Tusarnaagassat nutaat
Nukannguaq Kajussen nipilersukkanik EP-mik erinnanik arfinilinnik imaqartumik saqqummersitsivoq. Erinnat siammasissumik oqariartuuteqarput, soorlu ulluinnarsiutaanerusunik
imaqarlutik.
Foto: Gerth Lyberth
Nipilersuutinik nuannarisallit aanna tarnitik qiteqatigisinnaanngorpaat.
Nipilersortartoq, Nukannguaq Kajussen, juulip ulluisa 16-anni nipilersukkanik nutaanik EP-mi saqqummersitsivoq.
Nukannguaq nipilersukkatigut EP-mik saqqummersitseqqammerpoq, erinnanik arfinilinnik imaqartumik. Erinnat siammasissumik oqariartuuteqarput, taamatuttaarlu ulluinnarsiutaanerusunik imaqarlutik.
Saqqummersitsineq Nukannguup kisimiilluni saqqummersitaasa pingajoraat. Nipilersukkallu alternative blues rockiullutik.
Nunarsuarmi bluesimik nipilersullammak saqqummersitseqataavoq
Nukannguaq Kajussenip kisimiilluni saqqummersitsigaluartoq nipilersortartut tusaamasat suleqatigai. Ilaatigut Eric Gales USA-meersoq bluesimik guitarertartoq erinarsortartorlu erinarsuummi “Taassumalu”-mi guitarertoq tusarneqarsinnaavoq.
Aamma nunatsinni nipilersornikkut isiginnaartitsisartutullu nalunngineqarluartoq Angunnguaq Larsen erinnami "Immeraatigisutut"-mi guitarerpoq.
Erinaq tusarnaaraanni tusaaneqarsinnaavoq erinnap isornartorsiuisutut qaqilerisut, ilaatigut naalagaaffiup inuiannut pissusilersuutigisarsimasai kusanarnerpaanngikkaluartut, soorlu spiralilersuineq, meeqqat misileraatigineqartut, allallu naalagaaffiup inuiannut Kalaallinik minnerutitsisutut pissusilersuutigisarsimasai sammillugit, Nukannguaq Kajussen tusagassiuutitigut nalunaarummi nassuiaavoq.
Erinnami "Pikialaaqisa"-mi Maaliannguaq Petrussen erinarsorpoq.
