Borgmesterip ukiumut ullut atuartitsiviit 20-inik ikilisinniarpai
Avannaata Kommuniani borgmesterip Lars-Erik Gabrielsenip (S) meeqqat atuarfiini ukiumut ullut atuartitsiffiusut 200-niit 180-inut ikilisinniarpai. Tamanna ukiumi nutaamiit atuutilersikkusuppaa.
Assi: Oscar Scott Carl
Ukioq atuarfiusoq takisuutit misiginarpoq, ullunillu 20-nik sivikillisinneqartariaqarpoq.
Avannaata Kommuniani borgmesteri, Lars-Erik Gabrielsen taama isumaqarpoq.
Aalajangiisoqarsinnaappat, tamanna aappaagu ukiumi atuarfiusumi 2026-imi atuutilersikkusuppaa:
- Misigisimajuaannarnikuuvunga ukioq atuarfiusoq sivisoorujussuusoq. Meeqqat upernaami qasusut atuartinneqarniarsarisarput, borgmesteri Sermitsiamut oqarpoq.
Taassuma ilanngullugu oqaatigaa ukioq atuarfiusoq aavarfimmi aallartiaarpallaartartoq:
- Taamaattumik ukiumut ullut atuarfiusartut ikilisinneqartariaqarput.
Inatsit atuutereersoq
Kommunalbestyrelsenili nammineq taamatut aalajangiinnarsinnanngilaq, Inatsisartut aalajangiiffigisassarimmassuk. Taamaattumik Siumut Inatsisartunut siunnersuuteqassasoq piumasariniarpaat.
Meeqqat atuarfiinut inatsisit malillugit ukioq atuarfiusoq ulluni 200-ini ulloqassaaq. Inatsimmi aamma allassimavoq meeqqat atuarfiini atuartitsiviit aalajangersimasut malinneqassasut, tiimillu atuartitsiviusut.
- Inatsisartuni aalajangiiffigineqassaaq, taamaattumik Siumut siunnersuuteqassasoq kaammattussavarput, Lars-Erik Gabrielsen (S), Avannaata Kommuniani borgmesteri oqarpoq.
Inatsisartunili siunnersuutigineqarnera iluatsinngippat, iliuusissaqareerpoq:
- Iluatsissinnaanngippat, taava ullut atuarfiusut oqinnerutissavagut. Soorlu suliffeqarfinnut pulaarsinnaapput, aningaasaqarneq pillugu ilinniartinneqarsinnaapput, aamma imaani angallannermi isumannaallisaarnermut atuartinneqarsinnaapput.
