Dorthe Qvist Illorsuarmiu: – Kiisami tusaaneqarpugut

Illorsuit ukiuni arfineq-pingasuni inoqanngereerluni, ammaqqinnissaanut neriuuteqalerput.

Dorthe Qvist, peqatigiiffimmi Illorsuarmi siulittaasuusimasoq, nunaqarfiup ammaqqinneqarnissaanik neriuuteqarnissaq utaqqisiavaa. Taassumami nunaqarfiup ammaqqinneqarnissaanik sulissuteqartuarsimagaluarpoq - maannalu misigisimasoq kiisami tusaaneqarlutik.

- Oqarusuppunga kiisami. Kiisami tusaaneqarpugut. Kiisami nunaqarfik politikerinit tikeraarneqarpoq, tamannami qangali kissaatigisarsimavarput, Aqqalu C. Jerimiassen qineqqusaaqatiginikuusanilu Hans Frederik Møller Illorsuarnut tikeraareersullu, Dorthe Qvist oqarpoq.

Aqqalu C. Jerimissen neriuuteqalersitsivoq

Juunip ulluisa 17-at, 2017 nunatta puigunngisaannagassaanik pisoqarpoq. Ulloq taanna Karrat Kangerluanni qaqqat sisoorpoq tassaarsuaqartitsisumik. Illorsuit Nuugaatsiarlu eqqorneqarmata nunaqarfiup innuttaasuit qimagutiterneqarput. Kingorna nunaqarfimminnut uteqqinngillat.

Innuttaasut nunaqarfimminnut uteqqissinnaanngillat, oqartussat tassaarsuaqqittoqarnissaanut aarleqquteqarmata.

Aqqalu C. Jerimiassenili aarleqquteqarpasinngilaq. Taassuma nunaqarfik takuaa, attorpaa tusaallugulu. Nunaqarfiullu ammaqqinneqarnissaa sulissutiginiarpaa.

Illorsuit ammaqqinneqassava imaluunniit naagga?

Apeqqut taanna Inatsisartut ukiamut ataatsimiilerpata akissutissarsissavarput. Tassanimi Aqqalu C. Jerimiassen Illorsuit ammaqqinneqarnissaanut siunnersuuteqarniarpoq.

Illorsuit matuneqarmat nunaqarfimi innuttaasut nunaqarfimminnut uteqqikkusullutik oqaatigiuarpaat. Peqatigiiffiullu aamma tamanna sorsuutigisareerpaa. Maanna neriuuteqaleqqipput, Aqqalu C. Jerimiassen Hans Frederik Møller ilagalugu nunaqarfimmut tikeraarmata.

Peqatigiiffimmi siulittaasuusimasoq, Dorthe Qvistip tikeraarneq nuannaarutigaa.

- Politikerit nunaqarfitsinnut tikeraarnissaat kissaatigisarsimavarput, kisiannili ajornarsimavoq, Dorthe Qvist oqarpoq.

Peqatigiiffik matunikuuvoq, Dorthe Qvist tunuarniarluni nalunaarnerata kingorna siulittaasussatut sassartoqanngimmat. Taamaakkaluartoq neriuuteqalerpoq:

- Takusinnaavarput pimoorussisoqartpq. Aamma neriuppugut politikerit allat aamma pimoorussilerumaartut.

- Peqataatitsigut

Aqqalu C. Jerimiassen nunaqarfiup ammaqqinnissaanut siunnersuuteqalersaarpoq,  Dorthe Qvistimullu takuneqartutut misigisimanarpoq:

- Pissanganarpoq qanoq inerneqassanersoq. Misigisimavunga tusaarneqarluta takuneqarlutalu.

Illorsuarmiunilli peqataatitsisoqarnissaa pingaaruteqarpoq:

- Peqataatinneqarnissarput maqaasivara, nunaqarfimmi nunaqavissut tusarniarfigineqannginnattaluunniit. Suleqatigineqarsinnaagaluarpugut. Siullermik peqataatinneqarnikuunnginnatta, neriuppunga massakkut peqataatinneqassasugut.

- Siullermik tusaaneqannginnatta uagutsinnut assut kingunerlutsitsinikuuvoq peqqinnaranilu. Tamanna pinngitsoortikkusupparput. Ataatsimeeqatigineqarsinnaavugut tusarniarfigineqalaarluta. Assut torrassagaluarpoq tusarniarneqarutta peqataatinneqarlutalu, Dorthe Qvist oqarpoq.

Ataatsimeeqatigiumaneqaruit illit piumassagaluarpit?

- Ammavunga, oqaloqataarusuppunga. Ilisimasakka atornissaanut ammavunga, pisariaqartinneqassappat, Dorthe Qvist naggasiilluni oqarpoq.