Aatsitassarsioqatigiiffiup Kuannersuarni suliap ajunngitsumik inerneqarnissaa suli neriuutigaa
- Suliap ingerlateqqinnissaanut periarfissiisumik maanna aalajangiisoqarnera nuannaarutigaarput, Energy Transition Mineralsimi pisortaq isumaqatigiissitsiniarnermut eqqartuussivimmi aalajangiineq pillugu oqarpoq.
Energy Transition Mineralsip Kuannersuarni aatsitassarsiorfeqalernissaq siunertaralugu sulineq 2007-mi aallartippaa.
Foto: Trine Juncher Jørgensen
Greenland Mineralsimiit, maanna Energy Transition Mineralsimik atilik, Naalakkersuisunit qallunaallu naalagaaffiannit taarsiivigineqarnissamik saliassanngortitsineq ukiut pingasut qaangiuttullu marlunngornermi aalajangiiffigineqarpoq.
Naalakkersuisut aalajangiineq nuannaarutigaat ajugaanertullu taallugu. Kuannersuarni aatsitassanik piiaasinnaatitaanermut apeqqut qallunaat naalagaaffiannit aalajangeeqataaffigineqarsinnaanngimmat suliarineqarsinnaanngitsoq Isumaqatigiissitsiniarnermut eqqartuussivimmi ilaatigut tunngavilersuutigineqarpoq.
Energy Transition Mineralsip aalajangiineq pingasunngornermi allakkatigut nalunaarummi qisuariarfigivaa. Suliakkiissut sumi suliarineqarnera apeqqutaanani ajunngitsumik inerneqarumaartoq suliffeqarfimmit allapput:
- Upperaarput naggataatigut pitsaasumik inerniliisoqassasoq eqqortumik forumimi. Taamaattumik nuannaarutigaarput maanna aalajangiisoqarmat, suliap ingerlateqqinnissaanut periarfissaqartilluta, ilaatigut Daniel Mamadou, Energy Transition Minerals-imi pisortaq oqarpoq.
Suliffeqarfimmiit oqartussaasut politikerilu isumaqatiginiarneqarusuttut
Naalakkersuisut naapertorlugit suliaq Nunatta Eqqartuussiviani Københavnillu byretiani suliarineqartussaassaaq. Energy Transition Mineralsip isumaqatigiissummik unioqqutitsisimaneraallutik 80 milliardit koruunit missaannik taarsiiffigineqarnissamik piumasaqarput, tamannalu eqqartuussinerit naammassippata isumaqatigiissitsiniarnermut eqqartuussivimmi suliarineqarsinnaalluni.
Energy Transition Mineralsimiit Kuannersuarni piiaanissap suli aallartinneqannginnera uggorineqarpoq, pisortarlu suliffeqarfiup eqqartuussivinni suliat ingerlatiinnarlugit politikerit oqartussallu isumaqatigineqarsinnaanerat neriuutigalugu oqarpoq:
- Suliniut naapertuilluanngitsumik unitsinneqartoq isumaqarpugu, taamaattumillu ETM-imi kalaallit qallunaallu politikeriisa oqartussaasuilu isumaqatiginissaat pingaartillugu.
- Pitsaasumik oqaloqatigiinnissaq suli attakkusupparput, piareersimavugullu Kalaallit Nunaannut siunissaq ungasinnerusoq eqqarsaatigalugu iluaqutaasinnaasumik illuatungeriit tamarmik akuerisinnaasaannik oqimaaqatigiissumik aaqqiissutissamik nassaarnissamut, Daniel Mamadou erseqqissaavoq.
