Narsarsuarmi Katersugaasivik: - Mittarfik matuniariartoq katersugaasivik atorunnaassaaq

- Misigissutsit amerlaqaat, Ole Guldager, suleqatini Gitte L. Ottosen peqatigalugu Narsarsuarmi katersugaasivimmik ingerlatsisoq, oqarpoq.

Taanna Katersugaasiviup ukiuni 33-ni ammanerani 18-ini ingerlatsisuuvoq. Katersugaasivik Narsarsuarmiunit aallartinneqarpoq, UNESCO-millu nersornaatiniit 1940-kkunniit ukiut qulikkuutaat tamatuma kingorna assilisat katersugaasivimmiipput. Misigissutsit sakkortupput, tassami Qaqortumi mittarfik nutaaq ammarpat katersugaasiviup pisortaata katersugaasivik matusariaqarpaa. Tassami Narsarsuarmi nunanit tamalaanit mittarfik qulimiguulinnut mittarfinngussaaq. Katersugaasivik Kalaallit Nunaanni katersugaasivinni kisiartaalluni namminersortumit ingerlanneqarpoq.

- Mittarfik matuppat ingerlasinnaanngilagut, aasaaneranimi takornariat ikippallaassapput. Aningaasaqarnikkut tamanna silatusaarnerunngilaq. Mittarfik matuniariartoq katersugaasivik atorunnaassaaq, Ole Guldager oqarpoq.

Aappariilli ukiup affaani Danmarkimi najugaqartarput, Narsarsuarmukartuassallutilli.

- Maani peroriartorpunga Narsarsuarmullu atassuteqarluarlunga. Kingulliit ilaanniillunga Narsarsuaq qimakkusunnagu qimassagunavippara, Ole Guldager oqarpoq.

- Misigissutsit amerlaqaat. Amerlasuut meeraqarlutik suliffeqarput, inuunerallu tamarmi allanngortinneqartarpoq, Gitte L. Ottosen oqarpoq.

Erseqqissumik akissutissaqanngilaq

Narsarsuaq ukiuni amerlasuuni kingullerni, mittarfik, Qaqortumilu mittarfiup ammarneqarneranit nunaqarfimmut qanoq sunniuteqassanersut oqaluuserineqartarsimapput. Oqallinneq tamanna soorunami Ole Guldagerip Gitte L. Ottosenillu malinnaavigisimavaat, sakkortuvoq misigissutsinillu ulikkaarluni, oqaluttuarput.

- Inuppassuit nuussanerlutik uninngaannassanerlutilluunniit aalajangertariaqarpaat. Pissutsit imaannaanngilluinnarput. Piffissap ilaani politikerinut kommunimullu (Kujalleq aaqq.) apeqqutigaarput illut nalingata annaasaqaatigineranut taarsiissuteqartoqassanersoq. Illorpassuit naleerulluinnarput. Taamaaliortoqassanngitsoq paasitinneqarpugut, Ole Guldager oqarpoq.

Narsarsuarmiunut innuttaasunullu unammillernarnerpaasussaq tassaavoq mittarfik nutaaq ammarpat tikittartut ikileriarujussuarnissaat. Ukiumut ilaasut 50.000-it missaanniittut ukiumut 3.000-it missaanniittunut ikileriarnissaat naatsorsuutigineqartoq suliakkiissummi allassimavoq. Mittarfeqarfiit nunaqarfimmi 60-it missaannik maanna sulisoqarput.

Narsarsuup siunissaa pillugu politikkikkut erseqqissumik akissuteqartoqartariaqartoq Ole Guldager isumaqarpoq.

- Isumaqarpunga ersarissunik akissutissarsineq ajortugut. Misigivunga susoqanngitsoq. Matunissaata tungaanut piffissaq ingerlaterujoorneqarpoq, oqaasiinnarnillu utaqqitinneqarpugut. Ukiualuit matuma siorna kamaatigineqaqaaq, kisianni soorlu tassa tunniutiinnartoq, oqarpoq.

Akisussaafferujussuaq

Narsarsuarmi mittarfiup qulimiguulimmut mittarfinngortinneqarnissaa pillugu apeqqutit arlallit suli akineqanngillat, aamma nunaqarfiup inuussutissarsiornikkut periarfissai pillugit suleqatigiinnissaq pisariaqartinneqarluni. Taamaattumik Naalakkersuisut aalajangerput Narsarsuup siunissaa pillugu suleqatigiissitap sulinini Qaqortumi mittarfissap nutaap 2026-mi ammarnissaata tungaanut sivitsorneqassasoq. Nunaqarfimmi innuttaasunik ataatsimiisitsinerit ingerlaavartumik ingerlanneqarput.

- Ukiut arlallit matuma siorna innuttaasunik ataatsimiisitsinerni siullerni inuit takkuttarlutillu eqqarsaatitik saqqummiuttarpaat, kommunilu oqartarpoq aallarnisaasutut sulilertoqartariaqartoq arlaannik nassaarsiorluni. Inuilli taakkua sulisutut sulineq sungiusimavaat, tamangajammillu mittarfimmi sulisuullutik. Innuttaasut tusaaneqaratik misigisut akisussaaffilernissaat annertuvoq, Gitte L. Ottosen oqarpoq.

Rambøllip misissuisimaneq pisoqaanerusoq naapertorlugu Narsarsuup qulimiguulinnut mittarfinngortinneqarnissaanik aalajangiisoqarpat innuttaasut 21-nut ikileriartussaapput. Taakkunannga qulit qulimiguulinnut mittarfimmi sulissapput. Aningaasaleerusussuseq, nutaaliorneq najugaqartullu peqataanerat Narsarsuup ineriartortinneqarnerani pingaaruteqarput, Kommune Kujallermi borgmesteri Stine Egede (IA) siusinnerusukkut oqarpoq.

- Politikerit suliffeqarfinnik pilersitsinissaq kissaatigigunarpaat, tunngavissaqarluartariaqarporli. Nunaqarfimmimi ruujorilerisoqanngilaq biililerisoqaranilu, Ole Guldager oqarpoq.

Narsarsuarmut soqutiginninneq amigaataasoq

Kalaallit Nunaanni kisiartaalluni igutsaatiliuvoq. 2007-imiilli taamaaliorpoq, ilaannikkut unillatsiartarsimalluni. Siornatigut nuna tamakkerlugu tunisassiortarsimavoq, ullumikkulli igutsaat taama annertutigisunik tungusunnitsuliorneq ajorput.

- Narsarsuarmiiginnassagutta, assersuutigalugu igutsaateqarneq inerisarlugu allanilluunniit tunisassiornermik ineriartortitsilluta, sulisut amerlanerusut pisariaqartippavut. Ajornartorsiut nunaqarfippassuarni piuvoq, inunnik sanasunillu amigaateqaratta.

Nunaqarfimmi najugaqarniaraanni tamanna atugassarititanut ilaannginnami?

- Aap, aaqqiissutissarsiortoqarsinnaasariaqarpoq, kommunip namminersorlutillu oqartussat iliuuseqarnerannit inuussutissarsiutinik nutaanik pilersitsinissamut periarfissaqarsinnaaniassagatta. Nunaqarfinni inuuneq kajungernarnerulersinniarlugu periutsit nutaat ineriartortinneqartariaqarput.

Ataatsimiinnerni oqaluuserineqartut piviusumillu pisut assigiinngissuteqartut Ole Guldager aamma Gitte L. Ottosen oqarput.

- Erseqqippoq inuiaqatigiit Narsarsuarmik soqutiginninngilluinnarnerat. Aqqusinermi putut suliariartorneqarneq ajorput. Tamanna ajornanngilluinnarpoq, Narsarsuarmilli aserfallatsaaliuineq, soqutiginninneq pingaarnersiuinerlu amigaataapput.

Sumulluunniit atorneqarsinnaagaluarpoq. Illuni mingutsitsinngitsumik nukissiortoqarsinnaagaluarpoq imaluunniit Atlantikoq qulaallugu timmisartoqarfiliortoqarsinnaagaluarluni, isumaqarpungali periarfissat misissoqqissaarneqarluarsimanngitsut, Ole Guldager oqarpoq.