Ukiut 16-it angerlarsimaffeqanngitsoq: Sisimiuni kialaarfissaqarniarluni ilungersortoq

Arfininngornerup ullaagaa, Hans Lynge angerlarsimaffeqanngitsut unnuisarfiata silataani issiavimmut ingilluni pujortarpoq. Sila sekundimut 30 meterinik anorlerpoq. Ullaakkullu nalunaaqutaq qulingiluanngormat unnuisarfik matuvoq. 

Nalunaaquttap akunnerini qulini iseqqinnissaminut utaqqissaaq, nalunaaqutaq unnukkut arfineq-marlunut ammaqqissammat.

Hans Lynge ukiuni 16-ini angerlarsimaffeqanngitsuuvoq. Siornatigut Nuummi angerlarsimaffeqanngitsuuvoq, pitsaanerusunilli atugaqalerumalluni Sisimiunut nuuppoq. Takorluugarli allaanerungaarpoq.

- Sisimiuni angerlarsimaffeqanngitsutut atugassarititaasut nuummiit ajornerusutut misigaakka. Nuummi Frelsens Hærimi kialaarlutalu nerisinnaasarpugut, kommunimiillu errorsinermut qaqorsaatinik kialaarfimmi atuisinnaasarpugut. Sisimiuni unnuisinnaavugut, allamik naamik. Ullaakkut qulingiluanut anereersimassaagut, 56-inik ukiulik aalisartuusimasoq oqaluttuarpoq.

Umiarsualivimmi kissassimaarsinnaasoq

Unnuisarfik matugaangat umiarsuarlivimmut Illorsuaralammut kissassimaariartortarpoq. Tassani aalisartut piniartullu isersimaartarput.

- Illorsuaralammiittarpunga kissassimaarniarlunga.

Isersimaartarfilli aalisartut piniartullu suliffigisarmassuk atisani tippassinnaasaput, isersimaffillu eqqiluisaarfiunngimmat peqqissusaanut akornutaasinnaasarluni.

- KOL-eqarpunga, silaannarlu tannaqami peqqinnanngilaq. Kisianni isersimaffissaqarpunga, taanna pingaarneruvoq. Ajunngikkuma naammappoq, oqarpoq qungujullunilu.

Nerisassaqaranilu qaqorsaatissaqanngitsoq

Nerisassaqarniarneq eqqiluisaarniarnerlu ilungersunartuupput. Hans Lynge oqaluttuarpoq paasisimallugu nerisassanut qaqorsaatinullu kommuni sipaarniarsimasoq.

- Unnuisarfiup eqqaamiui nerisassanik sinnikuminnik tunniussisarput, qujamasunnartaqaat.

Kommunimullu saaffiginnikkaangami ersineqartutut misigisimasarpoq.

- Allaaneq ajorpoq sullissisut iseraangatta ersigisaraatigut. Ersissutissaqanngikkaluarput, suliassatimmi suliariinnartussaavaat.

Politikkikkut iliuuseqartoqarnissaa neriuutitigaa

Kommunimut inatsisartunullu qinersisoqalerpoq. Hans Lynge pisunut malinnaavallaanngikkaluarluni neriuuteqarpoq:

- Neriuppunga angerlarsimaffeqanngitsut puigorneqassanngitsut.

Hans Lyngip ulluinnaa aallartippoq, umiarsualivimmi aalisartut piniartullu akornanni Illorsuaralammi isersimaassaaq, unnuisarfillu ammarpat innariartussamaarluni.