Aqqanilinnik ukiulik kommunip qamuteralaanit aportittoq: Siulittaasup kommuni isornartorsiorpaa

  Nutartigaq: Kommunip akissutaa ilanngunneqarpoq.

Ulloq nuannersuusussaagaluarpoq, meeqqat snowboardimik GM-ereerlutik ulloq nuannersumik eqqaamaniassammassuk.

Ullorli alianartutut eqqaamaneqartussanngorpoq.

Peqatigiiffik Snowball Sisimiut GM-ip naammassereernerata kingorna Alanngorsuarmi majuartaatip naggammik ammanerani meeqqanut aaqqissuussipput.

-  GM-ip aammassineqaleqqammerfiani, meerartagut naggasiillutik nuannersumik eqqaamasaqarfiginiassammassuk aaqqissuussivugut, ullorlu nuanninngitsumik naammasivoq, siulittaasoq oqaluttuarpoq.

Snowboardertartoq GM-imi DM-imilu peqataasartoq snescooterinut aportikkami ajoqusingaatsiarpoq.

Taassuma niua napivoq, saania nuilluni. Dronning Ingridillu Napparsimavissualiaanneqarluni suliarineqartariaqarluni.

Siulittaasup nassuiaataa naapertorlugu siulittaasoq kommunimut saaffiginnippoq, tupaallaatigisaminillu kommunip pisoq itinerusumik kommunip iluani eqqartorneqarsimanngilaq, pisorlu aamma politiinut nalunaarutigisimanagu.

-  Sisoraartartut siulittaasuatut isumaga malillugu tupaallaatigisannik pisoq, suliffeqarfissuup iluani eqqartorneqarsimanngitsoq sukumiisumik paasivarput, taakkulu motorinik ingerlatiliusut piginnittut pisussaaffigigaluaraat politiinulluunniit, pisup qaninnerani, anngussisimanngitsut paasivarput, Hendrik Berthelsen Sermitsiamut oqarpoq.

-  Neriuppunga nukappiaraq sisusoq takoqqikkumaarlutigu.

Siulittaasup Sermitsiamut paasissutissiissutigaa ilaqutariit pisoq politiinut nalunaarutigisimallugu.

Qeqqata Kommunia Sermitsiap oqaaseqartinniarlugu sulissuteqarpoq.

Kommuni: Pisimasoq nalunaarutigineqarpoq

Nutarterneqartoq: Allaaserisap saqqummernerata kingorna Qeqqata Kommunia allakkatigut akissuteqarluni ilisimatitsivoq pisoq politiinut sillimmasiisarfimmullu nalunaarutigineqartoq.

Kommuni allappoq pisoq pillugu oqaaseqarsinnaanani, suliaq politiinit sillimmasiisartunillu suli suliarineqarmat.

- Soorunam pisoq assorujussuaq ajuusaarnarpoq, neriuppugullu ajutoornini qaangerluarlugu peqqisseqqikkumaartoq, kommunimi pisortaaneq Hans Christian Svärd Sermitsiamut allappoq.