Aja-hae-jaa-jae. Aja-hae-jaa-jae. Aja-hae-jaa-jae.
Bang, bang-bang.
Aja-hae-jaa-jae. Aja-hae-jaa-jae. Aja-hae-jaa-jae.
Bang, bang-bang.
Tassa Naja Nuka arfineq-pingasunik ukiulik aamma Tupaarnaq
arfineq-marlunnik ukiulik qilaatersortut. Niviarsiaraq qaqortumik tungujortunik
allalimmik kiatilik sequnngeqqavoq.
Aja-hae-jaa-jae. Bang, bang-bang.
Aappaata seeqquni peqillugit siumut peqilaaqqavoq, qilaallu sammivinnut
assigiinngitsunut ammoortittarlugu. Imminut tatigerpasippoq. Niviarsiaqqap
aappaa nukanganerulaartoq malinnaallunilu qungujulasupilussuuvoq.
Katuap inersuaaraaniippugut, Elisabeth P. Rosingillu Kangerlussuarmi
qilaatersorneq pillugu oqaluttuarnerani tusarnaarnissatsinnut piareersimavugut. Saqqummiineq Katuap aaqqissuussaata ”Ileqquvut” ilagaat.
Katuap inersuaaraa inunnik qilaatersorneq pillugu paasisaqarnerorusuttunik ulikkaarpoq. Saqqummiineq Katuap aaqqissuussaata ”Ileqquvut” ilagaat.
Assiliisoq: Paninnguaq Steenholdt
Niviarsiaqqat taakku marluk Elisabeth P. Rosingimit qilaatersornermik
sungiusarneqartarput, taannalu
qilaatersornermi Kangerlussuarmi ukiuni kingullerni qulingiluani meeqqanik
sungiusaasarpoq.
- Qilaatersorneq nunatsinni kinaassutsitsinnut
ilaagami kinguaariinni ingerlateqqittarnissaa pingaaruteqarpoq, Elisabeth P.
Rosing isiginnaarussuarmi nuisasoq oqarpoq.
Taanna niviarsiaqqallu taakku marluk
qilaatersortut Kangerlussuarmiikkamik taamaammat isiginnaarutikkut
nuisinneqarlutik peqataapput.
Elisabeth P. Rosing oqaluttuarluni
aallartippoq.
Ukiorpassuit matuma siorna,
Kangerlussuaq tuttunniarfinngoqqaarmat, nunaqarfik ataatsimoorfiusimasoq
inuillu tuttunniareeraangamik angerlannginnerminni qilaatersorrattarsimasut
oqaluttuarpoq.
Meeraannaanerusut
Elisabeth P. Rosing aallaqqaammut inuusuttunut
utoqqasaanullu qilaatersornermik sungiusaarusussimagaluarpoq, meeqqalli
ileqqumik soqutiginninnerusut paasinarsivoq. Taava meeqqat 14-it inersimasullu
marluk sungiusaanermi peqataasalerput.
- Suleqatigiiseqqissaartarpakka meeqqat,
aqutsisinnaanngorsarlugit piginnaanngorsarlugit. Imminut tatigisunngorsarlugit,
Elisabeth P. Rosing, sunngiffimmini sungiusaasartoq, oqaluttuarpoq.
Ileqqoq
UNESCO-p kulturikkut kingornussanut tigussaanngitsunut allattorsimaffianut
ilaasoq, attatiinnarneqarlunilu ingerlateqqinneqassaaq.
- Qilaatersornermi
piginnaasama kinguaariit tulliannut ingerlateqqinneqarnissaat pingaaruteqartoq isumaqarpunga,
oqarpoq.
Ullutsinni qilaatersorneq inngernerlu assigiinngitsunik susoqarnerani atorneqartarpoq, festivalini aliikkusersuutitut, inatsisartut ataatsimiinnerini ammaanersiornerup nalaani, immikkuullarissumik naalagiartoqarnerani illoqarfiullu iluani sumi tamaani pilersaarutaanngikkaluamik aallartittoqariasaarneratigut, Nunatta Katersugaasivia nittartakkamini allappoq.
Assiliisoq: Leiff Josefsen
Taamaammat
meeqqani 14-iusuni tallimat Nuummi mittarfissuartaarneq pissutigalugu
nunaqarfimmiit nuunnerat uggornaqaaq.
- Annaallugit
oqarusunngilanga. Uagutsinnulli annaasaqaataavoq. Ilai Nuummut nuuttut ataaseq
Tasiilamut nuuppoq. Qilaatersortuaannarusukkaluarput, taamaammat
periarfissaqarnissaat neriuutigaara, Elisabeth P. Rosing oqarpoq.
Saqqummiineq niviarsiaqqat
qilaatersoqqinnerannik naggaserneqarpoq. Taakku
”Ukallip Pisia”, niviarsiaqqat arlaata aataqqiiata inngerusiaa, atorpaat.
Taakkua tunuarsimaaratik inngerneranni inuit
Katuap inersuaaraaniittut imminnut qungujuttarput. Nuan.
- Qaa, illoqarfinnut nunaqarfinnulluunniit
qaaqquniarsigit. Meeqqat meeraqatiminnut maligassiuisutsialaapput. Tunuarsimaanngillat,
imminnut tatigalutillu sapeeqaat, Elisabeth P. Rosingip saqqummiinini
naggaserpaa.
