Neriniartarfik Michelinimik ullorialik Nuummi ammassaaq

Odensemi neriniartarfik ARO Hotel Nordbo suleqatigalugu 2025-mi akunnittarfimmi neriniartarfimmik ammaaniarpoq.

Tamanna akunnittarfiup tusagassiuutinut nalunaarutaani allassimavoq.

Neriniartarfik taanna maanna Michelin Guide-mik ulloriamik ataatsimik ulloriaqalersimavoq.

- Neriniartarfik ARO aamma Hotel Nordbo Kalaallit Nunaanni nerisassiornermik immikkut ittumik misigisaqartitsissapput.

- Neriniartarfik nutaaq aqqutigalugu ARO-p nerisassiaanik nutaalianik pissanganartunillu tusaamasaasunik Nuummiut misiliisinnaassapput, akunnittarfimmit nalunaarutigineqarpoq.

Christoffer Tornhøj Schärfe, ARO-mik piginnittoq, suleqatigiinneq pillugu oqarpoq: "Kalaallit Nunaanni pinngortitaq kulturilu misigerusuttuaannarsimavakka, maannalu periarfissaqalerpunga."

- Aamma soorunami suliatigut eqqarsaatigalugu. Pissutsini sungiusimasatsinnit allaanerulluinnartuni, nalunngisatsinnit allaanerulluinnartunik akulinnik nerisassiorneq unammillernartorujussuussaaq.

- Imminut unammillilaarneq ineriartornermut iluaqutaajuaannarpoq, ulluinnarni pissutsit sungiusimasat atorusaarnagit — tamannami angusaqarfiuneq ajorpoq, Christoffer Tornhøj Schärfe oqarpoq.

Michelinimik ullorialinnik neriniartarfinni ARO siullersaalluni Kalaallit Nunaanni immikkoortortaqalertuunngilaq. Savalimmiuni neriniartarfik Koks ukiut marluk matuma siorna Ilimanamut nuukkami Michelin-imik marlunnik ulloriaqarpoq. Ukioq mannali ullorissat annaavai.