Imminut toqunnissamik pinaveersaartitsineq pillugu piviusulersaarusiamik takutitsinikkut pikialaarneq aallartissasoq
Pingasunngorpat unnukkut Nuuk International Film Festivalip arfineq-pingajussaanik ingerlanneqarnera aallartissaaq. Filmi ammaanersiutaasussaq tassaavoq „Life on the Edge“, imminut toquttarnerup pinaveersaartinnissaa pillugu piviusulersaarut.
Filmi „Life on the Edge“ imminut toquttarnerup pinaveersaartinnissaanut tunngavoq, ukioq mannalu Nuuk International Film Festivalimi filmi ammaanersiornermi takutinneqassaaq.
Assiliisoq: Anima Films, Next Door Films, Inuvik Productions
Ukioq manna filmit pillugit pikialaarnermi ilaatigut imminut toquttarneq eqqarsartaatsikkullu peqqissuseq pillugit oqaloqatigiinneq ajornakusoortoq pissaaq.
Filmit pillugit pikialaarnermit ilisimatitsissutigineqarpoq filmi ammaanersiutaasussaq tassaasoq “Life on the Edge”, Aqissiaq Nuka Semsenip imminut toquttarnermik pinaveersaartitsinermik suliaqartup inuuneranik oqaluttuaq:
- Misigisarput tassaavoq inuusuttunik utoqqarnillu misigissutsikkut attorneqangaarluni oqaloqateqartarnera; oqaloqatigiinnerit nammineq ajornakusoortitai, namminerli misigisimasamigut pisariaqartinneqartutut paasisimasai, filmi ammaanersiutaasussaq pillugu Nuuk International Film Festival tusagassiuutinut nalunaarummi allappoq.
Filmi tuluit kalaallillu filmiliortartuinit sananeqartoq Kalaallit Nunaanni takuteqqaarneqassaaq.
Pisortaq killitsingaarsimasoq
Pikialaarnerup pisortaata Pipaluk K. Jørgensenip filmi takugamiuk killitsingaarsimalluni oqaluttuarpoq:
- Ilaatigut inuit aallussilluartut, soorlu Aqissiaq Nuka Semsenip, nunatsinni imminut toquttarneq pinngitsoortinniarlugu ullut tamaasa sulinerat malugalugu killitsinnangaarmat, aammali imminut toquttarneq suli qanoq ajornartorsiutaatiginersoq filmimi eqqaasinneqaratta, taanna oqarpoq.
Ukioq manna pikialaarnermi eqqarsartaatsikkut peqqissutsip nipangiusimatinneqanngisaannarnissaa tunngavilersorneqarumaartoq, aamma filmiliorneq ajornartorsiummik annertuumik ilaqutariippassuarnut sunniuteqartumik qulaajaaqataasinnaasoq, pikialaarnerup pisortaa nassuiaavoq:
- Taamaattumik “Life on the Edge” filmitut ammaanersiutissatut toqqarniarlugu pikialaarnerullu ilarujussua inuunermi annernartut pillugit oqaloqatigiinnermut atorniarlugu aalajangernissaq ajornanngissimaqaaq, Pipaluk K. Jørgensen oqarpoq.
Filmit assigiinngitsorpassuit
Filmimik ‘Life on the Edge’-mik filmiliortut, suliniaqatigiiffimmit Paarisamit aallartitat filmiliornermi misissuinermut peqataasut kiisalu Aqissiaq Nuka Semsen pingasunngorpat unnukkut filmip takutinneqarneranut atatillugu najuutissapput.
Filmit pillugit pikialaarneq arfininngornerup tungaanut ingerlassaaq, soorunamilu filmit assigiinngitsut takutinneqassapput.
Filmi saaminit sanaaq „My Fathers’ Daughter“ sapaatip-akunnerata siuliani Torontomi filmit pillugit pikialaarnermi takuteqqaarneqartoq, naggasiullugu takutinneqassaaq.
Pikialaarnerup nittartagaani pilersaarut tamaat takuneqarsinnaavoq.
