Jørgen Chemnitz 2024-mi filmip nersornaasiuttagaanik Innersuarmik tunineqarpoq

Akuttusoorujussuuvoq, nersornaatisisup nammineq nersornaammik pilersitaminik tunineqartarnera. Taamaattoq taamak pisoqarpoq Jørgen Chemnitzimut tunngatillugu. Taannami ukioq manna filmiliortartunut nersornammik Innersuarmik nersornaaserneqarpoq.

Assiliisoq: Film.gl.

Jensine Berthelsen Jensine Berthelsen Tusagassiortoq

Saqqummersinneqarpoq 21. Septembari 2024 - 13:47

INNERSUAQ NERSORNAASIINERIT PILLUGIT NALUNAARSUUT

1. 2013: Tumit Production (Malik Kleist aamma Aka Hansen) (5. maj 2013, Katuaq-mi aaqqissuussami)

2. 2014: Anorak Film (Inuk Silis Høegh aamma Emile Hertling Péronard) (29. december 2014, Ilimmarfimmi aaqqissuussami)

3. 2015-2016: Ulannaq Ingemann (27. februar 2016, Katuami aaqqissuussami)

4. 2017: Marius Olsen (28. januar 2017, Katuami aaqqissuussami)

5. 2018: Marc Fussing Rosbach (23. september 2018 NIFF 2018-imi)

5. 2018: Alanis Obomsawin (Innersuaq nersornaatitaq) (23. september 2018 NIFF 2018-imi)

6. 2019: Aka Hansen (21. september 2019 NIFF 2019-imi)

7. 2020: Nivi Pedersen (19. september 2020 NIFF 2020-imi)

8. 2021: Pipaluk K. Jørgensen (20. november 2021 Filmiliortarfimmi aaqqissuussami)

9. 2022: Angunnguaq Larsen (12. november 2022 YAA 2022-mi Ilimmarfimmi)

10. 2023: Emile Hertling Perónard (14. september Filmiliortarfimmi NIFF2023-mi)

10. 2023: Peter Jensen (Innersuaq nersornaatitaq) (14. september Filmiliortarfimmi NIFF2023-mi)

11. 2024: Jørgen Chemnitz (19. september Filmiliortarfimmi NIFF2024-mi)

Film.gl-ip aaqqissuussaanik septembarip 19-ani ukiumoortumik filmiliortartunut nersornaasiuttagaq Innersuaq tunniunneqarpoq. Nersornaat nunatsinni filmiornermik ingerlatsisunut tunniunneqartarpoq, Nunatsinni filmiliornermi immikkut ittumik maluginiagaqarsimasumut.

Ukioq manna Film.gl-mi ilaasortat aalajangiuppaat Innersuaq 2024 Jørgen Chemnitzimut, filmiliornermi ilisimasalittut pingaarutilittut ilisimaneqartumut tunniunneqassasoq.

Inuk pingaarutilik

Ussassaarut

Jørgen ukiuni arlalissuarni filmiliornermi aqutsinermilu pingaarutilittut inissisimavoq.

- Filmiliornerit aqutsinerillu pilersitseqataaffigisavit saniatigut, ilinniartitsineq ilisimasanillu kajumissuseq atorlugu tunniussisarnerit, filmiliornermi maannakkutittut ingerlataqartunut amerlasuunut isumalerujussuuvoq, taamaattumillu qujassutissaqarfigaatsigit, Nina Paninnguaq Skydsbjerg ilaatigut taamak oqaaseqarpoq Jørgen Chemnitzip nersornaaserneqarnissaanik toqqaanermi tunngavilersuutigalugu.

Filmiliortartunut nersornaasiuttagaq nammineq pilersitarivaa

Qaqutigoortorujussuuvoq nersornaasiuttakkamik pinngortitsisup nersornaammik taassuminnga nammineq tunineqartarnera. Taamaattoq taamak pisoqarpoq Jørgen Chemnitzimut tunngatillugu.

- 2013-imi isumassarsivunga Kalaallit Nunaanni filmiliortartunut nersornaasiisoqartalernissaa pisariaqartoq. Taamaattumik allaffigisanni affarlera kasuttorfigaara, Kujoorlu aperaara Nunatsinni filmiliortartunut nersornaatip ilisarnaatissaanik tunniunneqartartussamik sanasinnaanersoq, Jørgen nersornaammik tunineqarnerminut atatillugu oqaluttuarpoq.

Jørgen Chemnitzip aamma filmiliortartunut nersornaatip taaguutaa, Innersuaq isumassarsiarisimavaa.

- Innersuaq tassaavoq uumasoq mikisunnguaq, immap sinaani uumasuusoq, tassa nunap imallu akornanni uumasoq. Ikiuuttarput imaluunniit muminganik pisarput. Taamatut marloqiusaaneq filmiliortartunut nersornaatip ilisarnaatigaa, Jørgen nersornaaserneqarnermi kingorna nassuiaavoq.

Nersornaasiinermi ataqqinaatip taassumalu takussissartaata, eqqumiitsuliortup Peter Kujooq Kristiansenip ilusilersugaata saniatigut aningaasat 5.000 koruunit tunniunneqarput.