Brugseni unammillernartorsiortoq – ukiumut naatsorsuutit amigartoorfiussasut
Kalaallit Nunaanni Brugseni ilaasortanit pigineqartoq ukiumi kingullermi aningaasatigut ima ajornartorsiortigisimavoq ukiumut angusat amigartoorfiussallutik, siulersuisuni siulittaasoq Avijâja Rosing-Olsen oqarpoq.
Brugseni Paamiuni, Narsami, Nanortalimmi, Simiuni Ilulissanilu siulersuisunut qinersinissamut qaaqqusivoq.
Toqqorsivimmiit assi: Leiff Josefsen
Brugsenip ukiumoortumik siulersuisunut ilaasortassanik qinersinissamut qinigassanngortittut qaaqqullugillu tassunga atatillugu ukiup ingerlanerani „silarsuarmi allanngorartuarneratigut“ Brugseni unammilligassaqarsimasoq oqaatigaa.
- Brugsenimi ukiumut angusaq amigartoorfiussasoq naatsorsuutigaarput. Taamaammat siulersuisuni sulisut pikkorissut atorfissaqartinneqarput, taakku pisortat niuernermilu immikkoortut allat suleqatigalugit suliffeqarfiup ingerlarnga aalajangersinnaavaat, taamaalilluta ineriartorneq allanngortissinnaagatsigu, siulersuisuni siulittaasoq tusagassiuutinut nalunaarummi oqarpoq, nangillunilu:
- Brugseni periusissatut pilersaarummi nutaamik killiffeqarmat siulersuisut suliassarpassuaqarput. Taamaammat siulersuisuni ilaasortaasut tamarmik aningaasaqarnermi, inatsisilerinermi sanaartornermilu sulianut tunngasunik piginnaasaqarluartut pisariaqartinneqarput, siulersuisuni siulittaasoq Avijâja Rosing-Olsen oqarpoq.
2023-mut ukiumoortumik naatsorsuutit naammassineqareersullu Brugseni 1 milliard koruunit sinnerlugit kaaviiaartitaqarpoq, 1 million koruuninik sinneqartooruteqarpoq. Ukiup siuliani 3,3 million koruuninik amigartooruteqarnermiit sinneqartoorut annikitsoq tamanna pitsaanerulaarpoq. Brugsenip nammineq aningaasaatai 250 million koruuniullutillu kaaviiaartitai 1 milliard koruunit sinnerlugit amerlassuseqarput.
Sumiiffinni marlunni qinersineq
Siulersuisunut qinersineq pillugu ilaasortat Paamiuni, Narsami, Nanortalimmi, Simiuni Ilulissanilu najugaqartut piumasaqaatinik eqqortitsisut tamarmik qinigassanngortissinnaasut ilisimatitsissutigineqarpoq.
Qineqqusaarusuttut Brugsenip nittartagaatigut marsip 15-iata tungaanut qinigassanngortinnissartik nalunaarutigissavaat, tamatumalu kingorna qinersineq digitalikkut ingerlanneqartoq apriilip aallaqqaataaniit 15-iata tungaanut ingerlanneqassaaq. Aappaagu qinersivinni Qaqortumi/Maniitsumi Nuummilu ilaasortanut Brugsenip siulersuisuinut qinersisoqassaaq.
Qinersivinnit sisamanit qinikkat, ilaasortat marluk siulersuisunit toqqarneqartut sulisullu sinniisaat ataaseq Kalaallit Nunaanni Brugsenip siulersuisuini ilaasortaapput.
Qineqqusaarniaraanni piumasaqaateqarpoq. Assersuutigalugu qineqqusaarsinnaajumalluni 25-t sinnerlugit ukioqartoqartariaqarlunilu pinerlussimasimanngitsuusariaqarpoq.
Akissarsiaqartinneqarneq
Siulersuisut sulinerat akilerneqartartoq, naatsorsuutigineqarlunilu qaammammut akunnerit tallimat qulillu akornanni sulisoqartartoq Avijâja Rosing-Olsen ilisimatitsivoq. Ilaasortat soqutiginnittut Brugsenip nittartagaani peqatigiiffik pillugu piumasaqaatit, naatsorsuutigisat malittarisassallu suut atuunnersut atuaqqullugit innersuunneqarput.
