Air Greenlandip sulinermik tatineqarnerulerneq ilumuunnginnerarpaa: – Akerlianik pisoqarpoq
Air Greenlandip Københavnimiit Nuummut timmisartuussinermi nutaami timmisartumi inuttat kinguaattoornerit pissutigalugit sulinerminni tatineqarnerulersimanerat ilumuunnginnerarpaa.
Tuukkaq Nuummut mikkaangami nalunaaquttap-akunnerini marlunni nunami uninngatinneqartartussaavoq, ilaannikkulli timmisartut ingerlaarfiisa sinnerini kinguaattoornerit pissutigalugit sivisunerusumik uninngatinneqartarluni.
Toqqorsivimmiit assi: Leiff Josefsen
Nuummi mittarfittaap novembarip 28-ani ammarneqarneraniilli timmisartumi saqisut sulinerat annertusisimanngilaq, akerlianilli. Taama Air Greenlandimi ingerlatsinermut pisortaq Jørn E. Rasmussen timmisartortitseqatigiiffiup naatsorsuisimanera innersuussutigalugu naqissusiivoq.
- 2023-mi novembarip 28-aniit 2024-mi februaarip 25-ata tungaanut agguaqatigiissillugu sulisartut amerlassusaat 2024/25-mi piffissamut tassunga sanilliuppavut. Naatsorsuinermi 2024/25-mi agguaqatigiissillugu sulisartut amerlanerunngitsut, akerlianilli piffissami tassani agguaqatigiissillugu nalunaaquttap-akunneri suliffiusut siornamut sanilliullugit 5 procentimik ikileriarsimasut takuneqarsinnaavoq, Jørn E. Rasmussen Sermitsiamut oqarpoq.
Sulisut amerlineqarsimanerat pissutigalugu suliassat ikinnerusut nassuiarpaa.
Allannguineq
Nuummi mittarfittaap ammarneqarnerata kingorna timmisartuussisarnerup nalimmassarnissaa ilungersunartoq ingerlatsinermut pisortap nassuerutigaa.
- Suliffik allanngorsimavoq, periutsit suleriaatsillu nutaajupput, tamannalu nanertuutaanerpaasutut isigineqaannassaaq, Jørn E. Rasmussen oqarpoq. Air Greenlandip piffissaq suliffissaq pillugu malittarisassat, timmisartumi inuttanut timmisartortartunullu isumaqatigiissutini allassimasut, tamatigut maleruartarai erseqqissarpaa.
Timmisartortitseqatigiiffiup aaqqiissutissanik nassaarniarluni „misilittagaqarluarnini“ atortaraa, oqarpoq.
- Assersuutigineqarsinnaavoq Tuukkaq Københavnimut utertariaqaleraangat. Taama pisoqaraangat tamanut ajuusaarnarpoq, ACU-milu (saqisut kattuffiat, aaqq.) ilaasortat oqaatigisaattut tamanna ulloq naallugu sulinissaannut pissutaasartoq. Piffissaq suliffissaq pillugu malittarisassat taama pisoqartillugu aamma malinneqartartut erseqqissassallugu pingaaruteqarpoq, ingerlatsinermut pisortaq oqarpoq nangillunilu:
Oqaloqatigiilluarneruneq
- Air Greenland utiinnartoqarnissaanik pinaveersaartitsinermik suliniuteqarpoq, Greenland Airportsillu, mittarfimmik ingerlatsisup, attaveqarfiginerunissaanik suliniuteqarluni, ingammik sila pissutigalugu mittarfiup qanoq innera nalornissutigineqarsinnaagaangat. Tuukkarli timmisartulluunniit allat minngitsoorlutik aallarfimminnut utiinnartariarnerisa pinngitsoortissinnaanerat Air Greenlandip qulakkeersinnaanngilaa.
Jørn E. Rasmussenip tamanna pillugu mittarfiup quasarnera pissutigalugu timmisartoq Tuukkaq februaarimi „ataasiaannarluni“ utertariaqarsimasoq ilisimatitsissutigaa.
Saqisut kattuffiata Air Greenlandimi sulisut akornanni apersuineq tunngavigalugu Air Greenlandip Københavnimiit Nuummut timmisartuussineri 41-t akornanni 29-t ammarneqaqqaarnermiilli kinguaattoortarsimasut tikkuarpaa.
- Tuukkaq Nuummut mikkaangat Nuummi akunnerni marlunni uninngasarnissaq pilersaarutaavoq, ilaannikkulli sivisunerusumik uninngasarpoq. Tuukkap nunap iluani timmisartunik Dash8-nik angalasunik utaqqisarnera tamatumunnga pissutaavoq. Kingusissukkut tikinnerit timmisartup angalasunik aallartitsisarnerani nalinginnaasumik sumiiffimmi silamik pissuteqarput, taakkualu ilaat Københavnimut aallartussaapput. Sapaatit akunnerini kingullerni nunami sumiiffinni assigiinngitsuni silarluttarsimavoq, tamannalu soorunami timmisartuussinermut tamarmut sunniuteqartarpoq. Taamaattoqaraluartoq piffissamut sulinissamullu malittarisassat malinneqartarput, ACU-lli nalunaarutaa apeqqutaatinnagu Air Greenlandip piffissaq eqqorlugu timmisartuussinissaq pingaartippaa. Qujanartumik tamanna siuariartorpoq, ingerlatsinermut pisortaq erseqqissaavoq.
Pissutsit ilungersunartut
Issittumi sulinermi pissutsit „ilaatigut ilungersunarsinnaasartut amerlanertigullu aqussinnaanngikkigut“ Jørn E. Rasmussenip oqaatigaa.
- Nunarsuarmi sumiiffinnit allanit atuisunik sullissinitsinni nalinginnaanngitsunik misigisaqarnerusarnerput Air Greenlandimi sulisunut tamanut atugassarititaavoq. Kisianni sunniuteqarsinnaaffigisatsinni attaveqaatit nutaat atorlugit misilittakkat piffissap ingerlanerani nalinginnaaleqqissassapput. Sungiunnissaanut piffissamik atuinissaq pisariaqartarpoq, allannguutillu suliat annertussusiannut sunniuteqartartut paasilluarparput, Air Greenlandimi ingerlatsinermut pisortaq naggasiilluni oqarpoq.
