Ukiuni marlunni angalaneq naammassivoq: Poorskip qeqertaanut angerlamullu
Dorthe aamma Jens Erik Kjeldsen sivisuumik angalareerlutik, ilaatigut Poorskip qeqertaa tikeraareerlugu, Nuummut ataasinngormat tikipput.
Jens Erik Kjeldsen 2022-mi juulimi kisimiilluni angallamminik Kigdluamik Nuummiit aallarpoq. Nuliani Dorthe Kjeldsen ilagalugu Nuummut ataasinngormat tikeqqippoq.
Maanna ukiut marlungajaat qaangiutereerput, Dorthe Kjeldsenillu uini sivisuumik angalanerani siorna ilaliuppaa. Taakku pingaarnertut angorusutartik Poorskip qeqertaa tikeraarpaat.
- Nunarsuup kaajallaqqinnissaa angorusutama ilagaat, angalanermi nuannarigatsigu. Aammali nuliara Poorskip qeqertaanut takorusutatsinnut ilagerusullugu, Jens Erik Kjeldsen Sermitsiamut oqarpoq, nangipporlu:
- Inuunini tamaat Poorskip qeqertaa takorusuttuaannarsimavaa, taamaattumik Tahitimut timmisartorluni ikiartorluni ornippaanga, tassanilu Polynesiami angalaqqaarpugut.
- Polynesiap qeqertaanit kangisinnerpaamit poorskip qeqertaanut ingerlaarpugut, tassaniillutalu ulluni qulini.
Barbadosimi naapeqqittut
Poorskip qeqertaaneereerlutik Jens Erik Kjeldsen Tahitimut uterpoq, nunarsuup kujasinnerusortaanilu aasarnissaa utaqqivaa Cap Horni kaajallallugu angalasinnaaniassagami - Amerikap kujataa.
Aappariit Barbadosimi qaammatit pingasut matuma siorna naapeqqipput, tassanilu Dorthep Jens Erik ilageqqilerpaa Kalaallit Nunaannullu ingerlaaqatigiillutik.
Ullorpassuarni naammagittarnartumik imaaniinnikuulluni Nuummi nalaasaarfimmi issiaqqilerneq uppernarpianngitsoq
Dorthe Kjeldsen oqaluttuarpoq.:
- Angalaneq ilungersunarsimavoq silarlorujussuaqattaarmammi, oqarpoq.
- Periarfissat nutaat isiginiartariaqarput
Jens Erik Kjeldsenip Nuummut uternini aamma nuannaarutigaa:
- Nuannertuaannarpoq. Angalaneq nuannertarpoq, angerlarnerlu aamma nuannertarluni. Angerlarsimaffimmut uteraanni pissutsit allatut isigineqarsinnaalersimasarput, nunasisutut takornariatulluunniit misinnartarluni.
- Aamma imaanngilaq qimassimasamut uteqqiinnartoqassasoq. Periarfissat nutaat isiginiartariaqarput. Peqanngissimanermit nukissaqaleqqilluni piumassuseqaleqqilluni, angerlarnissarli aamma qilanaarisimavara.
- Soorunami ilaquttatsinnut aammali illoqarfimmut, Nuummimi inuppassuarnik uagutsinnut inussiarnersunik ulikkaarpoq. oqarpoq.
Ukiut marluk missaanni angalareerluni uteqqammeraluarluni angalanissani tulleq pilersaarusioreersimavaa:
Kiffaanngissuserujussuaq
- Angallatinnik Danmarkimut aappaagu aallassaanga. Tappavani 70-iliissaanga, Danmarkimilu ilaquttakka ilagalugit nalliukkusuppunga tassami maani Kalaallit Nunaanni inuuissiornerpassuit pinikuummata.
- Aqqutaani Savalimmiuni annertunngitsumik suliassaqarpunga, Norgemilu tikeraagassaqarlunga. Imaatigut angalanerup nuannequtai.
- Ornikkusutamut aquut sangutiinnarsinnaavoq. Akikinnerunanilu akisunerunngilaq. Nammineq angallateqarneq kiffaanngissuserujussuarmik tunisisarpoq. Billetsit, angalaneq nalunaaqutarluunniit naalagarsiorfiginagit - kiffaanngissuseqarluni.
Angallataa Kigdlua, Jens Erik Kjeldsenip ilisimaneqarluartutut sillimmasiisarfimmit koruunimik ataatsimik akilerlugu pisiarinikuuaa, taamani angallat taanna kivisimammat. Maannalu ajoquteqanngilaq:
- Ajunngilluinnarpoq.
- Angallat imaannaanngilluinnarpoq, atortorissaarutaalu tamarmik ajoratik. Iluareqaarput, imaaniikkaangattalu angerlarsimaffiulluarluni, Jens Erik Kjeldsen oqarpoq.