernersungaluunniit erngerluni paasiumavaa, Erik Palo Jacobsen oqaluttuarpoq, nangipporlu:

- Angerpara.

Erik Palop angernermigut sulisarnini inuuninilu allanngortippai. Suliffeqarfik Arctic Boat Charter Yama-Tek 50 procentimik Erik Palolu 50 procentimik piginnittoralugit pilersinneqarpoq.

- Kukap sianerfiginikuummata suli maannamut qujamasuutigisarpara. Ingerlatseqatigiiffimmi aaqqissuussivugut, pitsaassuserlu qaffasissoq ilisarnaatiginiarlugu isumaqatigiippugut, Erik Palo oqarpoq.

Siuttuusoq

Targa 37+ immikkut sanatitaq timmisartut issiaviinik nikisinneqarsinnaasunik aqqaneq-marlunnik issiaveqartoq M/S Sternatut ilisimaneqarlualerpoq.

Atia Sterna tassaavoq latinerisut imeqqutaalaq, taannattaarlu suliffeqarfiup ilisarnaataani aamma takuneqarsinnaavoq.

Erik Palo suliaqarfimmi ullumikkut sullissisorpassuaqartumi assigiinngitsutigut siuttuusimavoq.

- Siullersaallunga arnanik inuttaqarpunga. Sivisuumilu kisiartaallunga. Uangattaaq siullersaallunga angallammi igalaat salittarpakka, oqaluttuarpoq.

Erik Palop inuuneq nuannarisani inuunerissallugu aallaqqaataaniilli kissaatigaa. Tamanna ilaatigut pissutigalugu unammillertimi ilaat assigalugit angallatinik amerlanerusumik piserusunnanilu Targarpassuaateqarusunngilaq.

- Naamik, umiarsuaq una atorlugu avalattassaanga. Angallatit amerlanerussappata allaffeqarfimmi nuannarinngisanni suliinnaqinaanga, oqarpoq.

Tamatumunnga taarsiullugu isikkivini allanngorartuartoq silaannarissuarlu ullut tamaasa nuannarisarpai. Erik Palop oqarneratuut pisuunngussutiginngilaa, pisuunngornissanili anguniagarinngilaa. Kaaviiaartitaqarsinnaappat angalanissaminullu akissaqaruni naammagaa.

- Naleqartitakka aningaasaniinngillat. Ilaasukka nuannisartikkumallugit sapinngisannik sullissisarpunga. Qaqqat, pinngortitaq kulturilu oqaluttuarisarlugillu ilaasukka isaatigut isigalugit suminngaanneernerinit oqaluttuaqqusarpakka. Takornariartitsineq taamaattoq nuannaraara, Erik Palo oqarpoq, taassumalu ukiualuit matuma siorna Yama-Tek ingerlatseqatigiiffimmiit pigittuujunnaartillugu piginneqatigiissutai tamaasa pisiarai.

Sammisat assigiinngitsut, soorlu fish’n’dish, ilaasut unnukkorsiutissaminnik nammineq aalisariarlutik Qooqqunut neriartortarnerat, isumassarsiarai. Periuseq iluatsillunilu allanit aamma ilaarneqartalerpoq. Erik Palop ilaarsisut qinngarinagit allanik isumassarsiortarpoq.

- Siuttuujuarnissaq pingaartippara. Piumassuseqarnaraara. Sammisassaasinnaasunillu isumassarsiarpassuaqarpunga. Taamaammat aallartitassarpassuaqarmat nunatsinni takornariaqarneq pillugu isumalluarpunga, oqarpoq.

Nuannarisani aalluppai

Takornarialerineq Arctic Boat Charterimut Erik Palo Jacobsenimullu februaarimiit novembarimut ingerlasarpoq, taamaammat Rosalu qaammatini pingasuni nunani allaniinnissaminnut piffissaqartarput.

Nuannarisanilu aallullugit. Soorlu paragliding, aarsaarneq. Timersuut inuunerminik allannguigami soqutigilikkani.

- Paragliding, aarsaarneq nuannarinerpaasaraara. Isikkat nunamiit qangattarnerat misigisani nuannernerpaavoq. Timmissatulli kiffaanngissuseqalertarpunga. Sooq qarlortarnersut paasisinnaavara, oqarpoq, taannalu ullumikkut ilitsersuisut ingerlatsisuattut allagartaqarami marluulluni aarsaarnissamut akuersissuteqarpoq.

Timersuut immikkuullarissoq aqqutigalugu nunani tamalaani immikkuullarissunik misigisaqartarpoq. Minnerunngitsumik Colombiami, tassanimi najukkami aarsaartartut aarsaaqatigissallugit nuannarilluinnarpaa.

- Colombiamut ukiut arfineq-marluk tulleriit aarsaariartarpunga inuillu naapittakkakka inussiarnertuaannarput. Nuna qulaaniit isiginnaaraanni anorip sammivia malillugu sumulluunniit mittoqarsinnaavoq, miffimmilu inuit naapitassarinngisaraluit naapinneqartarput, Erik Palo, periarfissaqarnini tamaasa nunatsinni aamma aarsaartartoq, oqaluttuarpoq.

Nuannarisaa alla, COVID nalaani aallartissimasaa, tassaavoq qamuteralanneq. Taamatuttaarlu suliffeqarfiuteqarnermisuulli aarsaartarnermisullu pimoorussitigaaq.

- Nuummi qamuteralanniaraanni aqoriaatsit timimut ilungersunarsinnaasut pisariaqarput. Pissanganarluinnarlunilu, kiallunilu ilungersunarpoq, kisianni isikkivik kusanarnerpaaq tikinneqartarpoq, oqarpoq.

Suna tamaat isigigaanni inuunermini killiffigerusutaminiippoq.

- Atugarissaartutut misigisarpunga. Suliassat nuannersuinnaat suliarisassallugit ukiorpassuit matuma siorna aalajangerpunga, akilersinnaasorlu paasivara. Nuannaaraangamami ilaasukka nuannaartarput, Erik Palo Jacobsen naqissusiivoq.