Qallunaaq Miss Universemi ajugaavoq

Qallunaaq Victoria Kjær Theilvig Miss Universe 2024-mut toqqagaavoq.

Tamanna Mexicomi illoqarfiit pingaarnersaanni Mexico Citymi sapaammi unnukkut pinnerneqqusaannermi unammisitsinerup inernerisigut paasinarsivoq.

Aatsaavissuaq nunat tamalaat akornanni pinnerneqqusaalluni unamminermi qallunaamik ajugaasoqarpoq.

Tusagassiorfiit arlallit unammineq sioqqullugu qallunaaq 21-nik ukiulik ajugaaniutivinnissamut ajugaasussatut ilimagineqartutut taavaat.

Ajugaasoq Mexicomi niaqoruserneqarpoq. Nigeriameersoq Chidimma Adetshina ajugasut tulliatut inissippoq, Mexicomeersorlu Maria Fernanda Beltran pingajuattut inissilluni.

Unammineq, aaqqissuussisut oqarnerattut arnat nalliuttorsiutiginerpaasaat, 73-issaa ingerlanneqarpoq.

Arnat 130-it pinnerneqqusaannermi unammeqataapput.

Peqataasut ilaatigut inuiaqatigiinni tunuliaqutaminnut tulluartunik atisalersorsimapput, ilaatigut kjolilerlutik naluuserlutillu.

Aamma inuttut apersorneqarnissaminnut piumassuseqarsimapput.

Unamminermi angusarissaarnertik tunngavigalugu naliliisartut Miss Universemik toqqaasarput.

Unamminermi qallunaat Victoria aappaluttumik atasulerluni sassarpoq, tassani danskit vikingii isumassarsiorfigisimallugit.

Sapaammi unnukkut apersorneqarluni isiginnaartunut qanoq oqaaseqarusunnerluni aperineqarpoq. Taama CNN allaaserisaqarpoq.

Akissuteqarami oqaatigaa inuit suminngaanneeraluarunilluunniit ilungersuuteqartassasut.

Victoria Kjær Theilvang qaamasunik nujaqartoq tungujortunillu qalipaatilinnik iseqartoq pinnerneqqisaannerni allani takussaasareerpoq. Ilaatigut Miss Danmark aamma Miss Grand Denmark ajugaaffiginikuullugit. Kiisalu 20-it akornanni Miss Grand Internationalimi toqqakkat ilaanniilluni.

Pinnerneqqusaannermi ajugaasoq Søborgiminngaanneersuuvoq qitittarluulluni. 

Peqataasussat sumiiffigisaminniit peqataanissaanut innersuunneqartarput.

Miss Danmark naapertorlugu pinnerneqqusaannermi isikkoq kisimi pingaartinneqanngilaq.

Ukiuni kingullerni Miss Universemut piukkunnarsartut piumasaqaataat allanngortinneqarsimapput.

Siornatigut 28-nik ukioqarnissamut killiliineq atorunnaarsinneqarpoq, aamma aappaqanngitsuunissaq meerartaarsimannginnissarlu piumasaqaataajunnaarpoq.

Miss Universe nunani tamalaani pinnerneqqusaannermi unammisitsisarnerit annersaasa ilagaat, Miss World 1951-imi pilersinneqartoq aamma Miss Universe 1952-imi siullerpaamik ingerlanneqartoq ilanngullugit.