Piviusulersaarusiaq eqqarsaammernartoq: Nina Ruth ikiortigalugu imminut nassaarisoq

Tamanna siunertaasimavoq. Inuunermi matumani imminnut nassaarissasut.

Ruth Mikaelsen Jeremiassen aamma Nina Paninnguaq Skydsbjerg.

Piffissani assigiinngitsuni tamatigut nuannersumik oqaluttuassartalimmik ikinngutigiilersimasinnaagaluarput, maannali piviusulersaarusiortutut tigummisatullu imminnut nassaaripput. Tassa inuunerat piviusoq.

Assigiinngilluinnarpasipput, assigiissuteqaqaalli. Yin-itut yang-itullu ipput. Nina Paninnguaq Skydsbjergip eqqarsaatini sekundialuinnaat ingerlanerani aqulersimanngitsuuppagit assigiinnerussagaluarput. Ruth Mikaelsen Jeremiassen taamaaliorsinnaasimanngilaq. Taamaammat Ruth inatsisinik unioqqutitsilluni ingerlavoq, Ninallu eqqarsaatini amiilaarnartut nammineq pigiinnarpai. Ruthip sekundialunnik piffissaqarnini iluatsitsissutiginngilaa, sekundialunnimi pinerlisini toquppaa. Imminerminut kinguaassiutitigut atornerluisuusimasoq. Nina Paninnguaq Skydsbjergip sekundialunnik piffissaqarnini iluatsitsissutigalugu pinerlisimi toqunnissaa eqqarsaatigiinnarpaa. Nina aqqaneq-marlunnik ukioqarlunili ullorsiutimini akiniaanissamik takorluugaqarluni allattuarpoq, atornerluisorlu allatamini assigiinngitsutigut toquttarsimavaa. Allaaseriinnartarpaa, ullulli ilaanni toqutsisoq sanioqquppaa. Marluullutik biilerput. Kamannerup Ninap kinaassusia tamaat tiguarpaa, pinerlisorlu pisussimagaluarpat Nina tigummineqartunngorsimassagaluarpoq, taamaalillutillu Nina Ruthilu pinerlussimasunut inissiisarfimmi ikinngutigiilersimassagaluarput.

Ikinngutigiit tamanna piviusulersaarummi nutaami, sapaatip-akunnerani matumani Københavnimi takuteqqaarneqartumi, oqaluttuaraat.

Piviusulersaarummi taakkua, naak assigiiffeqaraluarlutik, assigiinngitsunik inuuneqalersimanerat sammineqarpoq.

Sekundit arlaqanngitsut taakkua immikkut pingaaruteqarput. Nina Paninnguaq Skydsbjergimmi eqqarsaatini misigissutsinilu aqulerlugit ajoqusertoqanngitsoq ingerlaqqissinnaasimavoq. Ruthili taamaanngilaq, ukiunimi 18-ini pinerlussimasut inissiisarfianniippoq.

Nammineerluni saqqummiussinissamut periarfissaq

AG-p Ruth Mikaelsen Jeremiassen aamma Nina Paninnguaq Skydsbjerg, piviusulersaarusiaq “Walls – Akinni Inuk”, pingaarnertut inuttaaffigisaat, pillugu oqaloqatiginiarlugit aggersarpai.

Aallaqqaataaniit aallartissaagut. Walls – Akinni Inuk ukiuni qulini suliarineqarpoq, Nina Paninnguarlu peqataasussaanngikkaluarpoq, produceritut taamaallaat – sulilu produceriuvoq.

- Ruth, qassinik ukioqarpit?

- 47.

- 46.

Nina Paninnguup 47-nik ukioqarnerarlugu naqqippaa.

- 48-liissaatit.

- Ukioq manna 40-liissallunga nalunngilara, uanniillu ukiunik arfineq-pingasunik angajulliunerusutit nalunngilara, taamaammat ukiutit kisipallassinnaavakka.

Arnat taakku marluk illalaarput.

“Walls – Akinni Inuk”-mik isumassarseqqaarnermi inissiisarfimmiittuni ulluinnarni pisartut Go Pro-mik assiliissutinik immiunneqarnissaat siunertaasimavoq. Taamanikkut inissiisarfik suli Nuummi umiartornermut ilinniarfitoqqap eqqaaniippoq.

Tigummisat namminneq tigoriarlugit immiussisinnaaniassammata piviusulersaarusiortut assiliiviit mikisut arlallit nerrivimmut ilivaat. Peqataaqqullugit tatineqanngillat, tigummisallu peqataarusukkunik namminneq aalajangissavaat.

- Nunami filmiliortartut amerlinissaat soqutigilluinnarpara, nalunngilaralu nunami maani amerlasuunik piginnaasaqartoqarlunilu eqqumiitsuliornermik suliaqarnermi pikkorissorpassuaqartoq, aammali amerlasuut piginnaasaqarnertik ilisimanninngilaat.

- Taamaammat inuit ilaat nuannarisaminnik nassaarsinnaaniassammata naneruaq ikinneqassasoq neriuutigaarput. Assersuutigalugu kalaallit angutit inuusuttut amerlasuut eqqarsaatit ilaat nalinginnaasumik oqaloqatigiinnermi oqaatigiuminaatsut oqaasinngortinniarlugit rappertartut nalunngilara. taamaalilluni tigummisaq nammineq pilersitsineq qanoq katsorsaataasinnaanersoq ilinniarsinnaaniassammat rap-imik erinarsuusiap immiunneqarnissaa suliarineqarnissaalu eqqarsaatigisimasatta ilagaat. Inuit periarfissaat ammarneqarsinnaassasut neriuutigidimavarput, Nina Paninnguaq Skydsbjerg oqarpoq.

Piviusulersaarusiaq taamaalilluni inummut aalajangersimasumut tunngassuteqanngilaq, takorluugarlu pingaarnertut inuttaqarani. Taamaalivorli. Ruthip piviusulersaarusiortut, ingammik Nina, soqutiginnilersissimavai, tamannalu Ninap sulinerata inuuneratalu killeqarunnaarnerannik kinguneqarpoq.

Akisussaaffik tigugaa

Ruthili aamma malugineqarusunngikkaluarpoq. Piffissaq siulleq piviusulersaarusiortut assiliissutaanniit tunuarsimaarpoq.

- Immikkoortortamiittoq ataaseq assiliissutit atorlugit assigiinngitsunik immiussisaqattaarpoq, taava aallarpoq, akisussaaffillu tiguara. Kisimiilerama iliuuseqartariaqalerpunga, Ruth Mikaelsen Jeremiassen oqarpoq.

- Assiliissut sungiuppara, imminulli immiunneq ullut ilaanni killissamik qaangiinartarmat Ninap qanimut oqaloqatiginissaa pitsaanerusarpoq, oqarpoq.

Piviusulersaarusiaq naammassisaq ataatsimoorlutik suli takunngilaat, Nina Paninnguaq Skydsbjerg oqarpoq.

- Filmi immiullugu sakkortuvoq, taamaammat isiginnaarlugu aamma sakkortuvoq.

- Anniarluni skærmikkut imminut takulluni annernarpoq, oqarpoq.

Pingaaruteqangaatsiartoq ataaseq eqqumaffigeqquaa.

- Piviusulersaarusiami oqaluuserisagut suli annernarput. Inuunitta sinnera annernartuassapput. Misigisagut sakkortuut oqaasinngorteriaratsigit annernarunnaariataarnavianngillat.

Piviusulersaarusiaq sapaatip-akunnerata naanerani Københavnimi takuteqqaarneqassaaq. Arnat taakku marluk tassa peqataassapput.

- Ruthip kisimi paasisinnaavaanga, uangalu Ruth kisima paasisinnaavara. Misiginikuusagut pillugit kikkunnut tamanut takusassianngorlugu sassarnerput qanoq innersoq allat naluaat. Piviusulersaarusiornitsigut inuit ilorpiatsinnut ammaappagut, Nina Paninnguaq Skydsbjerg oqarpoq.

Taakku imminnut ileqimisaartorluni oqaluunnikkut paaseqatigiissinnaasut nassuiaavoq. Oqaaseqartariaqanngillat.

- Taamaattumik ikinngutitaarluni nuanneqaaq, oqarpoq.

- Qanittukkunni eqqartorparput. Taanna paasinnilluarnerusinnaammat allamik taama misigisartutigisumik naapitsilluni pingaaruteqaqaaq. Imminut killilersortoqartariaqanngilaq, oqarpoq.

Ruthip kiffaanngissusini Ninamut pigitippaa.

- Nina, Ruth Mikaelsen Jeremiassen eqqarsaateqarpasilluni oqarpoq nangillunilu:

- Ninaqanngitsuuppat suli pinerlussimasunut inissiisarfimmiissagaluarlunga upperilluinnarpara.

- Ukiorpassuit isertitsivimmiinneq sakkortuvoq, ingammik pulaarneqarneq ajoraanni. Sapaatilli akunneri tamaasa taamak ititigisumik oqaloqateqarneq tusaaneqarnerlu nukittuunngortitsisarpoq, oqarpoq.

Nammineq iliuuseqassaagut

Oqaloqatigiikkaangamik soorlu tassa tarnip pissusianik ilisimasalimmik oqaloqateqartarsimasut, tarnilli pissusianik ilisimasaliunnginnerat ikinngutigiinnerisa pitsaaqutigigaa Nina Paninnguaq Skydsbjerg naqissusiivoq.

- Tarnip pissusianik ilisimasallit arlallit oqaloqatigisarnikuuakka, sakkussannillu pissarsisaraluarlunga napparsimasutut, kukkusutut kiserliortutullu misigisarpunga. Ruth ilagigaangakku inuinnaasarpunga. Naammappunga. Ajunngilanga.

Nina Paninnguaq Skydsbjergip arni toqummat Ruth Mikaelsen Jeremiassenip pulaarnissaa qilanaaraa. Nammineq inuttut, naak aamma sulinerugaluartoq.

- Ruth pineqaatissinneqarsimasut inissiisarfiannut pulaaraluarlugu naqisimaneqanngitsutut misigisarpunga. Aliasunnera qanoq iliuuseqarfigissallugu nalugiga ikiorpaanga, nassuiaavoq.

Piviusulersaarusiaq allanut ilungersunartumik inissisimaffeqartunut iluaqutaasinnaasoq Ruth Mikaelsen Jeremiassenip Nina Paninnguaq Skydsbjergillu neriuutigaat.

- Inuiaqatigiinni anniaatilippassuaqarpoq. Sooruna? Kia akisussaaffigaa? Pisortat iliuuseqarnissaat oqaatigissallugu ajornanngippallaaqaaq. Innuttaasoqatigut ajornartorsiortut ikiussallugit aamma akisussaaqataasariaqarpugut. Takunngitsuusaaginnarutsigit allanngortoqarnavianngilaq, Nina oqarpoq.

Taakkuttaaq piviusulersaarusiap ukiuni qulini immiunneqarnerani suliarineqarneranilu imminnut ilikkarsimanerat malunnarpoq, piviusulersaarusiallu suliarineqarnerani ukiut inuunermik allannguiffiusimaqisut naatsorsuutiginngisamillu ikinngutitaarfiusimasut Nina nammineq oqarpoq.

Piviusulersaarusiami ilitsersuisoq Sofie Rørdam pillugu quppernerni tulliuttuni paasisaqarnerusinnaavutit. Naliliinertaaq AG-mi sapaatip akunnerata tulliani saqqummertussami saqqummersikkumaarparput.