Facebookimi assit AI-mik ilinniartitsinermi atorneqassamaartut

Facebookimi Instagrammimilu assit silassorissuusiamut sungiusaatitut atortikkugunngikkaanni, taava iliuuseqarfissamut killissarititaasoq nallingajalerpoq.

Taava input.dk. allaaserisaqarpoq.

Assit ilinniartitsinermut atortikkusunngikkaanni kingusinnerpaamik maajip26-anni Meta ilisimatinneqassaaq.

Meta aqaguani assinik tigooraalluni aallartissaaq.

- Silassorissuusiaq sungiusarneqassaaq, tassani assit paasineqarsinnaalissapput, taavalu sanilliunneqarsinnaalissallutik, input.dk-mi aaqqissuisoq Torben Vognsen oqarpoq.

Taakkua ilisimatitsissutigaat assit siornatigut ikkunnikuusat ikkutissamaakkallu tamanik takuneqarsinnaasut pineqarput.

Assit taakkununngalu nassuiaatit katersorneqartut qarasaasiap atortorissaarutaata atortussat assinik pilersissinnaaqqullugit iluaqutigissavai.

- Metap qarasaasiap ilisimassusia ChatGPT-tut aamma Googlep Geminitut ippoq. Oqaloqatigiinnermut robottiuvoq qarasaasiallu ilisimassusianik atuisoq, paasissutissat tunniunneqartut allaatigisatilluunniit tunngavigalugit assinik pilersitsisinnaalluni. Taamaaliorniaruni inuk qanoq isikkoqarnersoq ilisimasariaqarpaa. Sanaartukkat qanoq isikkoqarnersut, Torben Vognsen nassuiaavoq.

Tusagassiivik naapertorlugu Europami atuisartut siunnersuisoqatigiivi nakkutilliisullu arlallit Metap pilersaarutai isornartorsiorpaat.

Norgemi atuisartunut siunnersuisoqatigiit Europamilu siunnersuisoqatigiit allat arlallit Metamut allagaqarsimapput silassorissuusiaq ilinniartinneqartariaqannginnerarlugu.

Aamma atuisunut siunnersuisoqatigiit Tænk herhjemmemeersut Meta isornartorsiorpaat.

Atuisut siunnersuisoqatigiiffiata atuisut kajumissaarpai isummertariaqartut.

- Aaqqinniarlugu iserfissaqarpoq, kisianni nassaariuminaappoq tuugassat akornanni toqqoqqagami. Nassaariuminaattussaanngilaq, Torben Vognsen oqarpoq.

Meta siorna taama assingusumik iliorniaraluarpoq. Tassani inuit nittartakkakkut attaveqaqatigiittarfiini atuiasut nalunaarfigineqarput, Metap paasissutissat pissarsiarerusukkai.

Isornartorsiuineq pissutigalugu Irlandimi paasissutissanik nakkutilliisoqarfiup atuutilersinnissaa unitsippaa, maannali pilersaarutit ingerlateqqinneqarput.

- Qulaaniit isigalugu navianartorujussuunngilaq. Silassorissuussiap assit allanik ilasinnaammagit peersisinnaalunilu, maannali politikkikkut pissutsit eqqarsaatigalugit paasisinnaavara Amerikamiut suliffeqarfiutaata, soorlu Metap, paasissutissat assillu qanoq atorniarnerai ernumagineqarsinnaasoq, Torben Vognsen oqarpoq.

/ritzau/