Frankrigip aallartitaa tikeraalersoq

Frankrigip Nunatsinnut attaveqarnini ingerlateqqinniarpaa. Frankrigip Danmarkimi aallartitaa Christophe Parisot Nuummut aggustip 13-ianni tikissaaq.

Franskit sakkutuuisa imarsiortut umiarsuaat Le Fulmar ulloq taanna aamma Nuummut tikissaaq – nunanullu allanut aallartitaqarfimmit oqaatigineqarluni tamannarpiaq pissutigalugu aallartitaq Nunatsinnut tikeraarniartoq.

Le Fulmar Franskit sakkutuuisa imarsiortut, Marine Nationale-mik taaneqartartut sorsuutigaat mikinerusoq. Sorsuut aallaqqaammut kilisaataasimagaluartoq 1990-imi sanaajuvoq, 1996-imilu Marine Nationalemit atorneqalerluni, tassa sinerissamik nakkutilliissutitut atorneqalerami. Le Fulmar aqqanilinnik inuttaqarpoq. Taanna Franskit qeqertaanni Saint Pierre-mi aamma Miquelon-imi New Foundlandip avataaniittuni aalajangersimasumik angerlarsimaffeqarpoq.

Le Fulmar qallunaat sakkutuui imarsiortut peqatigalugit sungiusaqataasarsimavoq – aamma Issittumi Siunnersuisoqatigiit ujaasinermut annaassiniarnermullu suleqatigiinneranni sungiusaqataasarsimalluni. Le Fulmar sooq Nuummut tikeraarniarnersoq Frankrigip aallartitaqarfiata ilisimatitsissutiginngilaa.

Nangitsineq

- Christophe Parisotip tikeraarnermini Nunatsinni oqartussaasunik ataatsimeeqateqarnissaa aamma præsident Macronip juunip 15-ianni tikeraarneranut atatillugu malitseqartitsinissaq eqqartussavaa, Nina Vergmann, Franskit aallartitaqarfianni attaveqaqatigiinnermut sulisoq, Sermitsiamut oqarpoq.

Præsidentip Emmanuelle Macronip Nuummut juunimi tikeraarnermini oqaatigaa, Frankrigip Nuummi konsuleqarfimmik – Københavnimi aallartitaqarfiup immikkoortortaqarfianik – ammaanissamik pilersaaruteqartoq. Pilersaarutit tamakku aallartitap Nunatsinni oqartussanut qularnanngitsumik oqaloqatiginnissutiginiarpai.

- Præsident Macronip Nunatsinni konsuleqarfimmik ammaanissamik nalunaaruteqareernerata kingorna suliniut maannakkut allaffissornikkut suliarineqarpoq, Nina Vergmann oqarpoq, taassumalu konsuleqarfik sumi inissisimassanersoq, qassinik sulisoqassanersoq, Københavnimilu sulisut kisimik atorfinitsinneqarsinnaassanersut imaluunniit aamma Nunatsinneersunik sulisunik atorfinitsitsisoqassanersoq oqaatigisinnaanngilai.

Franskit eqqaamasaat

Frankrigip aallartitaa Christophe Parisot Nuummeereeruni aqaguani Ilulissat avannaanut Eqimukassaaq, taavani Issittumi ilisimatusartup Paul-Emile Victorip illuaraanut, Franskit sermersuarmi ilisimatusartut arlallit aallaavigisartagaannut takuniaassalluni.

Paul-Émile Victor 1948-mit 1953-imut sermersuarmik misissuiartorluni Issittumut angalasarpoq. Sermersuup ingerlaarnera qanoq sumullu sammiveqarnersoq oq paasiniarlugu misissuiartorluni. Ballorngit qullartittakkat uuttortaatit sermersuarmi inissinneqarput, taamaalillutik sermersuup ingerlaarnera paasineqarsinnaalluni. Aammattaaq sermersuup qaava misissorneqarpoq, sermillu nillissusia ammut annertussusia itinerusumilu ikiariissaarnera uuttorneqartarlutik.

Illuaraq illuaraqarfimmi Glacier Lodge Eqimi, 2001-imi pilersinneqarsimasumiippoq. Talittarfik Port Victor aamma Café Victor, Paul-Emile Victor atsiullugu atserneqarsimapput. Illuaraqarfik ullumikkut 16-inik illuaraqarpoq angisuunillu qajannaannerusunik tallimanik tupeqarluni kiisalu caféqarluni.

Paul-Emile Victorip illuaraa Nunatta Katersugaasivianit 2018-imi eqqissisimatitaalerpoq.