Piginnaanilissuaq Kangersuatsiameersoq

Inuunermi unammillernartut nunatsinnilu politikki pillugit taalliai eqqarsalersitsisartut. Imminut tatiginera. Nipilersornermi piginnaasaqarnera. Tamakkuupput Hans Peter Anthonsenip sakkortuunik nipilersortartut Pukuut nunatsinni nuannarineqalermata ilisimaneqaataasa ilaat.

Nipilersoqatigiinni erinarsortoq aallarneeqataasorlu Hans Peter Anthonsen nipilersornermi aaqqissuussami ukiumoortumik ingerlanneqartartumi, Akisuanerit Festivalimi nipilersoqatigiit appinnissaannut sapaatip-akunneri ikitsuinnanngortut AG-mit naapipparput. Angut Pukuummik aallarniisoq ilisarisimaleruleriartigu.

Hans Peter Anthonsen ukiut 35-it matuma siorna Upernavimmi inunngorpoq. Kangersuatsiami, nunaqarfimmi Upernavimmiit kujammut 50 kilometerinik ungasitsigisumi, peroriartorpoq. Qatanngutigiit sisamaapput, taakkunanilu angajulliit tulleraat. Angajoqqaavi tassaapput Martin aamma Birthe Anthonsen. Angutaa Martin palasiuvoq arnaalu utoqqarnik sullissisuuvoq.

Hans Peter Anthonsen meeqqat allat assigalugit meeqqat atuarfianni atuarpoq, atuarneralu ingerlalluarpoq. Angutaata Kamma Laurentsip atuakkiaa “Joorut apeqqarissoq” unnuit tamaasa innartitsigaangami atuartarpaa.

- Atuagaq alanngaarsinnaavara. Atuagaq 1. klassiullunga meeraqatinnut atuffatigisuusaarlugu eqqaamavara. Atuffassisinnaanera tupigusuutigaat, atuffatinngilakkali, ataatagami ilaaginnarpara, Hans Peter Anthonsen illarpoq.

Kangersuatsiami meeraanermini meeraqatini aamma aneeqatigisarpai.

- Teknologiip atugaalernerujussuata siorna. Pinngortitamiittaqaagut umiatsiallu nammineq sanaagut pinnguarisarpagut, eqqaamasalersaarpoq.

Meeraallunili nipilersorneq soqutigilerpaa. Hans Peter Anthonsen angajoqqaami illuani ineeqqamini, nipilersoqatigiit grammy-nnassimasut Korn, System of a Down nipilersoqatigiillu Tysklandimeersut Rammstein assinginik iikkami nivingasoqartumi, ataatami guitarianik sungiusartarpoq. Tassani nukappiaraq Hans Peter ingilluni kalaallisut erinarsorluni sungiusartarpoq, ukiualuit qaangiuppata nipilersornermi piginnaasaminik nunaqqatigut nipilersuutinik nuannarisallit tiguarumaarlugit ilisimanagu.

- Meeraasunga ataataga nipilersortaqaaq. Taamaammat peroriartuutigaara, tassami qatanngutigalu ataatama guitaria atorlugu erinannik assigiinngitsunik atuisarpugut, oqaluttuarpoq.

Meeqqat atuarfiat Kangersuatsiami naammassisinnaannginnamiuk Upernavimmi naammassivaa. Tassa imaappoq Hans Peter Anthonsen ukiukitsuulluni angajoqqaani qimallugit illoqarfimmut allamut aallartariaqarsimavoq.

- Taamaaginnarpoq, uagutsinnut nalinginnaavoq. Nuannisarpunga, eqqaamasalersaarpoq.

Angerlarserneq nipilersuutillu siulliit

Meeqqat atuarfiat naammassigamiuk Femmøller Efterskolemi, ilaatigut nipilersornermik ilinniartitsisartumi, atuassalluni Danmarkiliarpoq.

- Nipilersornermi piginnaanikka pitsanngorsarniassagakkit atuarfik toqqarpara. Ukiup affaali qaangiutiinnartoq juullinnginnerani angerlarpunga. Angerlarserama, oqarpoq.

Ukiup tullia nipilersornermut, nipilersornermuinnarlu, atorneqarpoq. Hans Peter Anthonsen nipilersuutinik assigiinngitsunik nittartakkakkut inniminniivoq, nipilersornermilu piginnaasani siuarsarlugit misileraalluni. Nukkani Jens Jørgen Anthonsen ikinngutinilu marluk peqatigalugit nipilersoqatigiit Pukuut 2007-mi pilersippaa, atiatalu toqqarneranut peqquteqarpoq.

- Kangersuatsiarmiut issingiassat pukuunik taasarpaat, taamaalilluta nipilersoqatigiit nuannareqisagut Korn isumassarsiorfigaagut, nassuiaavoq.

Nipilersoqatigiit nipilersuusiamik saqqummersitsisarfiit arlaanniit saqqummersinneqarnissaat neriuutigalugu Kangersuatsiami immiussisarfimminni demonik arlalinnik immiussipput.

- Taamani saqqummersitsiviit ullumikkumiit atorneqarnerupput. Taamani demot arlallit nassiuppagut, tamatigulli itigartinneqartarpugut. Ingerlatseqatigiiffiit ilaasa akinngilaatigut, eqqaamanilersaarpoq.

Pukuut maanna tusarnaartitsinerpassuarni, soorlu Sisimiut Festivalimi, Nipiaa Rock Festivalimi appisimaartarput, qaammallu una naappat Akisuanerit Festivalimi ukiut tamaasa ingerlanneqartartumi nipilersornermillu nuannarisalinnik sineriammeersunik 3500-it missaanniittunit tusarnaariartoqartartumi appisimaassapput.

- Namminiissaagut

Hans Peter Anthonsen TNI-mi, ukiuni sisamani suliffimmik misiliisarluni ilinniarfiusumi, ilinniassalluni Qaqortuliarluni 2008-mi aallarpoq. Ilinniarnerminut peqqutaa: Kangersuatsiami suliffimmik misiliisinnaagami.

- Nunaqarfiga nuannareqaara, qimakkuminaatseqalugulu. Kangersuatsiaq nassuiagassaanngitsumik asavara, oqaluttuarpoq.

Hans Peter Anthonsen, aamma Qaqortumi ilinniarnermi saniatigut, nipilersortuarpoq, TNI-milu ilinniarami nuussuarmik saqqummersitsinissaq sinnattoraa. Ilinniakkani 2012-imi naammassigamiuk guitarimut sakkortusaammik nutaamik pisinissaminut katersiniarluni nukkani ilagalugu Innaarsunnut Tasiusap kangerliumarnganiittumut nuuppoq. Ukiup tulliani, sakkortusaammut pisiarerusutaminut akissaqarlualersimallutik, Kangersuatsiamut asaqisaminnut uterput.

Nipilersoqatigiit suli saqqummersitsivinniit akuerineqarsimanngillat.

- Nipilersuutit erinnanik immiussiniarluta pisariaqartitagut pisiariortulerpagut. Arlaannaataluunniit nipilersortoriumanngilaatigut, oqartarnittuullu “Qujanartumik”, namminiiginnarpugummi, Hans Peter Anthonsen naqissusiivoq.

Nittartakkatigut Google Youtubelu atorlugit misissuivoq, nipilersoriaatsillu assigiinngitsut paasisaqarfigai.

Nipilersoqatigiit, katillugit sisamanik ilaasortaqartut, maannamut nuussuarnik sisamanik EP-millu ataatsimik saqqummersitsereerput.

- Nammineq nipilersuusiortalereersugut inuit siunnersoqqullutik saaffiginnittalerput, allallu nipilersortoriumasarpaannga, Hans Peter Anthonsen, Pukuut taalliortuat, oqaluttuarpoq.

- Inuunermi unammillernartut assigiinngitsut nunatsinnilu politikki isumassarsiorfigisarpakka, oqarpoq.

Sunngiffimmini meeqqani ataatsimik ukiulik ilagisarlugu aappani ilinnialissammat qanittumi Kangersuatsiamiit Ilulissanut aallarpoq. Marlunnik, 15-inik ataatsimillu ukiulinnik, meeraqarpoq.

Pukuut siunissaat pillugu nuussuaq nutaaq saqqummertussaq eqqaalaarpaa.

- Pilersaarusiuleruttorlutalu erinnat ilaat immiullugit aallartereerpagut, Hans Peter Anthonsen oqarpoq.