Isiginnaartitsisartunngorniat Canadamut angalasut

Isiginnaartitsinermik Ilinniarfimmi ilinniartut sisamat Canadami assigiinngitsunut angalatsiarniarlutik sapaatip akunnerani matumani aallarput.

Isiginnaartitsisartunngorniat taakku sisamat ilaatigut tikeraakkaminni sammisaqartitsissapput, isiginnaartitsisarfinnut assigiinngitsunut isiginnaariartassallutik aamma isiginnaartitsisartunngornianik allanik, isiginnaartitsisartunik ilitsersuisartunillu naapitsisassallutik.

Isiginnaartitsinermut Ilinniarfik, Nunatta Isiginnaartitsinermik Ilinniarfia, tusagassiuutinut nalunaaruteqarluni taama ilisimatitsivoq.

Angalanerminni tikeraaqqaagassaat tassaavoq Iqaluit, Nunavummiittoq, tassani ilaatigut ilinniarfik pulaarneqassalluni.

Iqalunniit ingerlaqqillutik tikeraassavaat Cornwall, Ottawa aamma Toronto.

Isiginnaartitsisartunngorniat Torontomi ilaatigut pulaartussaavaat nunap inoqqaavisa isiginnaartitsisarfiat, Centre for Indigenous Theatre, uaajeernermut Performative Mask Dancemut peqataassallutik, aamma filminik saqqummersitsineq The Toronto International Film Festival – TIFF – misigisassarsiorfigissavaat.

Angalaneranni isiginnaartitsinermik ilitsersuisartoq Connie Kristoffersen aamma ilinniarfimmi allaffissornikkut ingerlatsisoq Arnajaaq Lynge peqataassapput.