Qallunaat nipilersortartut arlallit eqqumiitsuliortullu Kalaallit Nunaanniissimapput, ikittuinnaalli tv-2-tut Kalaallit Nunaannut qanittumik attaveqarsimapput.
- Arlaatigut eqqumiitsumik immitsinnut Danmarkip Kalaallit Nunaatalu akornanni ikinngutigiinnikkut atassutilittut isigisarpugut. 1988-imi siullermeerluta Kræftimut Akiuiniarnermut aningaasanik katersuiniartoqarnerani Nuup Timersortarfianut tusarnaartitsiartorattali taamaappoq, erinarsortartoq Steffen Brandt oqarpoq.
Qallunaat nipilersortartut arlallit eqqumiitsuliortullu Kalaallit Nunaanniissimapput, ikittuinnaalli tv-2-tut Kalaallit Nunaannut qanittumik attaveqarsimapput.
- Arlaatigut eqqumiitsumik immitsinnut Danmarkip Kalaallit Nunaatalu akornanni ikinngutigiinnikkut atassutilittut isigisarpugut. 1988-imi siullermeerluta Kræftimut Akiuiniarnermut aningaasanik katersuiniartoqarnerani Nuup Timersortarfianut tusarnaartitsiartorattali taamaappoq, erinarsortartoq Steffen Brandt oqarpoq.
Nipilersoqatigiit 1980-ikkunni saqqummersitaasa nuannarineqarluartut ilaat, „Nærmest Lykkelig“, pillugu taamanikkut aviisini allassimasoqarpoq. Videoliorniarlutik Sermersuarmut angalasimapput, ilumut avannarpasissumiissimanerat nunaqqataasa takusinnaaniassammassuk.
Taamanimiilli nipilersoqatigiit Kalaallit Nunaanniittuartarsimapput. Aap, ima amerlatigisimapput allaat qasseriarlutik maaniissimanertik nalullugu. Nipilersoqatigiit namminneq naliliipput 35-riarlutik maaniissimallutik. Qanittukkut Kalaallit Nunaanni tusarnaartitseqqissapput, tamatumuuna Nuummi Hotel Hans Egedemi tallimanngornermi novembarip 29-anni.
Kalaallit Nunaanni tusarnaartitsisarnerup suna immikkuullarissutigaa?
- Danmarkimi tusarnaartitsinissaq festertitsisarnerlu ajornartorsiutigineq ajorpavut. Kalaallit Nunaannili festerneq immikkuullarilluinnarpoq. Inuunermik nuannaarutiginninnertut ippoq, allallu qanoq eqqarsarnerannut attuumassuteqanngitsutut aniatitsinerulluni. Uagut tusarnaartullu pillugit kiffaanngissuseqarneruneq, Steffen Brandt nassuiaavoq.
Nissebandet i Grønland
1988-imiilli pisoqarnikooqaaq, minnerunngitsumik Kalaallit Nunaanni. Pisussamut pingaarutilimmut tullermut, tusarnaartitsinissaq ullormik ataatsimik sioqqullugu Nuummut toqqaannartumik timmisartuussinermut siullermut, tv-2 bilitsisisimavoq.
Ineriartornerit tamarmik ajunngitsuujuaannanngitsut, Danmarkimi qanittukkut aalajangiussaq pillugu Steffen Brandt oqarpoq.
- Aap, ukioq manna Kalaallit Nunaannut juullimut inuulluaqqusineq unitsinneqarmat uagut aamma sunnertippugut. Kalaallit eqqumiitsuliortut takusinnaajunnaaleratsigit inuillu ilisarisimasavut ilisarisimanngisavullu inuulluaqqusisut tusaasinnaajunnaassagatsigit. Uggornarpoq inunnik ataqatigiilersitsisartoq aammalu Danmarkip Kalaallit Nunaatalu kulturikkut ataqatigiinnerannik eqqaasitsisartoq pillugu DR aningaasanik nassaarsinnaasimanngimmat, Steffen Brandt oqarpoq.
- Tamanna unitsinneqarnissaminut pingaaruteqarpallaarpoq, uagullu arlaatigut Kalaallit Nunaata Danmarkillu akornanni pisortatigoortumik attaveqaataavugut. DR-ip juullimut inuulluaqqusinissaq maanna aallakaatikkumajunnaarmagu, tv-2- aallakaatitserusuppoq, erinarsortartoq neriorsuivoq.
tv-2-p nipilersugassiaani juullisiutinik nassaassaqarpallaarunanngilaq?
- Naamik, eqqissinermilli nassataqassaagut ... silaannarmillu kialaartumik!
Juullisiutit amigaataassappata tv-2 Kalaallit Nunaat pillugu erinarsuuteqarpoq, kalaallillu nipilersortartut arlallit tusarnaartitseqatigisarsimavau.
2013-imi Tv-2 Nina Kreutzmann peqatigalugu.
Assiliisoq: Leiff Josefsen
Minnerunngitsumik kalaallit toqqaannartumik tusarnaartitsinerannit saqqummersitaq 'Greatest Greenland – Sæler, hvaler og solskin (Kalaallit Nunaat Nuannarisara)’, tassani Nukâka Coster-Waldau, Christian aamma Frederik Eisner, Nina Kreutzmann, Malik Hegelund Olsen, Maasi aamma Peter Hammeken peqataapput.
Taakkuali ilaat novembarip 29-ani tusarnaartitsinermi kalaallisut tusarnaartitsissanersut Steffen Brandtip oqaatigerusunngilaa:
- Kinaanersoq tupaallannartuussaaq, kinaanersorlu takujumallugu inuit orniguttariaqarput, immaqalu aamma maani ikinngutitaassaagut, ilassuteqarpoq.
Kulturikkut tupaallanneq nuannersoq
Steffen Brandtip Kalaallit Nunaat nipilersoqatigiillu Kalaallit Nunaannut attaveqarnerat eqqartoraangagit ataatsimoorneq eqqaajuartarpaa. 1988-imi tikeraarnerat siulleq eqqartoratsigu tamanna aamma erserpoq. Sermersuarmi misigisaq nillataartoq Steffen Brandtip eqqaamalluarsinnaavaa. Kingumulli qiviaraangami aqqutaani misigisaat kissarnerusoq maluginiarnarnerusarpoq.
- Qulimiguullip Kapisilinnut niuaatigut, kangerluup qinngorpiaanut. Tassani oqarput Ingerimut majuaannassasugut. Suna, aperivugut. Aap, kasuttuinnassaagut aperalutalu kaffiuteqarnersoq. Taava kalaaleq arnaq Ingerimik atilik takkuppoq, ingerlaannarlu kaffimik tunivaatigut pattagiatoqqanilu atukkiullugu.
- Inoroorsaarneq taamaattoq kulturikkut nuannersumik tupaallaatigaarput, arnammi takornartaalluinnartup ilaqutaasalu kaffisortitsinermut isersarmatigut, ualerlu tamaat oqaloqatigiillutalu erinarsoqatigiikkatta. Tamanna nuannaringaarparput.
Tamannalu pissutigalugu tv-2 uteqqittuarpoq kujataanilu Nanortalimmit avannaani Uummannamut, sumiiffinnilu taakkua akornanniittuni immaqalu siunissami suli amerlanerusuni tusarnaartitsilluni. Eriagisassaqarpormi, nipilersornerlu inunnik nunanit inuttullu tunuliaqutanit assigiinngitsuneersunik ataqatigiilersitsivoq.
- Kulturip killeqarfinnut aaqqissuussaanermullu attuumassuteqannginneranut tunngavoq. Inunnut attaveqarnermut tunngavoq. Uagutsinnut Kalaallit Nunaannullu tunngaannanngilaq... immaqa silarsuarmi inuit akornanni paasinninnissaq aatsaat taama pisariaqartinneqartigileqqavoq. Ullumikkut siunissaq neriulluarnarpallaanngilaq, Steffen Brandt oqarpoq.
- Maannali anneruniajuilluta Kalaallit Nunaat juullimi inuulluaqqusinnaavarput!
