Nikassaanerit assigiinngisitsinerillu
kalaallit Danmarkimiittut ilaannit misigineqartarput.
Københavnimi Kalaallit
Illuutaat taamaammat Udlændinge- og Integrationsministeriamit
tapiiffigineqarluni pisinnaatitaaffiit pillugit paasititsiniaavoq.
Nikassaanerit assigiinngisitsinerillu
kalaallit Danmarkimiittut ilaannit misigineqartarput.
Københavnimi Kalaallit
Illuutaat taamaammat Udlændinge- og Integrationsministeriamit
tapiiffigineqarluni pisinnaatitaaffiit pillugit paasititsiniaavoq.
Videoni
arfineq pingasuni inuit assigiinngitsut arfineq pingasut misigisimasaminnik,
sunniutaannik qanorlu iliornitik pillugit oqaluttuartinneqarnerat
paasititsiniaanerup upernaaq manna aallartinneqarmalli millionit tungaannut
isiginnaarneqarsimapput.
Oqalutseqarsinnaatitaaneq uumissuinermillu pinerluutit nalunaarutigineqartarnissaannik ilisimasaqarnerulernissap saniatigut illumi
pisortaq Leise Johnsen oqarpoq kalaallit Danmarkimiittut tusaaneqarlutillu
paasineqarnissaasa qulakkeernissaa siunertaasoq.
Siunertaq kusanaqaaq. Nerioqaangalu
iluaqutaajumaartoq. Kisianni nunatsinni pissutsit qanoq innerannik aamma uannut
eqqarsalersitsipput.
Partiini illuatungeriittuni ilaasortat illuatungiminnut
nikassaallutik, sianiinneraalutik ilisimasakinneraallutillu oqalupput,
kalaallinut inuiannut politikkiminnik anguniakkaminnik takorluukkaminnik
pinnatik.
Qinikkalli kisimik taamaanngillat. Isummersuisartut
inuillu assersuutigalugu Facebookimi oqaaseqartartut ipittorujussuarmik
ilaannilu ingasattumik oqaaseqartarput.
Oqallinneq massakkoqqissaaq
aaqqiagiinnginnermut isumaqatigiinnermullu tunngalersimavoq. Aserorsaaqaaq
akeqqersimaaqalunilu. Isumaqataanngikkaannilu... Kakkaak!
Isumaqatigiinnginnissamut inissaqanngilaq.
Allaaserereernikuuara paasinikuuaralu
pingaarteqalugu. Kissaatigigaluaqaarami isumaqatigiinngikkaluarluta
ataqqeqatigiissinnaanerput attassinnaagipput. Isumaqatigiinnginnitsinni suut
isumaqatigiinngissutiginerlugit ukkatarisinnaagipput inuttarsiuinata.
Allaat
Aqqaluaq B. Egedep Hans Enokseniugaluullu saqqummiuttarsimasaat maqaasivakka. Politikkikkut akerleriipput oqaluttarfimmiillu tusagassiutinilu
isumaqatigiinngissinnaaqalutik. Soraaraangamilli ikinngutigiilluartuupput
perujuuttuartarlutillu. Inuit, isummat tunuanni.
Amerlanerusut isumaqatigiinnginnerit
suunerannik paasinnissinnaanissat kissaatigigaluaqaara; tassami isummat
assigiinngitsut. Isummat tunuannit inoqarpoq illarumatussuseqartunik,
misigissuseqartunik, misigisaqarsimasunik allarpassuarnillu imaqartunik.
Oqaaseqaatit
aserorsaasut akeqqersimaartullu inunnik eqquisarput, soorlu aamma illit,
angajoqqaatit qitornatilluunniit eqqorneqarsinnaasut.
Soorunami pingaartitanik
isumaqartoqarsinnaassaaq, aamma isummagut oqaatigisinnaasariaqarpavut. Isummalli
pingaartitat inunnik tikkuartunissamik nakkarsaanissamik
aliatsatsitsinissamilluunniit siunertaqarluni oqaatigineqarpata inuup allamik
isumallip tusarnaarsinnaanera, eqqarsaatersorsinnaanera immaqalu
paasinnissinnaanera annikinnerulissaaq. Taarsiullugu – immaqa sakkortoqataanik
– akerliulluni qisuariassaaq.
Oqallinnerulli taamarsuaq
aserorsaajunnaarnissaanut qanoq iliortoqartariaqarpa? Kalaallimmi kisimik
taamaanngillat. Oqalliseriaaseq tamanna nunarsuaq tamakkerlugu atorneqarpoq.
Nunanili
allani oqaatsit assersuutigalugu qallunaatut, spanskisut, tyskisut
tuluttulluunniit amerlasoorpassuarnit atorneqarput oqaatsitsinnillu
paasinnissinnaasut taakkununnga sanilliullugit ikittuinnaallutik.
Taamaammat
pasilliinerit uumissuillunilu oqaatigineqartut ukkatarineqannginnerupput. Eqqarsarpungalu
kingulitta taamak kusanaatsigisumik isummersortarnissaat kissaatiginngikkipput.
Soorunamilu meeqqavut inuusuttortavullu
torersumik, ataqqinnittumik ataqqinartumillu oqalussinnaanissaannik
perorsassavavut. Piffissanngunnginnerpali inersimasuusugut aamma
tikkuarneqarnissarput? Maanna oqalliseriaatsitta inunnut ataasiakkaanut qanoq
sunniuteqartarnerat pillugu paasititsiniaanissaq inissaminiilernerpa?
Soorlu
Københavnimi Kalaallit Illuutaat paasititsiniaasoq. Imaluunniit Danmarkimi
mibilselskabit ilaat Call me torersumik oqaluttarnissamik 2012-imi
paasititsiniaaneranut assingusumik.
Inersimasuusugummi torersumik oqalunneq
aamma ilinniartariaqarparput.
