Milikartoornermiit qaqqamut qaqinermut

Allornini ataasiakkaarpai. Itisuumik anersaartorpoq.

Immaqa unittariaqaraluarpoq, kisianni apuutiliivippoq. Piumassuseqarnini pissutigalugu ingerlaqqissinnaasimavoq.

Maja Heilmann putsumik avatangerneqarluni Quassussuup qaaniippoq. Nuup asasami tungaanut isikkiveqanngilaq, kisianni kiffaanngissuseq misigisimavaa. Talerpiata tungaa qaammatit arfinillit siornatigut qaratsamigut milikartoornerminit nukillaartinneqarsimavoq. Ullumikkut nikorfavoq. Kiffaanngissuseqarlunilu. Tamanna angalanerup ukiorpassuit tamatuma siorna aallartissimasup naammassineraa.

Meeraaneq, umiatsiartarneq timersornerlu

Maja Heilmann nuummiuuvoq – Nuummi qatanngutimi marluk akornanni akullequtitut arnartatuaalluni inunngorlunilu peroriartorpoq. Qatanngutigiit ukioq ataasiinnaq imminnut nikingallutillu ataqatigiilluinnarput. Meeraanermini Ceresvejimi arsaqattaartarput, katersortarfimmi filmertarlutik akunnerpassuarnilu kangerlummiittarlutik.

- Angajoqqaakka umiatsiaminni paarmortarfeqarput, taamaammat eqqaamasakka siulliit tamarmik immamiipput. Ullumikkut aamma namminerisannik umiatsiaqarpunga, Maja Heilmann qungujulalluni oqaluttuarpoq.

Nuummi inuusuttuuneq nuannersunik katerisimaarnernik ulikkaarpoq, Majalu 25-nik ukioqarluni Danmarkimi Gerlev Idrætshøjskolemi ilinnialerniarluni aalajangerpoq. - Kalaalertatuaavunga, allanngornersuaqaraluartorli misigisaq nuannerluinnarpoq. Timersorneq ataatsimoornerlu — tassa uanga, Maja illarluni oqarpoq.

Højskolereermalli pinngortitaq nutsuivoq – aamma Nuuk – angerlarsimaffia. Maja Kalaallit Nunaannut uterpoq, tassani Utoqqarmiut Kangerluarsunnguani erngup nukinganik nukissiorfimmi sanaartorneqaleruttortumi sulilerluni. Tassani angut taassumatut pinngortitamik nuannarisalik naapippaa. Katipput, marlunnillu ernertaarput, Minik aamma Miki. Ilaqutariittut inuuneq ilusilersorneqarpoq, tamannali kangerluup kiffaanngissuseqarnerullu qimannissanik isumaqanngilaq. Akerlianilli. Pinngortitaq ulluinnarni qitiutittuarneqarpoq – umiatsiaaqqamik angalanerit, silami inuuneq ataatsimoornerlu. Maja Heilmann ernermi ulluinnarni inuuneranni peqataasarlunilu ingerlaannaasaq sisoraatinik sungiusalerpai. Nuummi sisorarfimmi weekendit tamangajaasa unammiuaartoqartarpoq, taamaammat Maja anaanaqatinilu allat aalajaalluni taqussanik qiimmassaatinillu tunioraaniarlutik piareersimasarput. Ullulli ilaanni pissutsit allanngorput. Tassanngaannaq - ernini pinnagit - nammineq peqataasussanngorpoq. 

- Eqqarsaannarpunga: Misiliinnarniarlara. Nuannerpaseqaaq, qungujulluni oqarpoq. Tulliullunga apuuppunga - kisianni peqataaniarluta nalunaartut marluinnaavugut, ilanngullugu oqariarluni illalerpoq.

Majap imminut quiassuaatigisarnera oqitsorsiorneralu nukinnguupput - aamma inuunerup ingerlanerani. Inuuneq pimoorullugu atorpaa, illarsinnaajuaannarporli — aamma imminut illaatigisinnaasarluni.

Aallaqqaataaneernerit

Maja avinnissaq sioqqullugu puallariartulerpoq, imminut aallutileqqinniarluni spinningimik crossfittimillu sungiusartaraluarluni qarmamut aportuusivoq. Puakkut milikartoornerit marluk unitsippaat – timikkut eqqarsartaatsikkullu. Tamatuma kingorna Maja timersorluni sanigorserlunilu aliasunnerminik qaangiiniarsarivoq, arriikkaluamilli imminut tuppallersarluni nerisalerpoq ajuusaartarlunilu. Puallaraluttuinnartillunga aliasukkaluttuinnarpunga, taanna unneqqarilluni oqaluttuarpoq.

121 kilonik oqimaassuseqalerpoq – timi takornartatut akornutaasutullu misinnartoq. Tamanna Majamut inuunini tamaat eqeersimaartumut aalasartumullu nutaatut piviusunngorpoq. Maanna sammisassat siornatigut kiffaanngissuseqarluni sammisartagai peqataaffigiuminaannerulerput. Maja spinningertilluni tunorlernut toqqortalerpoq – timersuummit nuannarigaluakkaminit. Tunuarsimaalerpoq, atisat nerutunerusut taarnerusullu malugineqannginnissani neriuutigalugu toqqartarpai. Sajuttarlunilu sikingasarpoq – soorlu tammaannarusunnerulluni.

- Najuunnera kanngusuutigingajattarpara, Maja nipaatsumik oqarpoq.

Kisimiinngillarli. Spinningeqatigisartagaasa toqqortertikkusunngilaat — kinaassusiami takusarpaat. Atisami iluini orsui pinnagit, inuttaatali kinaassusaa.

- Timigissarneq arnallu peqatiginerat ilutigalugu imminut tatigineruleriartuinnarpunga. Utaqqineqartalernera - takkuttarnermalu qujamasuutigineqartarnera iluaqutaavoq, Maja qungujulluni oqaluttuarpoq. Spinningertarnera kisimi iluaqutaanngilaq. Sivitsunngitsoq arnat aamma ullup qeqqasiornernut, unnukkut nuannisaqatigiinnissamut allaallu ikinngutigiit Playitasimut Fuerteventuramiittumut angalaniarlutik naapittalerput.

Maja aqajaqquni pilatsilluni millisinniarlugu 2020-mi Danmarkiliarpoq. Suliaritereernermini ikinngutinilu aalajangersimasumik spinningertarnermini oqiliartulerpoq. Kiiluilu appariartortillugit aamma allat oqiliartorput: nammatai oqinnerulerlutillu qungujunnerusalerpoq.

Inuit akornaniinnissaminut sapiissusaa piumassusaalu uteqqippoq, sapaatilli-akunnera naagaangat spinningereeraangami, angerlaqatissaqanngikkaangamilu kiserliortarpoq.

- Maximutimi sassaalliisartunngorniarlunga aalajangerpunga. Imerniartarfiliarusunneq ajorpunga, inuilli naapillugit oqaloqatigerusuttarpakka. Naleqquteqqissaarpoq, Maja oqaluttuarpoq.

Maja tallimanngornerit tamaasa aalajangersimasumik sulisalerpoq. Taamaalilluni Grønlandsbankenimi allaffimminit kisimiilluni angerlarnani Maximutimi sassaalliisarpoq. Nuannareqaa.

Milikartoorneq inuunermik allannguisoq

Inuuneq ingerlarsuunnaavippoq - uneriataarporli. Maja unnuit ilaanni annilaangalluni iterpoq. Anersaartorsinnaanngilaq. Anertikkarluni siniffimmit massinniarsaraaq - talerpiali nukillaarsimavoq. Timini aqussinnaanngilaa.

- Ikiorneqartariaqarlunga ingerlaannaq paasivara, Maja oqarpoq.

Ilungersungaarluni oqarasuaatini tigoriarlugu ernini nukarleq Miki sianerfigaa. Telefonili kiisami akimmagu oqarsinnaanngilaq. Oqalunnera paasiuminaappoq, ataqatigiinngilaq.

- Anaana, suit? Anaana, aalakoorpit?“ Anaana, ornilerpakkit! Miki oqarasuaatikkut suaarpoq. Aatsaat tassani paasivara: Qujanarmi ikiorneqalersunga, Maja oqaluttuarpoq. 

Kinguninngua Miki ikiortissarsiorluni sianerpoq, ambulancillu apuupput. Maja ikiorasuarneqarluni ajoqusersimasut nakorsiartarfiliaanneqarpoq. Tassani nakorsaq oqarpoq: Qaratsakkut milikartoorsimavutit. 

– Tassani nalalluni annilaanganaqaaq. Malugisaatit tamarmik atorput. Susoqarnersoq paasisinnaavat – timillu nikissinnaananilu oqarsinnaanngilatit, Maja Heilmann oqaluttuarpoq. 

Maja Heilmannilli ajoqusersimasut nakorsiartarfianniinnermini toqu ersiginngilaa. 

-Timima atornissaa sungiusimajuarsimavara, tassanngaannarli nallangaannalerpunga. Inuunerma sinnera taamatut inuussaanga? Eqqarsaat taanna annilaarnarpoq, Maja oqarpoq. 

Nakorsat neriorsuisinnaanngillat. Maja siornatigutut ileqqissanersoq nalunarpoq. Tamannali akueriumanngilaa. Uteriisilerpoq. Qasusuilluni. Annakkusuinnanngilarmi – inoorusuppoq. 

- Sapinngisannik iliortarniarlunga ilungersulerpunga. Aallaqqaammut ataaseq kisiat pivara: alussaatip kivinnissaa. Ataasiaqqillungalu. Aammalu, Maja Heilmann oqaluttuarpoq. 

Maja napparsimmavimmiit angerlartinneqarpoq. Timaata ilaa nukillaarsimagaluartoq aalasinnaalaaqqilerpoq, naatsumullu pisussinnaavoq. Uissannguvorli, uppinnaveersaarniarnera unammillernarpoq, qarasaalu aallaqqaataaniit ilinniaqqittussaavoq. Inuunermini unammillernarnerpaamiippoq. Kisimiinngilarli. Ernerata Mikip aallaqqaataaniilli najorpaa. Tapersersorlugulu, kajumissaarlugulu isumagisassanik ikiortarpaa – najuunnerinnaalu Majap nakussassaatigaa. Arnat spinningeqatigisartagai ikinngutaalu Rina aamma angerlarsimaffiani utaqqipput. Qularianngillat. Qaammaterpaalunni aggertarput – marlukkaarlutik – marlunngornikkut sisamanngornikkullu. Neriosassiorlutillu, nillataartitsivik immerlugulu Majap aaqqeqqinnissaminik taamaallaat eqqarsaateqarnissaa isumagisarpaat. 

- Tunniusimangaarlutik ikiortarpaannga, Maja, ikinngutini spinningeqatigisartakkani arnat tallimaasut ajornartoornerpaaffimmini ikiuussimasut pillugit killtsisimaqaluni oqarpoq.

Qaqiniarnera

Timaa qaammatit ingerlanerini eqqaasaqartalerpoq. Maja allornerit ataasiakkaarlugit ilisarnarseqqikkiartuaalerpoq. Misigisarli puiguikkiussimavaa – timikkuinnaanngitsoq aammali sianiuteqarfimmigut. 

- Toqqissisimajunnaarlungalu ersisarpunga. Umiatsiannik kisimiillunga avalannissara imaluunniit kisimiillunga angerlarsimanissara saperpara, oqaluttuarpoq anersaarulullunilu. 

Majalli ersisarnini inuunerminik aqutsisuutikkumanngilaa. Inoorusuppoq – sutigut tamatigut. Sunaluunniit qanoq qajannartigisinnaasoq nalunngilaa. Taamaammat imminut anguniagassippoq: Quassussuaq. Qaqqaliarneq arlaleriarluni misigereersimasaa. Tamatumuuna allaaneruvoq. Marlunngornikkut pisuttuaqatigiittartut "Gå væk, kræft" pisuttuaqatigissallugit aalajangerpoq. 

- Timima pisinnaasaa malillugu pisuinnarsinnaasunga, qasulerumalu utiinnarsinnaasat ilama oqarfigaannga. Uteriinnerali puttallaqqippoq. Qanorluunniit sivisutigigaluarpat – qaavanut apuutissaanga, Maja Heilmann oqaluttuarpoq.

Qaavanullu apuuppoq. 

- Angusaq angeqaaq – talikkalu qullaannarlugit nuannaarpunga, Majap qanoq ajugaasimaartigisimanini ersersillugu qiasunngorpalulluni oqarpoq. 

Majattaaq angerlarsimaffimmini kisimiikkunnaarpoq. Qimmiutaa Muku illoqataalersimavoq – qimmeq mikillunilu tukappasissoq akusaq, isikkaaq inuttaminullu naleqquteqqissaartumik uummatilik. Majallu Muku ilagitillugu ersissaarnikuuvoq. Qimmerlu marluinnaallutik umiatsiamik illuaqqaminukarsinnaapput. Silaannarissariarlutik. Eqqissisimaariartorlutik. Aniguivoq. Inuuvoq. 60-ileeqqammerpoq. Kingumulli qiviarnianngilaq. Siumuinnaq.