Erik Jensenip qinersinermi ajorsarneq akisussaaffiginerarpaa siulersuisuunerillu qaaqqullugit
Siumup siulittaasuata Erik Jensenip qinersinermi ajorsaq akueraa. Siulersuisuunerit ataatsimiinnissamut qaaqquneqarput.
Erik Jensen Vivian Motzfeldtilu qinersinerup unnukkuani oqaloqatigiittut, tassani Siumup ilaasortaatitani arfinillit annaavai.
Foto: Oscar Scott Carl
Siumup siulittaasua Erik Jensen marlunngornermi unnukkut Siumup qinersinermi unnussiuaarneranit kulturip illorsuanit Katuamiit animmat Sermitsiap naapippaa.
Erik Jensen pakatsisimaqisoq takuneqarsinnaavoq, Siumut Inatsisartuni ilaasortaatitaasa quliusut sisamaannanngornerat pillugu ima oqarpoq:
- Soorunami tamanna kissaatiginngikkaluarparput, qinersisulli aalajangiinerat akuerisariaqarparput. Allannguinernik annertuunik suliaqarneq akisuvoq.
Qinersinermi unnussiuaarnerup aallartinnerani oqaatigisani oqaatigeqqippaa:
- Akisussaaffigalugu nassuerutigisariaqarpara. Akisussaaffiga qimarratigissanngilara, tamatumalu kinguneri piareersimaffigaakka, Erik Jensen oqarpoq.
Ataatsimiinnissamut qaaqqusisoq
Qinersinermi pakatsinartumik angusaqarneq pissutigalugu siulersuisuunerit ataatsimiigiaqqusimallugit Siumup siulittaasua ilisimatitsivoq:
- Siulersuisuunerit erngertumik ataatsimiinnisamut qaaqqoreerpakka, qanorlu pisoqassanersoq takussavarput.
Apeqqut: Imaappa piumaffigineqaruit tuniarnissat piareersimaffigaajuk?
- Sineqqaalaartariaqarpugut ullullu ataasiakkaarlugit.
Apeqqut: Taavami piumasarineqassappat?
- Akisussaaffimmik tigusinissara ersiginngilara. Angusanilli oqaluttuarisaanermut ilannguttunik suleqataasimavunga. Aalisarneq pillugu inatsit ukiuni 20-ni utaqqisimasarput.
