- Pissutsit ilungersunartuusut tusassallugu angajoqqaatut naammanngilaq. Tamanna nalunngereerparput. Kinguneri ullut tamaasa atugaraagut, angajoqqaaqatigiit allapput.
Taakkua maajip aallaqqaataani meeqqerivinni pissutsit pillugit akerliussutsimik takutitsipput, tassanilu angajoqqaat, meeqqat sulisullu hundredelikkaat arlallit peqataapput.
- Pissutsit ilungersunartuusut tusassallugu angajoqqaatut naammanngilaq. Tamanna nalunngereerparput. Kinguneri ullut tamaasa atugaraagut, angajoqqaaqatigiit allapput.
Taakkua maajip aallaqqaataani meeqqerivinni pissutsit pillugit akerliussutsimik takutitsipput, tassanilu angajoqqaat, meeqqat sulisullu hundredelikkaat arlallit peqataapput.
Akerliussutsimik takutitsinerit Katuap saavani naapput, tassanilu politikerit arlallit akerliussutsimik takutitsisut paasinnilluarlutik naapippaat, tamannali angajoqqaaqatigiinnut naammanngilaq.
Kommuneqarfik Sermersuullu sulisussaaleqinermik meeqqerivinnilu atugarissaannginnermik isornartorsiuineq naammaginartumik akissuteqarfigisinnaanngikkaa taakkua isumaqarput.
Angajoqqaaqatiiit ataatsimiititaliami siulittaasup Poul Petersenip Sermitsiami oqaaseqaatai naammaginanngilluinnartut maannakkut qisuariaatigaat. Nassuiaatinik piumanngillat.
- Iliuuseqarnissaq amigaatigaarput.
Siunnersuutinik erseqqissunik saqqummiussisut
Angajoqqaaqatigiit siunnersuutaat
- angajoqqaat saaffiginninneri nalunaarsorlugillu allakkatigut akisarnissaat
- angajoqqaat siulersuisuisa suleriaasiannik erseqqissunik pilersitsineq
- angajoqqaat siulersuisuinit tamaneersunit sinniisut ataatsimeeqatigiinnissamut qaaqqusarnissaat
- angajoqqaat siulersuisuini saaffissamik aalajangersimasumik toqqaanissaq
- angerlarsimaffiup meeqqeriviullu akornanni digitalikkut attaveqatigiinnerup pitsaanerulersinnissaanut piffissaliussamik saqqummiinissaq
- nakkutilliinermut, iliuusissatut pilersaarutinut malitseqartitsinermullu tunngatillugu allakkatigut nalunaarusiineq
- perorsaanikkut siulersuisut amigaatinik matussusiiumalluni akisussaaffimminniit tunuartinneqannginnissaasa qulakkeernissaat
- perorsaasut saniatigut immikkut ilisimasallit amerlanerusut atornissaasa misissorneqarnissaa
- attassiinnarnissap, inissaqartitsinerup, igaffimmi sulisut atorfiillu nassuiaataat paasiuminartut pillugit aalajangersimasumik suliniuteqarnissaq
- malittareqqiilluni angajoqqaanik ataatsimeeqateqaqqinnissamut ulluliinissaq
- Kommunip ajornartorsiuteqarnera paasisinnaavarput. Kommunilli sulisussaaleqisoqarnera kisiat oqaatigiinnarsinnaanngilaa. Kommunip iliuuseqarfigisinnaasani iliuuseqarfigisariaqarpai.
Taamaammat angajoqqaaqatigiit kommunip qanoq iliuuseqarsinnaaneraanik siunnersuutinik aalajangersimasunik allattuisimapput. Angajoqqaat saaffiginninnerisa allakkatigut akineqartarnissaat, angajoqqaat siulersuisuinut ersarissunik malittarisassaqalernissaq aamma attaveqarfigineqarsinnaasunik aalajangersimasunik toqqaanissaq ilaatigut siunnersuutigineqarpoq. (Paasissutissat takukkit)
Angajoqqaaqatigiit kommunip akisussaaffii tiguniarsarinagit erseqqissarpaat.
- Suleqatissatut pimoorunneqarusuppugut. Angajoqqaat siulersuisui pinnersaataannaanngillat. Tassaappulli meeqqat pillugit inatsisitigut aalajangersagaasut.
Angajoqqaaqatigiit naapertorlugit sulisussaaleqineq kisimi pineqarani aammali paasissutissat amigaataaneri, angajoqqaanik peqataatitsinnginneq aqutsisullu tatineqarnerat pineqarput.
- Meeqqerivinni paarsineq kisimi pineqanngilaq. Meeqqat angerlarsimaffiup avataani ataatsimoorfiini siullerpaavoq. Meeqqat toqqissisimanerat, oqaasii, attaveqatigiinneq, kulturi, pinnguarneq, timip ineriartornera inersimasunillu tatiginninneq tassani ilusilersorneqartarput, angajoqqaaqatigiit allapput.
Inersimasut tatineqaraangata meeqqat malugisaraat
Sulisussaaleqineq aaqqinniarlugu kommunip siammasinnerusumik eqqarsartariaqalernera, perorsaasullu saniatigut sulisut allat meeqqat atugarissaarnissaannut ineriartornissaannullu qanoq tapersersuisinnaanersut misissortariaqaraa angajoqqaaqatigiit aamma isumaqarput.
- Sulisut atugaat aamma taamaapput. Inersimasut tatineqaraangata meeqqat malugisarpaat. Sulisut inersimasut aalajangersimasuunngikkaangata meeqqat malugisarpaat. Pisortaq ulluinnarni ulapaarnini pissutigalugu aqutsisinnaajunnaaraangat meeqqat malugisarpaat.
Angajoqqaaqatigiit meeqqat nassuiaatinik ataatsimoortunik utaqqisinnaanngitsut, inersimasunilli maanna iliuuseqartussanik pisariaqartitsisut erseqqissarpaat.
- Akissut aalajangersimasumik ulloqanngitsoq, kikkut akisussaanersut qanorlu iliortoqassanersoq nassuiaatitaqanngitsoq naammanngilaq.
