Qunusuitsoq mianersortorlu

Miki Siegstad ukiuni 30-nngulersuni iganermik suliaqarsimavoq, aali suli 30-nik ukioqalerani.

29-nik ukioqarpoq igasutullu ilinniarsimasuulluni, kilisaammilu Tuugaalimmi hovmesteritut, tassa iggavimmi pisortatut, sulivoq.

Angutaa Ditlev puammigut kræfterluni toqukkut qimagutiaarsimavoq.

- Toqunngitsiarnermini ilinniarninnik naammassinninnissannik neriorsuisippaanga, Miki, taamanikkut igasutut ilinniarnerminik aallartitseqqammersoq, eqqaamasalikkersaarpoq.

Neriorsuut tamanna eqquutsissinnaakutsoorsimavaa. Miki Siegstadip iganeq soqutigiuaannarsimavaa. Meeraaqqerivimmiinnerminiilli igaffimmiittarnerminik eqqaamasaqarpoq tamatuminngalu oqaluttuunneqartarluni.

- Paarortaleqqaaramali iggavik soqutigilersimavara, qungujorujussuarluni soqutigilluakkani pillugu oqaluttuarpoq.

- Meeraaqqerivimmi sulisut arlaleriarlutik tammaasarsimavaannga, tamatigullu iggavimmi nassaarineqartarsimavunga. Igasoq uannik nerisitsiutigaluni nerisassiortoq isiginnaartarsimavara.

- Tamanna ima nalinginnaatigilersimavoq allaat tammaaneqaleraangama iggavik alakkarneqaqqaartarsimalluni, oqaluttuarpoq.

Soorunami igaffimmiiginnarsinnaanngilaq, kisiannili meeraaqqerivik isaariap eqqaani igaffeeqqamik iffianik taneeqataaffigisinnaasaanik peqalersitsivoq, taamaalilluni iggavimmiikkusuttarnini annikillisarsinnaaniassammagu.

Atuarfimmi mikinerni sunngiffimmi sammisassat toqqarneqarsinnaasut tassaapput ilusilersuineq, sananeq imaluunniit iganeq. Kialluunniit arlaat toqqarneraa eqqoriarsinnaagunarpaa. Iganeq.

- Pingasunngornerit tallimanngornerillu tamaasa sunngiffimmi sammisassanut igajartortarpunga, tamatigullu igaannik amerlanaarilaartarpunga aataakkut aanaakkut nerisassaannik. Takusinnaasarpara nerisassiakka nuannarisaraat. Tassani tiguartippunga, aalajangerlungalu angisuunngoruma igasunngorusullunga. Tamanna nuannarilluinnarpara, aalajangerpungalu inersimasunngoruma igasunngorlungalu, oqarpoq. Meeqqat atuarfiat naammassigamiuk Narsami Inuilimi inuussutissalerinermik ilinniarfimmut qinnuteqarsimalluni oqaatigaa.

Nuummi inissiami quleriit arfineq-pingajuanni najugaqaqqammerpoq, ini tamaat kaajallangajallugu nuanningaartumik isikkiveqarpoq. Tamannali aamma akisuvoq. Ukiumut qaammatit pingasuinnaat najugaqarfigisarlugu akisuallaarpoq, inuuniarnermilu aningaasartuutit maanna ima qaffasippallaalersimatigipput, allaat immikkuullarissumik iliuuseqarniarluni aalajangersimalluni. Ukioq manna Barcelonamut nuuppoq.

Nerisassani tuppallersaatigisinnaasat pitsaanerpaat

Maanna inersimasuulluni igasutullu ilinniarsimasuulluni allanik nerisassiuussineq suli nuannaajallassutigisarpaa. Soorlu aanakkumi aatakkumilu nuannaartittarsimanerattut.

Miki Siegstadip kilisaammi igasuunermi saniatigut suliniut ”Igapall” aallarneeqataaffigaa, tassani kalaallit igasui nerisassiaallu ukkatarineqarlutik. Ukioq manna umiarsuarmi takornariartaammi, untritilippassuarnik ilaasoqartumi, ukiut pingajussaannik suleqatinilu nerisassiorput.

- Aallaqqaammut najoqqutassiaq inissinneqanngilaq, maannali inissipparput. Nerisoqareeraangat ilaasut ornittarpavut kulturerpullu pillugu oqaloqatigisarlugit, ilaanni minutsini 20-ni ilaannilu akunnerit aappaata affaani, oqaluttuarpoq.

Allatut ittumik inunnulli ilisarnartunik assigiinngitsunut mamarisaqartunut nerisassiorniaraanni, nutaaliorsinnaasariaqarpoq.

Isumassarsiorfigisartagaa pingaarnerpaaq tassaavoq igasoq toqukkut qimagunnikoq Anthony Bourdain, aamma eqqarsartaatsikkut peqqissuunissamik suliniuteqarluartoq. Danmarkimittaaq neriniartarfimmi Michelinimik ullorissamik nersornaaserneqartumi Noma-mi igasut isumassarsiorfigilluartarpai, aanaakkulli iggaviat qaangerneqarsinnaanngilaq.

Soorunami aamma tassani qeqarnikooqaaq.

- Aanama nerisassiai mamarersuataarpakka. Nerisassani tuppallersaatigisinnaasat pitsaanerpaartaraat, naqissusiivoq.

- Pingaartumik nalliuttut pissanganarnerusarput, nerisassammi pitsaanerujuaannarmata alapernaaffigilluinnartarpakka. Ikiuussinnaatillunga ikiuuttarpunga, oqarpoq.

Anaanap nerisassiai aamma puiorneqassanngillat. Immikkuullarissuuppummi.

Miki Siegstad igaffimmiiginnarneq ajorpoq.

- Sisimiuni eqeersimaartuuvoq pisoqarfiujuaannartoq. Silami pinnguartarpugut, aammali piffissap ilaani qarasaasiakkut pinnguaatit nutaarsiaapput, taamaammat aamma pinnguaringaatsiartarpugut, oqaluttuarpoq.

Aniinngikkaanni GoldenEye 007, Stronghold aamma Age of Empires Nintendo 64-imi qarasaasiamilluunniit aliikkutarineqartarput.

Massakkumiinnissaq

Miki Siegstad arlalitsigut sapiitsuuvoq. Timmisartornissaq, portusuumiinneq inillu matoqqasup iluaniinneq annilaangagisarpaa. Timmisartullaqqippallaarani nassuiaavoq.

- Ukiorpassuit matuma siornatigut Kalaallit Nunaanni angalassagaangama Sarfaq Ittummiinnaq angalasarpunga, oqarpoq. Silarlutsillugulu timmisartornermiit umiarsuarnik allaanerusumik qisuariarfigisarnerarlugu.

- Sinilluartarpunga.

Ullumikkut timmisartornissamut, portusuumiinnermut ininullu mikisuniinnissaq suli annilaangatigisarpaa, iluaallaaminikuullunili. Massakkumiinnissamik eqqarsartaaseqarnini iluaqutigaa.

- Kigaallassaaserlunga marloriarlunga pissinnikuuvunga. Siullermik Hawaiimi 2017-imi. Ajunngitsumik ingerlavoq, ikinngutimalu ilaasa allaaserisaq nassiummassuk killormut saappoq. Hawaiimi timmisartoq qulinik ilaasulik timmisartortartunillu marlunnik ilaasoqartoq nakkarsimavoq. Tamarmik ingerlaannaq toqupput. Suliffeqarfik taannaavoq, timmisartoq taannaavoq sulisullu taakkoqqissaat nakkarsimapput. Tamanna ersissutigeqqilerpara, Miki oqaluttuarpoq, taannalu 2021-mi kigaallassaaserluni pisseqqippoq.

- Nuannersuaarpoq. Qummukaarnitsinnili qarsoriartuaarpunga, oqarpoq eqqaamallugulu qutsissumiinnermik ersigisaqarnerluni aperineqarami ingerlaannaq "naaggaarsimalluni“, naak qunuginera takuneqarsinnaagaluartoq.

Ersisarnini annikillisinniarlugu iliuuseqarusuppoq, ilaatigut ikiortissanik atuinikkut.

- Youtubemi kanaleqarpoq Yes Theorymik taaguutilimmik. Toqqissimaffigisamiiginnannginnissaq oqariartuutigineqarluni, oqarpoq. 

Miki naalattoq

Miki Siegstad ulapittorujussuuvoq, meerartaarnissaminullu piffissaqarsimanngilaq.

- Sulingaatsiarlungalu angalakulavunga, nassuiaavoq.

Aperineqarami igasorpalaarluni akivoq:

- Aap, qujanaq, meerartaarusunnerluni aperineqarami akivoq.

Angajoqqaaminit pigisani allanut ingerlateqqikkusuppai.

- Maniguuttuusariaqarpugut, inunnik pinngortitamillu ataqqinnittuusariaqarluta kikkullu tamaasa assigiimmik pisassallutigit, pisortaagaluarpat erruisuugaluarpalluunniit, oqarpoq.

Angutaata, 16-inik ukioqarlunili aalisartuullunilu piniartuusimasup, pinngortitamik ataqqinninnissamik, eqqagassanik igitsisarnissamik nerisinnaasallu sinnerlugit pisaqannginnissamik ilinniartippaa.

- Nerisinnaasat sinnerlugit pisaqaraanni, taava pisariaqartitsisunut agguaanneqassapput, ajoqersuut taama nipeqarpoq.

- Anaanaga tamanut ikiuiuaannarpoq, najuuttuaannarpoq.

- Taamaattuunerat nuannarilluinnarpara, oqarpoq.

Angerlarsimaffik ammavoq ikinngutaalu tamarmik tikilluaqqusaapput. Aatsaat inuusuttuaranngorami kammattaartorpoq. Meeqqat atuarfianni ukiut siulliit taamaaqatiminik kammaqarpallaanngilaq, imminullu naalattutut taavoq.

- Ukiuni siullerni ikinngutiginerpaasara tassaavoq atuarfiup pisortaa, nipituumik illarluni oqarpoq. Naalannerusoqarsinnaanerluni, nipituumik illarluni oqarpoq.

Ajoraluartumik aamma tamanna qinngasaarneqartarneranik kinguneqarpoq.

- Isumaqarpungali nukittunerulerninnut iluaqutigisimallugu, ingammik suliffimmi matumani timikkut tarnikkullu ilungersunarsinnaasumi. Ingammik tarnikkut. Naak nuannersorpassuaqaraluartoq piffissap ilaani suliffik aserorsaarisorujussuusarpoq, Miki Siegstad oqarpoq.