Kunngikkut tikeraarnissaannut pilersaarutit annertuut
Kunngikkut ilaatigut borgmesterit arlallit ilassissavaat, ilaqutariittut arpanneq aallartissavaat, kaffisoriassapput aamma „arfernut mikrofoni“ atoqqaartissavaat.
Kunngikkut juunip 29-annit juulip arfernata tungaanut Kalaallit Nunaannut tikeraassapput.
Assiliisoq: Thomas Traasdahl/Ritzau Scanpix
Tallimanngorpat kunngi Frederiup dronning Maryllu Kalaallit Nunaannut tikeraarnertik aallartissavaat, sisamanngormallu Kunngikkormiut pilersaarutit sukumiisumik saqqummiuppaat.
Kunngikkullu Kalaallit Nunaata kitaata sineriaani avannaanit kujammut angalanissaat pilersaarneqarluarsimavoq.
Arfininngorpat nal. 10.45 Pituffimmi tikeraarnertik aallarnissavaat, tassanilu ilaatigut Naalakkersuisut siulittaasuannit Múte Bourup Egedemit (IA) naalagaaffiullu sinniisaanit Julie Præst Wilchemit kunngikkut tikilluaqquneqassapput.
Tassanngaannit Qaanaamukassapput, tassani kommunip borgmesteria Palle Jerimiassen naapissallugu. Qaanaami timersortarfimmi kaffillertuniissapput, tassani illoqarfimmi innuttaasunit nipilersornikkut kulturikkullu assigiinngitsunik aliikkusersuiffigineqassallutik.
Arfininngorpat unnukkut kunngikkut Aasiannut tikissapput, tassanilu kunngikkormiut umiarsuaannut Dannebrogimut ikinnginnerini Niels Egedep illorsuani nipilersortoqarlunilu qitittoqassaaq.
Nuummi atuarfik nutaaq alakkassagaat
Sapaatiuppat ullaap tungaani Qeqertarsuup eqqaani kunngikkut umiatsiamik angalassapput, tassanilu ’arfernut mikrofoni’ Qeqertarsuup Tunuani miluumasut qanoq amerlatiginerannik paasissutissiissutaasussaq atoqqaartissavaat.
Sapaatiuppat Qeqertarsuup illoqarfiata qeqqani Qeqertarsuaq Race, Family Mile, innuttaasut tamarmik arpaqataaffigisinnaasaat kunngi Frederiup ilaatigut aallartissavaa.
Ritzau naapertorlugu tamanna Danmarkimi illoqarfinni Royal Run-imut atatillugu arpannerit ilagaat, taannalu maajimi kunngip inuuissiornerata nalaani ingerlanneqarpoq.
Qeqertarsuup Tunuanit Attumut Sisimiunullu tikeraarlutik kujammut ingerlaqqissapput, pilersaarutit malillugit juulip sisamaani Nuummut kunngikkormiut umiarsuaannik tulannginnerminni.
Nuummi ilaatigut Atuarfik Inussuk nutaaq aamma mittarfiliorneq aappariit takussavaat.
Kunngikkut tikeraarnerat Kujataani angalanertalimmik naggaserneqassaaq. Arfininngornermi juulip arfernani tikeraarneq naggaserneqassaaq, tassani Narsaq nunaqarfillu Qassiarsuk tikeraarneqassallutik.
Kunngikkormiut nittartagaanni pilersaarut tamaat takuuk.
