Erik Jensen Trumpi pillugu: USA-p ataqqinnippasinnginnera ernumaammernarpoq
Erik Jensenip oqaasii naapertorlugit Trumpip oqalugiaataanut Siumut malinnaalluarpoq. Taannalu isumaqarpoq oqariartuutigineqartut ernumaammernarlutillu amiilaarnartuusut. - Takuarput nunarput eqqaaneqarmat illariartoqartoq, uppernarsarpaa ataqqinnissuseqartoqanngitsoq. Ataqqinninnermik suleqatigiikkusussusermillu apuussiffigisarigut taamatut pissusilersortut ernumaammernarpoq, Erik Jensen oqarpoq.
Assi: Leiff Josefsen
Siumut siulittaasua, Erik Jensen, ernumasoq Sermitsiap oqarasuaatikkut oqaloqatigaa.
Taassuma Sermitsiamut oqaluttuaraa præsidentip kongressimi marlunngornermi unnuakkut oqalugianerani nunarput eqqaaneqarmat ataqqinninnginnermik takutitsineq ernumaammersitsisoq:
- Takuarput præsidentip nunarput eqqaammagu illariartoqartoq. Tamanna uppernarsarpaa ataqqinninngitsoqartoq. Ataqqinninnermik suleqatiginnikkusussusermillu takutitsivigisarigut, taamatut pissusilersornerat ernumaammernartorujussuuvoq, Erik Jensen oqarpoq.
"Nunarput tuniniagaanngilaq"-mik oqaqattaarneq naammappa?
Inuit Ataqatigiit siulittaasuata, Mùte B. Egedep nunatta tuniniagaannginnera, nunattalu inuisa nunatta siunissaa nammineq aalajangiiffigissagaat arlaleriarlugu oqariartuutigisarpaa.
Taamaakkaluartoq USA-p præsidentiata nunatsinnik sakkortusisamik nakkutiginnikkusulluni oqariartuutigeqqittarpaa. Erik Jensenip Mùte B. Egede isumaqatiginerarpaa:
- Oqariartuutaa assortorsinnaanngilarput.
- Ataatsimoortariaqarpugut. Tiguaagaannginnissarput ilungersuutigisariaqarparput. USA tatigisatut ilitut isiginikuugaluarlugu, ukioq nutaaminngaanniit amilaarnarsivoq ernumanarsillunilu, Erik Jensen Sermitsiamut oqarpoq.
Europa suleqatigineqartariaqarpoq - Trumpilu naapillugu
Qinigaaffik aallartiinnartoq qinikkat nutaat nunatta soqutigisai pillugit ulapputissaqaqisut, Erik Jensenip qularutiginngilaa.
- Europami iligut suleqatigiinnerup nukittorsarnissaanut oqaloqatigisariaqarpagut, aamma USA-mik oqaloqateqarnissarput pinngitsoorsinnaanngilarput.
- Præsident naapinnissaa avaqqussinnaanngilarput, oqariartuutigut apuuttariaqarpagut, aamma tusarnaarusunngikkaluarpalluunniit, Erik Jensen naggasiilluni oqarpoq.
