Borgmesteri: Avissaarnissaq akikinnerusinnaavoq
Sisimiuni Maniitsumilu innuttaasut kommunip avinnissaa kissaatigaat. Maniitsoq nammineerusuppoq, borgmesterilu borgmesterillu tullia avinnissaq akikitsoq pillugu isumaqatigiinniarput.
Foto: Tôrtia Reimer-Johansen
Maniitsumi Sisimiunilu innuttaasut kommunip avinnissaa kissaatigaat.
"Avinnerli" qanoq akeqassava?
Qeqqata Kommuniata kisitsisit maanna pissarsiareqqammerpai:
BDO-p misissuinerani kisitsisit takutippaat Sisimiut Maniitsorlu avissaassappata sulisut 92-miit 187-it pisariaqartinneqassasut. Tamanna isumaqarpoq ukiumut 48 millionit koruuniniit 187 millionit koruunit tungaanut immikkut ittumik aningaasartuuteqartoqassasoq.
Malik Berthelsen (S) Gedion Lyberthilu (S) isumaqarput avinniarneq akikinnerusinnaasoq:
- Atorfiit arlallit toqqaannartumik innuttaasunik sullisiviunngitsut, soorlu IT-mut, sulisoqarnermut (HR), akissarsialerinermut, sanaartornermulluunniit tunngassuteqartut, ataatsimoorussamik akileeqatigiilluni pilersinneqarnerisigut ingerlatsinermut aningaasartuutit sulisullu naatsorsuutigineqartumiit ikinnerusut atorlugit kommunit avissaarnissaat anguneqarsinnaasoq isumaqarpugut.
Maniitsoq amigartooruteqassasoq
Avissaartoqassappat naatsorsuutit 2023-meersut malillugit sulisullu nutaat naatsorsuinermi atorneqartut amerlassusaat malinneqassappata, Maniitsoq ukiumut minnerpaamik 21 millionit koruuninik amigaartooruteqartussatut Sisimiullu minnerpaamik 56 millionit koruuninik sinneqartooruteqartussatut naatsorsorneqarsimapput.
Neriunaateqarporli:
- Tassungalu tunngatillugu oqaatigerusupparput Tasersiaq atorlugu Maniitsup eqqaani suliffeqarfissualiornissaq piviusunngussagaluarpat Maniitsumut kisitsisit naatsorsorneqartut saqqummiunneqartuninngaannniit pitsaanerusumik isikkoqassammata. Tasersiaq nunanit tamaalaanit annertuumik soqutigineqartoq, sanaartorneqarnissaalu kingusinnerpaamik 2028-mi aallartinneqarnissaa ilimagineqartoq Naalakkersuisuniit siusinnerusukkut ilisimatitsissutigineqarnikuuvoq.
Innuttaasut taasitinneqassasut
Kommuni avinneqassagaluarpat allaffissornikkut aningaasaqarnikkullu qanoq kinguneqassanersoq pillugu innuttaasunut paasititsiniutigineqareerpat innuttaasut taasitinneqassasut kommunalbestyrelsi tamarmiusoq isumaqatigiilluni aalajangernikuuvoq.
- Tamatumalu innuttaasunut saqqummiunissaanut innuttaasullu isumaasa tusarnissaannut qilanaarpugut.
