Danmark Ilulissat mittarfianut aningaasaliissuteqarnerulerpoq

Danmarkip Kalaallit Nunaanni mittarfiliornissamut aningaasaliissutai millionillit juulip aappaata tungaanut isertuunneqarput.

Danmarkimi naalagaaffik Ilulissani nunanit tamalaanit mittarfiliornissamut immikkut aningaasaliivoq.

Allakkat juulip aappaata tungaanut isertuunneqarsimasut tunngavigalugit Jyllands-Posten allappoq.

Allakkiami allassimavoq “aningaasaliisoqarnissaa pisariaqarluinnartoq”, naliliinerup takutimmagu mittarfiliortitsisoq Greenland Airports International aningaasatigut taarsigassarsisinnaajunnaartoq.

Tamanna pivoq “ingerlatseqatigiiffiup niuernermut pilersaarutaani kukkusumik tunngavilersuuteqarneq arlallit” paasimmagit, tamatumalu kingunerisaanik Greenland Airports Internationalip nalinga ilimagisamit appasinnerusumik nalilerneqarmat.

Allakkat juunip 18-ianni allassimasut suliffeqarfiup aningaasaqarnikkut soqutigisai pissutigalugit isertuunneqarput.

 Kalaallit Nunaanni mittarfiliornissamut immikkut aningaasaliisoqassasoq,  Aningaasaqarnermut ministeri Nicolai Wammen (S) Folketingimi Aningaasaqarnermut Ataatsimiititaliamut qinnuteqarsimavoq.

Sanaartornermut tapiissutit katillugit 400 million koruuniupput, taarsigassarsiassartaasullu 1140 million koruunit angullugit amerlassuseqarlutik.

2025-mut aningaasanut inatsimmi sipaarniutigineqartussat 400 million koruuniupput.

Mittarfiliornissamut nutaamik taarsigassarsisoqarsinnaanngilaq, taarsigassarsiallu tamarmik 2052-imi akilerneqareersimassapput.

Jyllands-Posten naapertorlugu Nicolai Wammen siornatigut Kalaallit Nunaanni mittarfiit marluk, Nuummi Ilulissanilu, sanaartornissaannut aningaasanik pissarsisimavoq.

2022-mi sanaartornerit ilimagisamit akisunerujussuummata taarsigassarsiat 450 millionit koruuniusut 600 millionit koruuninut qaffanneqarput, sanaartornerit ilimagisamik akisunerummata.

Danmarkimi naalagaaffik mittarfiit taakku marluk sanaartornissaannut 1,6 milliarder koruuninik aningaasaliissuteqareerpoq.

Nuummi mittarfik nunanit tamalaanit tikinneqarsinnaasoq novembarimi 2024-mi naammassineqarpoq, Ilulissanilu mittarfik 2026-mi naammassineqarnissaa naatsorsuutigineqarpoq.

Danmarkimi naalagaaffik Greenland Airports Internationalip 33,3 procentianik piginneqataavoq, sinnerilu Namminersorlutik Oqartussanit pigineqarput.

/ritzau/