Borgmesteri Malik Berthelsen angerlarsimaffeqanngitsut pillugit: - Suna tamarmi akeqanngitsumik tunniunneqarsinnaanngilaq

Sisimiuni angerlarsimaffeqanngitsut kommunimit ikiorserneqarnissamut periarfissaat killeqarput, unnuisarfillu ullaakkut nal. 09. 00 matugaangat ullormut nalunaaquttap-akunneri qulit angullugit namminneq sumiiffissarsiortariaqartarput.

Naak innuttaasut nerisassanik tunniussisaraluartut, angerlarsimaffeqanngitsut errortanik atisaqarniarunik nammineq qaqorsaatit isumagisussaavaat.

Ukiut 16-it angerlarsimaffeqanngitsoq: Sisimiuni kialaarfissaqarniarluni ilungersortoq

Sisimiuni angerlarsimaffeqanngitsut unnuisarfiat ullut tamaasa ullaakkut qulingiluanit unnukkut arfineq-marluk tungaanut matoqqasarpoq. Tamanna isumaqarpoq ammaqqinnissaata tungaanut sumiiffissaqarneq ajortut - aamma ukiukkut issittumi. 

Malik Berthelsenip unnuisarfiup ammasarfiisa sivitsorneqarnissaanik periarfissanik misissuerusunnerarpoq:

-  Ullumikkut periarffissuutaareersut saniatigut angerlarsimaffeqanngutsunut unnuisarfiup ammasarfiisa sivitsorneqarnissaat misissorusuppara, pissutigalugu takorloorsinnaagakku ullaamiit unnuup tungaanut iserfissaqarani pineqartunut qanoq sakkortutiginissaa.

Borgmesteri Malik Berthelsen: - Suna tamarmi akeqanngitsumik tunniunneqarsinnaanngilaq

Qeqqata Kommuniani borgmesteri, Malik Berthelsen borgmesterinngoqqissagaluaruni angerlarsimaffeqangitsut atugaat kommunimi qanoq pitsanngorsarusunnerai Sermitsiap aperaa. Angerlarsimaffeqannginneq sakkortuvoq, kommunilli tunniussinnaasai killeqarput.

-  Qularinngilara tamatta takorloorsinnaagipput toqqissilluni angerlarfissamik imaasiallaannaq iserfissaqarani inuunerup misigissutsikkut qanoq sakkortutiginissaa, ingammik sila atoruminaatsillugu. 

- Taamaattumik isumaqarpunga angerlarsimaffeqanngitsunut unnuisarfiup sivisunerusumik ammasalersinnaanera kommunalbestyrelsenngortussap nalilersorumaaraa, borgmesteri Malik Berthelsen Sermitsiamut oqarpoq.

Taassuma ilanngullugu oqaatigaa unnuisarfimmi uffarnissamut errorsinissamullu periarfissaqartoq, sunali tamarmi akeqanngitsumik tunniunneqarsinnaanngilaq.

- Ilanngullugu oqaatigissavara unnuisarfimmi atuisut inuttut alloriaqqinnissaat sulilersinnaappatalu sulileqqinnissaat anguniarlugu ikiorneqarnissaminnik neqeroorfigineqarnertik tigulluarlugu qujarunnikuummassuk. 

 Unnuisarfimmi atuisussaagaanni inissarsiornissaq aamma ilanngullugu piumasaqaataavoq.