Icelandairip timmisartuussinissani isumannaallisaanermi sulisussaqannginneq pissutigalugu taamaatikkaa
Nuummi mittarfimmi isumannaallisaanermi sulisussaaleqisoqarmat Nuummiit Reykjavikimut timmisartuussinissaq ataasinngornermi taamaatiinnarneqarpoq.
Isumannaallisaanermi sulisussaaleqineq pissutigalugu Nuummit timmisartuussinissaq ataasinngornermi taamaatiinnarneqarpoq.
Toqqorsivimmit assi: Oscar Scott Carl
Icelandairip Nuummit aallarnissaa ataasinngornermi taamaatiinnarneqartoq Greenland Airportsip Sermitsiamut uppernarsarpaa.
Tamanna isumannaallisaanermi sulisussaaleqinermik pissuteqarpoq. Greenland Airportsimi ingerlatsinermut pisortaq Mie Rajcic Sermitsiamut allakkatigut ima akivoq:
Ingerlatsinermut pisortaq naapertorlugu Nuummi isumannaallisaanermi sulisut amerlineqarnissaat sivisuumik sulissutigineqarpoq, aamma naammattumik aalajaatsumillu sulisoqarsinnaanissaa qulakkeerniarlugu iliuuseqartoqarpoq.
– Taamaammat ataasinngormat Icelandair-ip Nuummiit Reykjavikimut timmisartuussinissaa taamaatiinnartariaqaratsigu ajuusaarutigaarput. Isumannaallisaanermi sulisussaaleqineq pissutigalugu ilaasussat isumannaallisaavimmi misissorneqarnissaat ajornarsimavoq, Mie Rajcic allappoq.
Pisoq mittarfimmit ajuusaarutigineqartoq taassuma naqissuserpaa:
– Ilaasunut eqqugaasunut ajuusaarpugut. Aammali siorna aasakkut ajornartorsiutit taama ittut maannakkut atuuttut nalunngilarput, taamaammallu taamatut pisoqaqqinnissaa pinngitsoortinniarlugu iliuuseqarpugut.
Ingerlatsinermut pisortaq naapertorlugu Københavnip mittarfiini sulisussarsiorneq ilinniartitsinerlu annertusarneqarlutillu tapersersuineq annertusineqarpoq.
– Aasaanerani ajornartorsiuteqanngitsuussalluta neriorsuisinnaanngilanga. Sapinngisarpulli tamaat siulliulluta iliuuseqarniartarlutalu pissutsit allanngoraangata – ilaasutsinnullu kinguneri annikinnerpaatinniarlugit - sukkasuumik iliuuseqartarpugut. Ingerlatsinerup maannamiit patajaatsuunissaa anguniagaavoq, ingerlatsinermi pisortaq oqarpoq.
