Arctic Hub allattoqarfimmi pisortassarsiorpoq
Arctic Hubip allattoqarfia Nuummiittoq allamik pisortassarsiorpoq Jula Maegaard-Hoffmannip aalajangiummagu suliassani allamut ingerlateqqinniarlugu.
Foto: Arctic Hub
Ukioq ataaseq qaangiussimalaalersorlu Arctic Hub nutaamik pisortassarsiorpoq.
Arctic Hubip tusagassiuutitigut nalunaarummi allappoq Jula Maegaard-Hoffman aalajangertoq akisussaaffik ingerlateqqinniarlugu. Taamaattumik allattoqarfimmi pisortatut atorfik maanna inuttassarsiuunneqarpoq.
- Suleqatigiit attaveqarfigisartakkallu tunniusimasut Kalaallit Nunaanni ilisimatusarnerup silarsuaata siunissaa pillugu sulisut suleqatiginerat uannut isumaqarluarsimaqaaq. Aammattaaq inuit piumassuseqarlualersitsisartut Kalaallit Nunaanni naleqangaartunik ilisimasallit taama amerlatigisut naapisimaartarlugit nuanneqaaq, Jula Maegaard-Hoffmann
oqarpoq.
Allattoqarfimmi sisamanik aalajangersimasunik atorfeqartoqarpoq suliniutinullu atatillugu atorfeqartorpaaloqarluni, allattoqarfillu Nuummi Pikialaarfimmiippoq. Jula Maegaard-Hoffmann 2021-mi tunngaviliisoqarneraniilli Arctic Hubimiissimavoq –
siullermik konsulentitut 2023-milu aggustimiit allattoqarfimmi pisortatut.
Jula Maegaard-Hoffmannilli Arctic Hub qimalinngilaa siunnersortitut suliinnassagami.
Arctic Hub Kalaallit Nunaanni ilisimatusarneq pillugu katersuuffiuvoq, nunatsinni nunanilu allani ilisimatusarnermik suliaqarfinnik atassusiisartoq aammalu ilisimatusarnermik inuiaqatigiinnillu ataqatigiilersitsisartoq.
Qinnuteqarnissamut sisamanngorneq julip pingajuat killigitinneqarpoq . Kissaatigineqarpoq atorfik inuttalerneqassasoq kingusinnerpaamik septembarip aallaqqaataani.
