Quassussuarmut majuarneq

Pippip eqqarsartarneratut eqqarsarpunga: Misilinnikuunnginnakku sapernavianngilara. Taamaammat pisuttartoqatigiit ’Gå væk kræft – livet er en gave’ ilannguffigaakka – taakku Facebookimi quppernerminni nuannisaarluni timimik aalatitsinissamik kajumissaarisarput. Pisuttartoqatigiit ukioq kaajallallugu marlunngornerit tamaasa qaqqamut majuariarlutik ammukartarput. Sila qanorluunniingajak ikkaluaraangat. Oqarasuaatinni app´i atorlugu silasiorpunga: ’Marlunngornermi nal. arfineq-marluk kingorna siallissangatinneqarpoq’. Nuummi aasap immaqa naakkilerpaanga. Ajunngilaq, immaqami ajorluinnassappat tappikunga naluttoqarsinnavoq. Atortut seqernup qinngornerinut sialummulluunniit illersuisussakka nassarlugit Sisorarfiit illutaata eqqanut nal. arferngup-qeqqa apuuppunga. Pisuttartoqatigiit ilagilerpakka. Eqqissillutik pisuttussat immikkoorput – sukkasuumillu pisunniartut nalunaaquttap akunnerata affaanik kingulliullutik aallarput.

Amerlavallaanngilagut. Tine Evaldsen Italiami feeriaqqammersoq Venedigillu kivinnginnerani takunnittoq ilaavoq. Sofie Tittussen aamma ilaavoq, taanna qaqqami ilaanni arpatsilluni ajoquserami unnuap-qeqqata qeqqartoq ajoqusersimasut nakorsiartarfianniippoq, paffimmigullu gipsilerneqarluni:

- Unnullu taanna unnukkorsiorneqarnanga.

Tine Sofielu Quassussuarmi ikinngutigiilerput.

Per Andreasen qimminilu sivisuumik pisuttuarneq nuannariuaannarpaat, qimmiali maanna maani nunarsuarmiikkunnaareermat Per kisimi pisuttuartarpoq. Salomon Jensen allanik pisuttuaqateqarusunnerulluni pisoqataajuaannartoq aamma ilaavoq.

Lene Kleist minutsialuit qaangiummata takkuppoq – sivikitsuinnarmilli uninngareerami sukkangaarluni qaqqakkut qummut aallarpoq. Aappariit Knud aamma Marita Hegelund kingulliullutik takkupput. Uiatali nulii qaangerpaa imalu utoqqatsissuteqarpoq: 

- Arctic Circle Racemut sungiusarpunga. Aappagu ilaarusukkama.

Nulia Maritha sisamassaanik peqataavoq. Taanna sivisuumik uippakajaarluni napparsimasaqattaareerluni nalaasaarfimmiit tassanngaannaq massippoq pisoqataarusulerlunilu:

- Qaqeqqaarama qiavunga. Ajugaanerujussuartut misigaara.

Qaqinniartut tamarmik assigiinngitsunik oqaluttuassartaqarput siunertaqarlutillu. Uanga siunertaraa: Eehm, ilaa, suniartungaana? Qaqqap qaanut qaqerusuppunga, nuannisaqatigiillunilu peqatigiinnernut kuussaanngilanga.

Eqqarsaatit aallartillugit

Qummukarnermi pingasunik aqquteqarpoq, snescooterit aqqutaat saamerlermiippoq, majuartaatip mikinerup nalaa qeqqaniittoq aqqutigillattaarneqarpoq majuartaatillu anginerup nalaani aqqut talerperlermiippoq.

- Aqqutikkut ajornannginnerpaakkuuginnarta, eqqarsarpunga.

Qaqqap qaanut qaqinngisaannassasutut misigisimalerataarpunga, sulili pisoqatinnut malinnaavunga.

Qaavata tungaanut pisunnissarput akunnerup ataatsip missaanik sivisussuseqassasoq Tine nassuiaavoq. Sivikinnerulaanngikkuni. Unamminerunngilaq, taamaattorli qanoq sivisutigisumik majuarsimanerit kilometerillu pisoqatigiit tamangajammik eqqartorpaat. Tassa imaappoq: 440 meterit, akunneq ataaseq, katillugit 3,5 kilometerit missaat.

- Arfineq-marluk missaani ammut apuuttarpugut, ilaanni siusinnerulaartarluni, Per Andreasen inerniliivoq. Aammami taanna niorujussuaqarpoq, uangalu affarmik kalaaliugama niukinneerannguunnera eqqarsaatigaara. Aallaqqaarnerup ajornannginnera naqissussiinnartigu, sinneranilu nissut sulisingaatsiartariaqarput. Qaratsamili eqqarsaateqarnarnerpaasarpoq.

- Qasunarsivallaaraangat allanik eqqarsaateqarit. Eqqarsaatit aallartikkit, Per Andreasen oqarpoq. Eqqarsaatikka aallarput. Aallarnerat eqqumiik, qanormi ilillutik silaannaqaramik? Anersaartornerami ilungersuarpalukujuppoq, siutinnilu tillerneq malugisinnaavara nissumalu nukii siornatigut malugisimanngisaannakkakka sulilersimasut paasivara. Uppatimaana nukissuisa ilaat taqqamunga eqqunnut atasoq malugineriga? Nukimmi kittorannginniassasoq. Soorluluunniit ataqqatulaaginnarpaluttoq.

Mosesip biibilimeersup inatsisit qulit pissarsiariniarlugit Sinai-p qaqqaani uteqattaarnera eqqarsaatigilerpara. Taavalu ujaqqanut allalluni! Pingasoriarluni qaqqamiissimasoq allaqqanngila? Qasusuissimassaqaaq, unillatsiaraangamimita aamma ippeqisarsimaqinerluni?

Isikkivik kusanartoq

Aamma unillatsialaartarpunga: Kakkaak isikkiviup kusanassusersua! Ippeqiitiginiannguarlunga. Allornerit tamaasa Nuuk milliartorpoq. Umiarsuaq takornariartaassuaq tulassimasoq allaanngilaq Lego qaqortuarannguaq, timmisartut mittarfimmi nutaamiittut allaanngillat qarsut aappalaartut mikisuarannguit. Illoqarfik pinngortitarsuarmi mikisuaranngorpoq.

Majuarnitta affaanut killilluta Kim Andersen naapippara, taanna Facebookimi quppernermik oqartussaaqataasut ilagaat, aallartitsisumit illoqarfimmut tikisinneqarsimavoq, Jan-Erik Pedersenimit. Jan-Eriup Facebookimi qupperneq ukiut sisamat matuma siorna kikkunnit tamanit takuneqarsinnaasunngortippaa. Kingorna majuartorpassuit peqatigalugit qasseriaqaluni qaqisareerpoq. 

Kim Andersen ujaqqap saniani nikorfavoq aviisilu tikilluaqqullugu, soorluli qilammut isinngitsoorsimalluni qeqartoq. Suminngaanniiguna puttuteriasaartoq? 

- Ippernat maaniittut qaqinissatta tungaanut malinnavianngimmatigut tuppallersaannarsinnaavakkit. Tappikani ippernat allat utaqqipput, taanna uangalu illarpugut.

- Majuarpaluttutit tusaavara, oqamivoq.

Illaqqippugut, aap, AG-mit allaaserinninniartup majuarpalunnera qaqqap tamarmi tusaasinnaasimassajunnarsigaa eqqarsarpunga. Taanna nassuiaavoq aamma nammineq pisoqataasarnini allatulli peqquteqartoq: timersornissaq, nuannisarnissaq ataatsimoornerlu peqqutigalugit. Pisoqatigiittartut ataatsimoorlutik imminnulli ungasilaarlutik majuartarput – ullumili aviisiniit peqataasoq qimataangaatsiaqqavoq, malinnaarujoorlunili. Imminnulli utaqqillattaartarput imaluunniit pisoqataasut tamarmik ajunnginnersut qulakkeertarlugu. Isigilluarumalu oqilanersagut tappavaningaatsiamiittut takulaarsinnaavakka.

- Queeraq tikikkukku qummut pingajorarterutaanut killissaatit, Lene Kleistip nilliaffigaanga tikkuarlunilu:

- Tappavani ungasinnerusumiittoq napparut containerip sanianiittoq ornissavarput, taanna nangippoq.

Soorluli immaqa sinnattupilulluni arpanniarsaraluni. Isumaqarlunga queeraq tikikkutsigu qaqissalluta. Aatsaavik Quassussuaq majuarakku sakkortunaarlugu qivittupajaatut misigigaluarlunga, taamaattoq naqqani aallarnitsinniit qaava qaninneruleratsigu oqiliallaatigaara, kisianni: suli 100 meteripajaat!

Sukkuaraq nukkannartoq

Eqqarsaatikka qaanni Jiisusip allassimasaatulli erseqqaritsigisimaqinermata Tinep uterpaanga aqqutimalu sinnerani oqaluunniarlunga:

- Qaqiguit suna tamaat puigussavat. 

Sukujuit eqqartorpai, Italia, Maniitsumi qaammat ataaseq qaangiuppat kuisitsinissaq, ukiukkut anorersuartumi majuareerlutik ammut snescooterit aqqutaatigoornermi qarlimi aserornerat, Italiamit angerlarluni timmisartorsimanerup kingunerinik qasunerit aamma qaqqamut pisunnginnermini unnukkorsiorluaqqaartuaannarnini – angerlamullu apuukkaangami kaattuaannarnini eqqartorpai.

Taanna assigiinngitsunik oqaluasaarallartillugu aqqutima sinnera ilungersunarujussuanngilaq. Tassa taanna Facebookimi quppernermi pineqartartoq. Nuannisaqatigiinneq! Taanna qutsavigerujussuarpara. Aamma naak majuarneq nalunaaquttap akunneranik ataatsimik minutsinillu tallimanik sivisussuseqaraluartoq. Kisianni kia tamakku nalilersussagamigit? Aluu, tamatta taamaaliorpugut.

- Qaqilluarit, Kim Andersen sukkuaralliitigaluni tikilluaqqusivoq, Lenelu oqarpoq:

- Kikkut tamarmik aatsaat qaqisut containeri nuuttarpaat.

Tamarmik nipituumik illarput.

P.S. Containeri suli tassaniippoq. Qaqqap qaani napparut 300 meterit missani portutigisumiittoq maliinnarukku takussavat.