Timersorneq nakorsaatigaara

Allattaavik tungujortoq taartoq Perfi Fleischerip nerisarfimmi nerriviata qaqortup qaavaniippoq. Aviisinit qiortagarpassuit qanganitsat tassaniippoq.

Ataataata Ove Karlip Perip aviisimiinneri tamaasa qiortartarsimavai ukiullu arlallit ingerlanerani katersorlugit toqqortarsimallugit.

”Timersortartut tallimat marloriaammik pissartanngorput”, ilaatigut aviisini qiornerni allassimavoq. Atuakkamili issusuumi aamma assit takuneqarsinnaapput. Assimi qalipaateqanngitsumi Peri inuusuttoq titarnernik allalimmi tujuuluaralik takuneqarsinnaavoq.

Allattaavimmi sulorarnermi assaannermilu inuunerani tamarmi timersortartuunera takuneqarsinnaavoq. Assit arlaanni Peri ilaqutaalu takuneqarsinnaapput, angajoqqaavi qatanngutaalu pingasut.

Peri assilitinnermini qungussarippoq. Inuunermi piumassuseqarluarneq qungujunnerata tunuaniippoq. Inoorusunneq annertooq – inuunermik tamakkiisumik misigisaqarusunneq. Inoqatinut tunniussaqarumaneq, piffissap ilaani inuuneq atornarsinnaagaluartoq, taamaattoq siunissaq qaamasumik inunnut oqarusussuseqarneq.

Peri Fleischer ulloq 15. juli 1981 nunatsinni illoqarfiit annersaasa tullianni Sisimiuni inunngorpoq. Anaanaa Taavannguaq Fleischer Sisimiuneersuuvoq. Nakorsamut allattaasimavoq, maannalu soraarninngorsimalluni. Ataataa Ove Karl Fleischer Assaqutarmiuuvoq, nunaqarfik Sisimiut eqqaaniittoq inuerunnikoq. Ataataa alianaqisumik 2005-mi ajunaarpoq. Perip meeraarnerani niuernermi namminersortuuvoq.

- Ataataga nuannaartorisorujussuuara, ullumikkullu ataatattullu ikkusuppunga. Ullut tamaasa maqaasisarpara, taanna oqarpoq.

Peri Fleischersip eqqaamasai siulliit Narsami pipput, taamanikkullu marlunnik ukioqarpoq. Sisammiinissaata tungaanut ilaqutai nunatta kujataani najugaqarput.

- Narsarmi qimmiaqqamik malersortinnera eqqaamasanni siullersaavoq. Ernumanera pissutigalugu sapinngisara tamaat arpallunga eqqaamavara, Peri Fleischer oqaluttuarpoq.

Arsarnermut nuannarinnilernerata aallartinnera piffissami matumani aamma aallartippoq.

- Ataataga Narsami arsaqatigalugu eqqaamajuaannarpara. Ataatama arsaq tukerujussuaramiuk qummut tamaat, uanga isinniit qilammut tammartutut ililluni. Tupigusullunga taamani, Peri Fleischer oqarpoq.

Ukiut marluk kujataani illoqarfimmeereerlutik ilaqutariit Sisimiunut uterput. Perillu meeraanermi sinnerani Sisimiuniippoq.

- Inuuninni piffissat nuannernerpaat ilagaat. Aqqartarfimmi blok 3-mi najugaqarpugut, meerarpassuillu aqqusinermi tassani najugaqarput. Nuann! Ukioq kaajallallugu arsartarpugut, toqqortaattarluta, eqqaaviullu puussiarsui atorlugit sivingasuukkut sisorartarpugut, Peri Fleischer, qatanngutigiinni sisamani nukarlermut tulleq oqarpoq.

Arsaanneq

Peri Fleischerip ukiukillunili arsartalerpoq. Illoqarfiup arsaattarfiani silami arsartarnerup saniatigut, arfineq pingasut missaannik ukioqarlunili SAK-mi ilaasortanngorpoq.

- Ittoorlungalu tunuarsimaaqalunga eqqaamavara, suniussilertorpungali, taanna oqarpoq. Peri qulinik ukioqarluni siullermeerluni nunamut allamut arsippoq. Danmarkimut Sverigemullu inuusuttunut arsaakkiarpoq. Sverigemi quliliivoq. Taamanikkut inuit 30.000-t missaat arsaattarfimmi najuuttoralugit ammaanersiorlutik isaapput.

- Arsaqatima ilaata oqarfigaanga: ” Peri inuuinni pilluarit. Aajuku inuit qaaqqusatit.” Ulloq puigunaaqaaq, Peri Fleischer oqaluttuarpoq.

Tassani arsaannermik tiguartippoq. Ataatsimoorneq arsaqatigisartakkanilu nuannarai. Siunnerfiliivoq ullullu tamaasa sungiusartalerluni. Timersorneq pingaarnersanngortippaa.

- Ataata angalaqataarusunnersunga aperigaangat itigartittarpara, sungiusarusunnerusarpungami. Inuuninni initoorujussuanngoriartorpoq, Peri Fleischer oqarpoq.

Sisimiuni meeqqat atuarfiat naammassigamiuk Grenåmi arsaannermut kostskolemiikkiartorluni Danmarkiliarpoq. Tamanna 1998-mi pivoq. Fodboldskolillu kingorna illoqarfimmi tassani sportscollegerpoq.

- Arsarneq kisiat aallutaraara. Timersoraangama timinni tarninnilu iluarisimaarnerujussuaq misigisarpara. Tamanna meditationitulli uannut ippoq, Peri Fleischer oqaluttuarpoq.

Grenåmiinnermini siullermeerluni nunatta nunanut allanut unammisartuinut ilaatinneqalerpoq. Taamanikkut 18-nik ukioqarpoq.

- Sinnattoq piviusunngorpoq. Anguniarsimasara, anguaralumi, taanna oqarpoq

Arnaq asannilerfia

Peroriartornerata nalaani ataataata Sisimiuni pisiniarfiit ilaat pigai. Suligaangat Perip akuttunngitsumik ilagisarpaa. Taamaammallu alloriarnerup tulliatut Svendborgimi niuernermik iliniassalluni toqqaanera pissusissamisoorpoq.

- Ilinniarnerma ingerlannerani arsarnermik sungiusarsinnaallunga paasivara, taamaammallu periarfissara akorpara. Sungiusaatigalunga ilinniarpunga, tamannalumi uannut pitsaalluinnarpoq, taanna oqaluttuarpoq. Ukiuni marlunni Svendborgimeereerluni, atisaarniarfimmi praktikkissalluni Sisimiunut uterpoq. Taamanikkut 2003-uvoq. Praktikereernermini Danmarkimi ilinniarniarluni uternissaa pilersaarutaagaluarpoq.

- Arnarli pinnersorujussuaq inequnartorsuarlu naapippara, pilersaarutillu allanngorput. Marlunnik meeraqarpoq, peeraliilerpugut kingornalu katilluta, Peri Fleischer oqaluttuarpoq. Aappariit Peri Pipalullu aamma kingorna 2009-mi 2010-milu marlunnik meerartaarput, niviarsiaraq nukappiararlu. Zico Inunalu.

Ilinniarnermi pilersaarutai allamut sangupput, Qaqortumilu butiksassistentitut ilinniarpoq.

- Nuliaralu anæstesisygeplejerskitut ilinniarusulerpoq, Danmarkimilu Viborgiliarpugut, taanna oqarpoq.

Peri Fleischer Viborgimi sulillunilu arsartarpoq.

Nulia ilinniakkaminik naammassimmat Nuummi qaammatini arfinilinni najugaqarsinnarlutik Sisimiunut ilaqutariit nuupput. Butikassistentitut ilinniarnini naammasseqqammivaa, sumullu ilinniaqqissanerluni suli ilisimarpiarnagu.

Arsarsinnaatilluni timiminillu aalatitsisinnaatilluni nuannaartarpoq. Ilinniagaqarusupporli. Ilaqutariit poortueqqissinnarlutik Danmarkiliarput, Perimi ilinniagaqassalluni aalajangerpoq. Københavnimi handelsskolemi ilinniarpoq naammassillunilumi. Nuummut uteqqipput, tassanilu akademiuddannelsenimi ilinniarpoq. Tamanna 2011-mi pivoq.

Piffissap tamatuma missaanni arsaattartut klubbiat IT-79, ukiunik qulileeqqammisoq aallartippaa.

Arsaattartutut allartippoq, ullumikkullu sunniusaasuullunilu siulersuisuni siulittaasuuvoq.

- Ernerma arsaattartoqatigiinnik aallartitsinissannik kaammattorpaanga, taamaalilluni nammineq klubbimi aallartissinnaaniassagami. Taamanikkummi ukioqataanik holdeqanngilaq, taanna oqaluttuarpoq.

Suut tamarmik allanngorput

Tassanngaannarli Peri Fleischer nutaamik misileerusuleriasaarpoq. Suliffini allanngortippaa kilisaammiunngorlunilu.

- Suliannit tamanit allaanerujussuarmik suliaqarusuleriasaarpunga. Nuannareqaaralu. Suleqatigiinneq, suleqatillu, taanna oqarpoq.

Perfi Fleischer asasaminik nuliaqarpoq, taakkulu asaqisaminnik sisamanik meeraqarput, kilisaammiinnerminilu aningaasarsiorluarpoq. Inuuneq torraaneroqqissinnaanngilaq.

Inuunerli Perimut allaanerusunik pilersaaruteqarpoq.

- Imaannarsuarmi kilisaammiillunga sianerfigitippunga. Nuliara toqusimavoq. Meeqqakka ornikkasuarsinnaanngilakka najorsinnaanagillu, imaannarsuarmiippungami. Ajoqaaq iliuusissaaleqisorujussuuvungalu, taanna oqaluttuarpoq.

Peri Fleischerip nulia tassanngaannaq taqqaminik milittoorluni toquvoq.

- Qiimallunilu peqqippoq. Ilimananngilluinnartumillu toquvoq, taanna oqarpoq.

Peri Fleischerip siunissamut takorluugaa tassanngaannaq aserorpoq.

- Ullormit ullormut inuuvunga. Qaammatini arfinilinni sunngivippunga. Meeqqat isumagaakka, atuariartortittarlugit, angerlarlungalu qiasarlunga, taanna oqarpoq.

Ullut qaammatillu ingerlapput. Peri Fleischerip inuunera kigaatsunnguamik ingerlaqqikkiartulerpoq. - Qanigisannut aliasunnera ammasumik aniatittarpara, imminullu aliasussinnaatippunga, maqaasitippunga. Meeqqannut ammasumik eqqartortarpara, timersornerlu ingerlallugulu pinngortitami arpattarpunga. Timersorneq nakorsaatigivissorpara, Peri Fleischer oqaluttuarpoq.

Inuuneq nutaaq – kapitali nutaaq

Ullumikkullu inoorusussuseq uteqqippoq. Meeqqat inuusuttuaranngorput ikinngutitillu timersornertillu inuuneralugu. Peri Fleischer aappartaarpoq.

- Asannileqqissinnaanerlunga naluara. Allaanngilaq putsersumit taartumillu amugaanga. Siunissamut takorluuisinnaanngoqqippunga, taanna qungujulluni oqarpoq.

Peri aappaalu Arnaq aasaru meerartaassapput.

- Inoorusuppunga inuullungalu misigerusuppara. Aap, nuliara toquvoq, toqoqatiginngilaralu. Meeqqakka perorsartussaavakka, taamaalillutik aamma nunarsuarmik misigisaqarlutillu qaamasoqartuaannarneranik ilikkagaqarsinnaaqqullugit, taanna oqarpoq.

Ullumikkut arsaqatigiinnik aallartitaminik sungiusaaqqilerpoq. Maannakkut U18-nik.

Peri Fleischer ukioq manna Maligassiuisut Showimi “Ukiup sungiusaasuatut” sungiusaasoqatini Peter Davidsen Hardenberg peqatigalugu toqqarnerpoq, ullormilu timersorfimmi januaarip arfernani Kommuneqarfik Sermersuummit ”Ukiup aqutsisuatut” toqqagaavoq.

- Nersornaaserneqarnera innersuunneqarneralu qujamasuutigeqaakka. Inuiaqatigiinnut tunniussaqarninnik takutitsinera nuannarinerpaavara, tamannalu uannut pingaaruteqarpoq, taanna oqarpoq, imalu itisiliilluni:

- Inuunerup oqitsuinnaannginnera, pitsaasunngoqqittarneralu takutikkusuppara. Inuussaagut, sapiaassuseqassaagut, immitsinnut ajunngitsuliorfigisassaagut. Uanga taamaasiorsinnaaguma aamma allat taamaasiorsinnaapput, taanna oqarpoq.

Peri Fleischer sungiusanngikkaangami igaffimmi arlaannik sammisaqarujoorneq kinguleraliornerlu nuannarai. Minnerunngitsumillu tiitorneq ingefærinik nutaanik akullugu.

- Kaagiliorneq nuannareqaara! Ulloq uiverfiusinnaasoq atoreerlugu igaffimmi eqqissisarlunga islandsk kagiiorneq nuannareqaara, Peri Fleischer qungujulluni oqarpoq.