Atuarfik ukioq sivikinnerusoq pillugu oqallinneq: IMAK-ip atuarfiit oqaloqatigineqarnersut apeqquserpaa
Avannaata Kommunianip, borgmesterip Lars-Erik Gabrielsenip ukiup atuarfiusup ullunik 20-nik sivikillinissaanik siunnersuuteqarpoq. Ilinniartitsisut, atuartut angajoqqaallu oqaloqatigineqaqqaarsimanersut IMAK-ip siulittaasuata Elna Heilmannip apeqquserpaa.
- Ullut 20-it pineqarput. Taava meeqqat ulluni 20-ini sussappat? Atuisut qanoq eqqarsaateqarnersut aperineqaqqaarpat?, Elna Heilmann Sermitsiamut oqarpoq.
Assi: Leiff Josefsen
Avannaata Kommuniata ukioq atuarfiusoq ullunik 20-nik sivikillisikkusuppaa. Kisiani atuarfiit pineqartut oqaloqatigineqareerpat? Taama IMAK-ip siulittaasua, Elna Heilmann apeqqusiivoq:
- Ullut 20-it pineqarput. Taava meeqqat ulluni 20-ini sussappat? Atuisut qanoq eqqarsaateqarnersut aperineqaqqaarpat?, Elna Heilmann Sermitsiamut oqarpoq.
Taassuma ilanngullugu oqaatigaa nukarlerniit akullernut ikaarsaariarnermi tiimit atuartitsivigineqartartut sivisuallaartut.
- Atuartut nukarliit, 1. klassimiit 3. klassini atuartut sapaatip akunneranut 23-24 tiimit atuartinneqartarput. Akullernullu ikaarsaariarnermi, 4. klassimut nuunnermi tiimit sapaatip akunneranut atuartitsivigineqartusat 30 tiiminiit 33 tiiminut amerlisarput. Ikaarsaarneq meeqqanut sakkortusartoq, IMAK-ip siornatigut isornartorsiortareerpaa.
Taassuma saniatigut Elna Heilmannip oqaatigaa nunatsinni atuartut faginut amerlavallaarujussuartunut inaarutaasumik misilitsittartut, nunanut allanut sanilliullugit amerlavallaarlutik.
IMAK-ip oqaloqatigiittoqarnissaa ujartorpaa
Elna Heilmannip oqaatigaattaaq ukiup atuarfiusup qanoq sivisutiginissaanik aalajangiisoqaannarani, aalajangiineq qanoq alajangerneqassanersoq pingaaruteqartoq:
- Avannaata Kommuniani atuarfiit oqaloqatigineqaqqaartariaqarput, qulaaniit aalajangiiginnarani.
