Ukioq manna nersornaat pissarsiaraat

Nuummi kulturip illorsuani Katuami Hans Lyngep inersua inunnik nipilersornermik nuannarisalinnik ulikkaarsimavoq, taakkulu ukiumut nipilersornermut nersornaasiinermut Koda Awardsimut isiginnaariartorlutik takkussimapput.

Steen aamma Kaali Olsen tasiorput. „Ukiumut nersornaasiuttakkamik“ kikkut pissarsisimanersut nalunaarutigiliivippaat.

Birte Olsenip scenemiit toqqaasimanerminnut tunngavilersuutertik oqaluttuaraa. Taanna nersornaasiinermut ataatsimiititaliami ilaasortaavoq.

- Nipilersukkat assinik misigissutsinillu tusarnaartut eqqarsalersitsisunik pilersitsipput: ‘Uanga kisimiillunga taamatut misigisarsimanavianngilanga,’ oqalugiaammini ilaatigut oqarpoq.

Steen aamma Kaali Olsen pissangapput. Ilumut qaammatit marluinnaat matuma siorna saqqummersitatik ajugaassutigisinnaavaat?

Imminnut ilisarisimalluarput, illoriikkamimmi. Ukiorpassuarni nipilersoqatigiinnikkut suleqatigilernissartik oqaloqatigiissutigisarsimavaat. Kaali Olsen nipilersoqatigiinni nersualaarneqarluartuni ”Kalak”-kunni erinarsortartutut guitarertartortullu ilisimaneqarpoq, aammali ukiorpassuarni nipilersortartunut allanut taalliortarsimalluni.

Steen Olsenip tusaamasat arlallit suleqatiginikuuai, saqqummersitanullu arlalinnut teknikeritut nipilersortartutullu peqataasarluni.

Maanna nuuteraliartik “Illerngit aqqutivut” saqqummersippaat, taannalu UjaRockimik taaguuteqarlutik, qaammatit marluinnaat matuma siorna 2024-mi novembarip 16-ianni, saqqummerpoq. Taallat tamarmik Kaali Olsenimit allanneqarput, taassumalu nuliani, Arnaq Grønvold, taallat ilaannut ikiortigaa.

Kaali Olsenip erinarsuutit amerlanersaat taalliorpai, Hans-Peder Barlach Christensenillu erinarsuut ataaseq erinniorlugulu allat marluk erinnioqataaffigai. Steenip erinarsuutit tamaasa immiuppai, taakkulu nammineq immiussivimmini Sisimiuniittumi immiuppai.

Steen ullaakkut makikkami pissangavallaanngilaq. Ileqquusumik ullaakkut kaffisornissani pingaartinneruaa. Ullup-qeqqasiornissalli nalaani pissanganera qaffakkiartulerpoq.

Katuamut iserami qungujusunik nuannaartunillu tikilluaqquneqarpoq. Kodami sulisut Danmarkimeersut Koda Awardsimilu nersornaasiisartut tikilluaqquaat.

Kaali minutsialuit qaangiummata aamma apuuppoq. Tamarmik guitaritik qernertumik ninngusuumillu puullit nassarpaat. Akunneq ataaseq qaangiuppat nipilersorlutik misiliissapput, tamannali sioqqullugu ullup-qeqqasioqqaartussaapput.

Katuap neriniartarfia ulikkaarmat Pascuccimut, sanilerisaaniittumut, nuupput.

Killilersuinngitsoq

Illoriit qaammatit marluinnaat matuma siorna saqqummersitsigamik Koda Awardsimi ukioq manna ajugaasussatut innersuunneqarnissartik takorloorsimanngilluinnarpaat.

- Suna tamarmi sukkasuumik ingerlavoq, Koda Awardsimilu innersuunneqarnissarput takorloorsimanngisaannarparput, taamaakkaluartoq qujamasullutalu nuannaarutigeqaarput, Steen Olsen ullaakkorsiornermi oqarpoq.

Erinarsuutaanni inuunerup assigiinngitsutigut — nuannersortai nuanniitsortaalu — sammineqartarput. Kinaassutsit, akuerineqarsinnaaneq, asanninneq, uumissuineq, qinngasaarneqartarneq ilaajunnaarsitaanerlu ilaatigut erinarsuutigineqarpoq.

UjaRock-imi meeraanermi, inuusuttuunermi inersimasuunermilu piviusut oqaluttuarineqarput. Erinarsuutit aamma uppernermik, neriunnermik inuiaqatigiinnilu inissaqartitsisuni ataqqeqatigiinnermik akuersaarnermillu tunngaveqarluni inuunermik pitsaanerusumik takorluugaqarnermik oqariartuuteqarput.

Kaali ukiut arfineq-pingasut matuma siorna taalliulerpoq.

- Nammineq misigisimasakka taalliarisarpakka. Assersuutigalugu meeraallunga qaamasuugama qinngasaarneqartarnera. Misigisakka inuttut qanoq ittuuninnut sunniuteqangaarsimapput, taakkulu killilersuinanga taalliarisarpakka, Kaali Olsen oqaluttuarpoq.

Nersornaasiinermi erinnamik ataatsimik atuisussaapput. Erinarsuut toqqarsimasaat eqqarsaatigilluaqqaarneqarsimavoq, isumaqarpullu ullumikkut pissutsinut naleqqulluinnartoq.

- Nunat akornanni avissaartuuttoqangaatsiarpoq, isumaqarpugullu erinarsuut “Takunnissinnaaqqullunga” tulluarluinnartoq. Inunnik allanik nakkarsaanngikkaluarluni nammineq inuttut inoqatinut qanoq pissusilersornerup takuneqarsinnaanissaanut tunngavoq, Kaali Olsen oqaluttuarpoq.

Unnukkut pissanganarnerujartuinnarpoq. Illugiit nererusussuseqanngillat. Arnaq tungujortumik kavaajalik sanioqqukkami Steen Kaalilu cafémi inuppassuit akornanniittut isigiitigalugit inussani paarlappai.

- Iluatsitsilluarisi, oqarpoq qungujorujussuarlunilu.

Tusarnaartut arlallit qisuariarput. Ilaasa aqqusinermi unitsillugit taalliaat pillugit qujasarput.

Kodami nersornaasiinissamut toqqaasartut ilaatigut uku tunngavigaat:

“Eqqarsalersitsisunik erinarsuusiorlutik piviusorsiortunillu taallaqarlutik tusarnaartut misigisaannut assingusunik pilersitsisarput.”

- Erinarsuutit qamuuna kissalaarnartut misigissutsikkullu inissitaqarnartut inuit ilaatigut oqaluttuartarput. Arlallit qujamasuttorujussuupput, Kaali Olsen oqaluttuarpoq

Upperiuminaattoq

Nersornaatisisut taaneqangajalermata Katuami nipaannera pissanganaqutaaqaaq. Innersuunneqartut allat marluk, Tûtu saqqummersitani ”Ikumaqatigiitta” pillugu aamma rappertartut Toornat saqqummersitartik ”Toornat” pillugu, illoqarfimmiinnginnertik pissutigalugu isiginnaarussuakkut peqataapput.

Illugiit sanileriillutik issiaqatigiittut ataatsimiititaliap tunngavilersuutai ilisarisiinaaleriartorpaat.

-”Ukiumi nersornaatisisuuppullu … UJAROOOCK!”, Birte Olsen nilliavoq.

Kaali nassuiaruminaatsumik misigivoq. Inuit pattaallutillu qungujulapput. Isiginnaartut ilaat Kaalimut suaarpoq:

- Kiisami!

Kaali Steenilu nersornaat tiguniarlugu scenimukarput. Steenip qullini kiinnamigut kuuttut allarterpai.

- Kakkaak, Qujanapilorujussuaq. ”Koda Awardsimut” innersuunneqaratta tulluusimaarpugut kisianni nipilersortartorpassuit pikkorissut amerlanermik nunatsinni, taamaammat nersornaatisinisinissatsinnut ilimasuppallaanngikkaluarpugut, Kaali Olsen scenemi ilaatigut oqarpoq.

Inuit pattaallutillu avaartaattut issiavimminnut uterput. Suli nersornaasigaanertik upperinagu.

- Tulluusimaarlutalu nuannaaqaagut. Upperiuminaappoq, Steen Olsen oqarpoq.

Nersornaasiineq naammassimmat nipilersoqatigiit nuuteralioqqinnissartik oqaatigaat.

- Nuuteraliatta tullia aallatereerparput. Eqqartorpallaarsinnaanngilarput, taallaali inuunermi aqqusaakkanut aamma tunngassasut oqaatigisinnaavarput, Kaali Olsen oqarpoq.