Katuami qiiaamminartut

Asimiitillutit aliortugalersaattunut ilaanikuuit?

Atuarfimminngaanniit Nuup Narsaani ukiorpassuit matuma siorna tammaarsimaarluta aliortugalersaattuni ilaanera eqqaamavara. Ikumaartitsilluta iloqqasunngorluta inuilaarsuarmi unnukkut aliortugalersaappugut. Tunumut qiviaraanni tarrajuttuinnaavoq takusassaqarani, aamma sianerfissaqanngilaq ikiortissarsiorfigisinnaasamik. Nipaannersuaq quilertanartoq kisimi piuvoq. Arlaannik iliorsinnaanngissuseqarneq. Malik Kleistip ersinartuliaa ”Inngili Qernertoq” kulturikkut illorsuarmi Katuami isiginnaarakku taama misigivunga.

Popcorniuserlunga colamik iggisissannik nassarlunga filmertarfiup issiavianut ingilluataartiterpunga, kalaallillu qiiaamminartuliaanni oqaluttuami inuttaasup nammineq immiussai atorlugu sanaaq siulleq takunissaanik piareerlunga. Taama isiginnaagassialioriaaseq ”found footage”-mik taaneqartarpoq. Qiiaamminartuliaq »Paranormal Activity« taama filmiliarineqarsimasuni assersuutissatsialaavoq.

Malik Kleist June Shanna Holmilu filmiliornermi aqutsisuupput, Malik Kleist ilitsersuisuulluni suliamullu isumassarsisuulluni.

Malik Kleist siullermeerluni asimi immiussami qiiaamminartuliunngilaq. Qiiaammianartuliaq nuannarineqarluartoq ”Qaqqat Alanngui” nunatsinni innuttaasut pingajorarterutaasa takunikuusaat asimi aamma immiussaavoq.

Qiiaamminartuliami ”Inngili Qernertumi” isiginnaartitsisartut namminneq aqqi atorneqarput. Filmiliortartoq Malik aappani June ikinngutitillu aappariit Qillannguaq ”Q” Sikkersorlu ilagalugit asimut unnuiartortut malinnaavigaavut. Taakku Nuummi Ukkusissap tunuanut tupermut unnuiartorput.

Filmip ingerlanerani akunneq siulleq pissanganissara amigaatigikujuppara, akunnermimi tassani filmimi inuttaasunut ilisaritinneqarpugut. Ilisaritinneqareermata pissanganarseriasaarpoq. Ilimanareersutut inngili qernertoq aliortuarineqarpoq. Marc Fussing Rosbachip qarasaasiaq atorlugu pissanganarsaarutinik pilersitsisarnera filmimi pakatsinanngilluinnarpoq. Minutsit kingulliit 45-t pissanganangaaramik manngertitarnarput. Ersituujulluni iliuusissaaleqinarluni. Inuttaasut pinngortitami annanniarlutik ikiornissaqaratik angerlarniarsarinerani aqqaamasuusiinnarpunga.

Ilisarnartoq

Malik Kleist ukiut 20-t matuma siornatigut ”Eskimo Weekendimi” inuttaaqataammalli inuttaasoq aatsaat filmimi takuneqaqqippoq.

Isiginnaartutut kina inuttatut pingaarnerunersoq paasiuminaatsippara. Maliua, immiussani Vloggiliani malinnaavigineqartuni immiussisuusoq? Imaluunniit ”Q”? Taannami filmip ingerlanerani ineriartornerpaavoq. ”Q” aallaqqaammut imminut tatiginngeqqaarpoq, suliffeqarani aappaminillu qimataaqqajaalluni. Filmillu ingerlanerani sapiitsuliortunngoriartorpoq ikinngutinilu ajortumut illersorniarsaralugit.

Filmiliaq nammineq kajumissuseq atorlugu aamma immiussaavoq. Sulereernerup kingorna filmimik ilivitsumik suliaqarsinnaanissaq takorlooruminaatsippara. Taamaattumik Malik Kleist suleqataalu nersualaarneqartariaqarput.

Filmip aqqa 'Inngili qernertoq' takugakku Uummannap avannaaniittoq illoqarfik piiaaffik Maamorilik aamma taama taaneqartartoq kisiat eqqaavara. Pakatsissutigisannilli filmimi eqqaaneqanngilaq.

Isiginnaariat filmit ingerlanerani illartarlutillu ersiorput, isiginnaagarlu isiginnaartut peqqutaallutik nuannernerulersarpoq.

Quilertanera pissutigalugu, isiginnaagaralu alarniaannarlugu mobiilera arlaleriarlunga tigusaqattaarpara. Ima ersitigaanga assakka isugutserlutik. Nuan.

Kalaallit Nunaata nunataani peqqarniissinnaaqisumi naakkittaatsumilu ersinartumik arlaannik peqartoq misigalunga filmi naavara. Eeq.